43
De ahe mai o de mahamaha gi de temple
1 Gai taane laa ne kave au gi de haitoga e huli laa gi dua, 2 gai au gu gidee de mahamaha o de Maadua o Israel e humai i dua. Gai dono leo e bei de hagangolo o denga vai, gai dono mahamaha gu hagamaalama honga de henua.*Ezk 10.3-4, 18-19; 11.22-23; Rev 1.15 3 Gai de midi aagu ne gide laa e bei dagu midi hagaago ange ne gidee laa i dono masavaa ne humai ai ga oha de aduhale, gai e bei hogi dagu midi ne gidee laa i gaogao ssaalingaa vai go Kebar. Gai au ga ino gi honga de gelegele. 4 Gai de mahamaha o Tagi Maolunga ne ulu mai gi lo te temple i de haitoga i de baasi gi dua. 5 Gai de Hagasaalunga ne langa age au ga kave gi lo te buibui e mua gi lodo; gai au ne gidee bolo de mahamaha o Tagi Maolunga gu hhao de temple.
6 De masavaa o taane laa e duu ai i ogu gaogao, gai au ne langona dahi e basa mai gi de au i lo te temple. 7 Ia ne hai mai, “Tama a tangada, deenei de mommee iai dogu nohoanga, ma de mommee e dugu ange aagena luoogu vae. Deenei dogu mommee e noho ai madali de gau Israel ga hano ai. Gai de gau Israel ma olaadeu hodooligi gu dee aahe ange e hagangadi mee dogu ingoo dabu, i delaadeu daumaha ange gi olaadeu diinonga, ma de danu olaadeu hodooligi i olaadeu mommee daumaha. 8 Gilaadeu ne hagatuu olaadeu haitoga ma laagau o olaadeu haitoga i gaogao laagau o dogu haitoga, gai se dahi donu huu buibui e vaaea omaadeu magavaa. Gilaadeu ne hagangadi mee dogu ingoo dabu i alaadeu hegau hakino gee alodahi. Deelaa ai, au ne daa gilaadeu ga maakau i dogu bole. 9 Deenei ai, gilaadeu gi aaua gee mai i ogu mada i mua, de daumaha ange gi denga diinonga, ma daanunga o olaadeu hodooligi, gai au ga noho i olaadeu daha ga hano ai.
10 Gai koe, tama a tangada, daalaa ange gi de gau Israel dagodo o de temple ma ono hagadulagi ma ono hagatau, gi dookaa ai gilaadeu i alaadeu hegau baubau. 11 Gai noo gilaadeu gu dookaa i alaadeu mee alodahi gu hai, gai koe ga tala ange gi iloo e gilaadeu de ada o de temple — de hai e hagaduu ai, ono mommee e ssao ai ma de ulu mai ai — ma mee i ono lodo ma ono huulonga aama ono hainga alodahi. Gai siia mee nei gi gidee ai e gilaadeu, gai gilaadeu ga kana ange ai ga haia gi bei dono hagadulagi, ma mee gu lava i de hagasauaa aama ono hainga alodahi.
12 Deenei de hainga o de temple: de mommee i luu baasi alodahi i honga de mounga laa e dabu mmao. Deenei de hainga o de temple.
De mommee o ssigidaumaha
13 “Aanei haidenga o de mommee o ssigidaumaha i denga sugilima, (dahi sugilima nei se dahi sugilima ma e dolu inisi): gai de valavala i luu baasi, se dahi sugilima de gelo ma de lahalaha, gai de hiihii i luu baasi se dolu inisi de maadolu. Gai deenei tuuduu o de mommee o ssigidaumaha:*Exo 27.1-2; 2 Ch 4.1 14 mai i lo te valavala i honga de gelegele ga hanage ai gi tolodolo, e mua gi lalo se lua sugilima tuuduu, gai se dahi sugilima de lahalaha. Gai mai i tolodolo damaa mee ga hanage ai gi tolodolo laumalie, se haa sugilima tuuduu gai e dahi sugilima de lahalaha. 15 Gai honga de mommee o ssigidaumaha e haa sugilima tuuduu, gai e haa hanga e tuu age i honga denga dege e haa. 16 De mommee o ssigidaumaha e tuu dege, e madaangahulu ma lua sugilima de looloa gai e madaangahulu ma lua sugilima de lahalaha. 17 De mommee e mua gi lunga e tuu dege, gai e madaangahulu ma haa sugilima de looloa ma de lahalaha, gai tolodolo i luu baasi se baasi sugilima de lahalaha, gai de valavala i luu baasi se dahi sugilima de maadolu. Gai de gaagenga o de mommee o ssigidaumaha e huli gi de baasi gi dua.”
18 Gai ia ne hai mai gi de au, “Tama a tangada, e hagadaba de Ia Aamua go Iahweh: Aanei mee gu hagasauaa ange gi de mommee o ssigidaumaha, i de laangi e hagaduu ai ga lava, e hai ai denga sigidaumaha dudu, ma de dabudabui ange dodo gi luu baasi alodahi: 19 koe gaavee dahi kaau daane e hai ai ssigidaumaha o haisala o de gau haimeedabu, go daane de aamuli o Levi, mai i de huaabodu o Zadok. Aanei gilaadeu e loomai e hagapaa mai gi de au, ma de hai hegau mai gi de au, go de Ia Aamua go Iahweh e hagadaba. 20 Gai koe ga kave hanu ono dodo, ga hulu ange gi honga hanga e haa o de mommee o ssigidaumaha, ma honga denga dege e haa aama honga de hiihii alodahi; gai koe ga hagagilimalali ai aama de hagadabu de mommee o ssigidaumaha. 21 Gai koe ga kave de kaau daane e hai ai ssigidaumaha o haisala, ga dudu i de mommee gu hagadabena ange laa aagena i de mommee o de temple, i tua de mommee dabu laa.
22 Gai de hagalua laangi, gai koe haia ssigidaumaha o haisala i dahi guudi daane, e deai laa mee baubau i dono angaanga; gai de mommee o ssigidaumaha e hagagilimalali, bei de hai e hagagilimalali ai laa i de kaau. 23 Gai ga lava naa huu i dau hagagilimalali de mommee o ssigidaumaha, gai koe ga gaamai dahi kaau daane ma dahi ssiibi daane e deai laa mee baubau i olaau angaanga. 24 Gai koe ga hai ai sigidaumaha i mada luu mada o Tagi Maolunga. Gai de gau haimeedabu gi hagamalili ina ange soolo aagena, ga hai ai ssigidaumaha dudu ange gi Tagi Maolunga.
25 E hidu laangi aau e hai ai ssigidaumaha o haisala, i dahi guudi daane; gai koe gaamai hogi e dahi kaau daane ma dahi ssiibi daane mai i de hagabuulingaa manu, gai deai mee baubau i olaau angaanga. 26 Gai gilaadeu ga hagadabu ai ma de hagagilimalali ai de mommee o ssigidaumaha; deenei delaadeu hai e hagadabu ai de mommee o ssigidaumaha. 27 Gai ga odi ange naa huu laangi e hidu nei, gai mai i de hagavalu laangi, gai de gau haimeedabu gi haia denga sigidaumaha dudu, ma sigidaumaha hagadanuaa magavaa i honga de mommee o ssigidaumaha. Gai au e malangilangi naa i goodou, go de Ia Aamua go Iahweh e hagadaba.” *Exo 29.35-37