De Beebaa go
Ezra
Hanu dagodo o de beebaa nei
De Beebaa go Ezra e duudagi de tala mee e sisi i Chronicles. Gai e tala de aahe mai o de gau Ssuu ne gaavee laa gi Babylon, ga aahe ange ga nnoho i de henua ma de daumaha i Jerusalem. Gai deenei de hai e hagatau ai:
1. De gau Ssuu ne aahe mai i mua i Babylon, i dua de hagailoo a Cyrus, taane Persia gu hodooligi laa.
2. De hagaduu age ange o de temple ga hagadabu, ma de hagaahe age de daumaha ange gi de Maadua i Jerusalem.
3. Hanu ngadau i muli mai, gai Ezra ne dagi mai ange hanu dangada Ssuu ga aahe mai ai gi Jerusalem. Ezra se daane e iloo e ia hainga a de Maadua, gai go ia ne balea ange dangada ga hagatau ai de hai e daumaha ai, aama de hai o dangada e mouli ai, gi maua ai e Israel i de daohi alaadeu hai daumaha.
Hanu gubu hagamogomogo: “Gai de gau Israel gu aahe mai laa gi de henua, ma dangada alodahi gu vaaea gee laa gilaadeu, mai i denga dahulinga hakino gee a dangada o de henua laa, ne gaimee i taonga laa, aama de daumaha ange gi Tagi Maolunga, de Maadua o Israel. Gilaadeu ne hai hogi Taonga o Pelaoaa Dee Hagahua i e hidu laangi ga malangilangi ai; i hiidinga Tagi Maolunga gu hai gi kona mmao delaadeu malangilangi, ia ne sui lodo o de hodooligi o Assyria, gai ia ga bale ange gilaadeu ga hagaahe age ai de hale o de Maadua, go de Maadua o Israel” (6.21-22).
Denga vaevaaenga
Dangada ne aahe mai i Babylon i taamada (1.1—2.70)
De hagaduu o de temple ga hagadabu (3.1—6.22)
De aahe mai o Ezra ma hanu dangada ne gaavee gee laa (7.1—10.44)
1
De hai a Cyrus de gau Israel gi aahe gi Jerusalem
1 Gai tahi ngadau huu o Cyrus ne hodooligi ai i Persia, gai Tagi Maolunga ne hagassula ana muna gu tala i daho Jeremiah. Ia ne hagangalue lodo o Cyrus de hodooligi o Persia, gai ia ga hagailoo i mommee alodahi i dono nohoanga hodooligi ma de sisi muna nei ga daohi:*Jer 25.11; 29.10
2 “E hagadaba Cyrus, de hodooligi o Persia: Tagi Maolunga, de Maadua o de langi, gu gaamai gi de au denga nohoanga hodooligi o henua i lalo alodahi, gai ia gu tala mai au gi hagaduulia age dono hale i Jerusalem i Judah.*Isa 44.28 3 Gai be goai naa huu i oodou magavaa e lodo e hano gi Jerusalem i Judah — dono Maadua gi madali ia, gai ia ga hanage gi Jerusalem i Judah, ga hagaduu age ai de hale o Tagi Maolunga, de Maadua o Israel, go de Maadua e noho laa i Jerusalem. 4 Gai dangada alodahi ne ola, e dee hilihili be go hee o tangada e noho ai, gai dangada i de mommee laa gi balea ange ia, i selevaa ma goolo, ma goloa, ma manu haangai, aama mee ngadi gaavange, e hagaduu ai de hale o de Maadua i Jerusalem.”
5 Gai denga dagi o de aamuli o Judah, ma de aamuli o Benjamin, ma de gau haimeedabu, ma de aamuli o Levi, aama dangada alodahi a de Maadua gu hagangaalue laa olaadeu lodo, ga hagadabena e hulo e hagaahe age de hale o Tagi Maolunga i Jerusalem. 6 Gai dangada alodahi e paa ange gi gilaadeu gi gaavange gi gilaadeu denga goloa selevaa ma goolo, ma goloa ange laa, ma manu haangai, aama mee hagamogomogo madali denga mee ngadi gaavange. 7 Gai de hodooligi go Cyrus ga hagassao mai denga goloa o de hale o Tagi Maolunga a Nebuchadnezzar ne kave gee laa i Jerusalem ga dugu i lo te hale o ono diinonga. 8 Gai Cyrus, de hodooligi o Persia, ne hai Mithredath, tangada doange gi hagassao ina mai goloa laa mage daulia gi odi ange ga gaavange gi Sheshbazzar, tagi o Judah.
9 Gai deenei taelodo o mee alodahi:
e matolu beisini goolo;
e mano beisini selevaa;
e madalua ma siva mee e dudu mee maanongi;*Muna Hebrew i kinei e dee iloo danuaa dono hagadoonunga.
10 e matolu boolo goolo;
e 410 boolo selevaa;
e mano goloa ange laa.
11 Denga goloa goolo ma selevaa alodahi ma selevaa se 5,400. Aanei goloa alodahi a Sheshbazzar ne gaamai i Babylon i de masavaa o dangada ne aahe mai ai gi Jerusalem.