De Beebaa Dabu Ezekiel 45

De vaaenga o Tagi Maolunga

1 “De masavaa naa huu oodou e vaevae ange ai de henua e bolo, gai goodou e vvae ange hogi dahi mommee gi Tagi Maolunga i de henua, se vaaenga dabu, e 25,000 sugilima de looloa, gai e luasemada* sugilima de lahalaha; de mommee nei alodahi e dabu. 2 Gai goodou e vaae e limalau sugilima e hai ai de hale dabu, gai haia de mommee i luu baasi gi se madalima sugilima. 3 Gai goodou haidea i lo te vaaenga dabu laa dahi mommee e 25,000 sugilima de looloa, gai e dahisemada sugilima de lahalaha. Go kinei e hagaduu ai de hale dabu, go de mommee dabu mmao. 4 Deenei de vaaenga dabu i honga de henua, ange gi de gau haimeedabu e haia hegau i lo te mommee dabu, go gilaadeu e loomai gi mada luu mada o Tagi Maolunga e hai ai alaadeu hegau. Go kinei e hagatuu ai olaadeu hale, aama de mommee e hagadabu ange gi de temple. 5 Gai vaaenga ange dahi mommee gi 25,000 sugilima de looloa, ma e dahisemada sugilima de lahalaha gi de hagadiilinga o Levi, e haia laa hegau o de temple, gai delaadeu boolonga go denga aduhale olaadeu e nnoho ai laa.

6 Gai gaavange hogi dahi mommee moo de aduhale, i gaogao de mommee gu vvae laa e hai ai de mommee dabu, haia gi limamano sugilima de lahalaha, gai e 25,000 sugilima de looloa; de mommee nei se mommee ange gi dangada alodahi o Israel.

De vaaenga o tagi

7 “Gai de mommee e vvae ange gi tagi o de henua, go de mommee i luu baasi de alahenua dabu ma de alahenua o de aduhale mai i tai i baasi dai ga hano ai gi denga goinga i de baasi gi dua, gai e bei ai hogi de looloa o de mommee e vvae ange gi denga aamuli o Israel. 8 De henua nei go dono mommee e henua ai i Israel. Denga dagi aagu gu hili gi dee vaivai haia dogu huaadangada, aagai gi dugua ange de gau Israel gi gaavee olaadeu vaaenga gi bei de soa o olaadeu aamuli.

Hainga ange gi denga dagi

9 “E hagadaba de Ia Aamua go Iahweh: Denga dagi o Israel, goodou gu gona odi oodou mee e hai! Gu lava oodou vaivai hai ma de hagaduasala dangada, gai hai hegau i hagamodu heohi ma de mee heohi. Goodou aude alualumia dangada mai honga olaadeu mommee, go de Ia Aamua go Iahweh e hagadaba. 10 Goodou haia oodou hagabaaunga gi heohi; de hagabaaunga o dahi ephah† gi heohi, gai de hagabaaunga o dahi bath‡ gi heohi.* 11 De ephah ma de bath e hai gi se hagabaaunga daudahi, de bath se dahi diba i diba e madaangahulu o de homer, gai de ephah se dahi diba i diba e madaangahulu o de homer; gai hagabaulia mee nei i de homer e hai hegau ai laa i de laa tubua. 12 Dahi shekel e bei se madalua gerah. Gai de madalua shekel nei e hagapuni ange gi e madalua ma lima shekel, aama e madaangahulu ma lima shekel e bei se dahi mina.

13 Gai deenei ssigidaumaha oodou e hai: e dahi diba i diba e ono o dahi ephah§ mai i dahi homer*wheat, ma dahi diba i diba e ono o dahi ephah mai i dahi homerbarley. 14 Gai de hagabaaunga o lolo se dahi diba i diba e madaangahulu o dahi bath† mai i dahi cor‡ (dahi cor se madaangahulu bath, gai e bei hogi dahi homer). 15 Goodou e aau gee hogi dahi ssiibi mai i denga lualau ssiibi alodahi, i denga mommee iai helii o Israel. Ssiibi nei ni mee e hai ai ssigidaumaha madali denga grain, ma ssigidaumaha dudu, aama ssigidaumaha hagadanuaa magavaa, e tala ai haisala o dangada, go de Ia Aamua go Iahweh e hagadaba. 16 Dangada alodahi o de henua gi gaavange de mee ngadi gaavange nei gi tagi o Israel. 17 Gai go tagi o de henua e haia mee e hai ai ssigidaumaha dudu, ma ssigidaumaha o denga grain, ma ssigidaumaha o mee unu i denga daonga, go taonga o de duu de maasina i dai, ma denga Sabbath, ma denga daonga alodahi gu hagamodu ange laa gi de gau Israel. Gai ia gi haia mee e hai ai denga sigidaumaha o haisala, ma sigidaumaha o grain, ma sigidaumaha dudu, ma sigidaumaha hagadanuaa magavaa, e tala ai haisala o de gau Israel.

Denga daonga gu hagamodu

(Exo 12.1-20; Lev 23.33-43)

18 “E hagadaba de Ia Aamua go Iahweh: Tahi laangi o tahi malama, gai goodou gaamai e dahi kaau daane e deai laa mee baubau i dono angaanga e hai ai ssigidaumaha e hagagilimalali ai de mommee dabu. 19 Gai tangada haimeedabu gi gaavee hanu dodo o de manu o ssigidaumaha o haisala gi hulu ina ange gi denga laagau i luu baasi haitoga o de temple, ma hiihii o de mommee o ssigidaumaha, ma laagau o haitoga o de buibui e mua gi lodo. 20 Gai goodou haia hogi de hegau nei i de hidu laangi o de malama, ange gi tangada gu haisala, gai ia tee se hagabau aabe ne hai i dana dee iloo, gai goodou ga hai ai gi gilimalali de temple.

21 Gai de madaangahulu ma haa naa huu laangi o tahi malama, gai goodou ga dao Taonga Hagasili i e hidu laangi, gai goodou e gai pelaoaa e dee hagahua i denga laangi laa.* 22 De laangi laa gai tagi o de henua gi gaamai dahi kaau daane e hai ai ssigidaumaha o haisala i ono hiidinga aama hiidinga o dangada alodahi o de henua. 23 Gai denga laangi e hidu alodahi o Taonga Hagasili, gai ia gi gaamai e hidu kaau daane, ma e hidu ssiibi daane e deai mee baubau i olaadeu angaanga, e hai ai ssigidaumaha dudu ange gi Tagi Maolunga, aama dahi guudi daane e hai ai ssigidaumaha o haisala. 24 Gai ia gi gaamai e dahi ephahgrain e hai ai ssigidaumaha madali dahi kaau daane, ma dahi ephah madali dahi ssiibi daane laa, ma dahi hin§ lolo olive madali dahi ephahgrain.

25 Gai denga laangi e hidu o taonga, e daamada laa i de madaangahulu ma lima laangi o de hidu malama, gai ia gi haia hogi mee e hai ai ssigidaumaha o haisala, ma ssigidaumaha dudu, ma ssigidaumaha o denga grain aama lolo.*

*45:1 luasemada: go lo te Beebaa Greek iai. Gai de Beebaa Hebrew e hai ange bolo se dahisemada.

†45:10 de ephah ma de homer go de hagabaaunga o denga mee mmasa; de ephah agu made se 30 pauni; de homer agu made se 300 pauni (diiloo hogi denga gubu e 11, 24).

‡45:10 dahi bathagu made se 5 gaalene.

*45:10 Lev 19.36

§45:13 ⅙ ephahe bei se 6 pauni.

*45:13 dahi homere bei se 50 gaalene.

†45:14 ⅒ bathse 2½ koada.

‡45:14 dahi core bei se 50 gaalene.

*45:21 Num 28.16-25

§45:24 dahi hinagu made se dahi gaalene.

*45:25 Num 29.12-38