25
Hagadiilinga o Abraham ange laa
(1 Ch 1.32-33)
1 Gai Abraham ne hai ange hogi dahi bodu, dono ingoo go Keturah. 2 Gai de hine laa ne haanau ange gi de ia Zimran, ma Jokshan, ma Medan, ma Midian, ma Ishbak, aama Shuah. 3 Jokshan ne hagadili Sheba ma Dedan. Gai Dedan ne hagadili de gau Asshur, ma de gau Letush, aama de gau Leum. 4 Gai dama daane a Midian go Ephah, ma Epher, ma Hanok, ma Abida, aama Eldaah. Gilaadeu nei alodahi go hagadiilinga o Keturah.
5 Gai Abraham ne bolo ange ana mee alodahi gi Isaac. 6 Aagai ne gaavange gi dama a ono bodu laa daha hanu mee ngadi gaavange, ga hai gilaadeu gi hulo gee mai i daho dana dama go Isaac, i de masavaa oona goi mouli ai, gai gilaadeu ne hulo ga nnoho i de henua i baasi i dua.
De magau o Abraham
7 Gai Abraham ne mouli i e 175 ngadau. 8 Gai Abraham ne magau i de masavaa gu kona ai dono madumadua, gai ne daulooloa dono mouli, gai ia ne hagabuni madali ono dangada. 9 Gai luu dama daane a Abraham, go Isaac ma Ishmael ga kave ia ga danu i lo te haonga i Machpelah, i de alahenua o Ephron, tama daane a Zohar, taane Heth, i baasi dua o Mamre. 10 Gai Abraham ngaadahi ma dono bodu go Sarah ne danu i de alahenua aana ne hagao i daho de gau Heth.*Gen 23.3-16 11 Dua huu de magau o Abraham, gai de Maadua ne hagamanuuia dana dama daane go Isaac. Gai Isaac e noho i Beer Lahai Roi.*Gen 16.14
De aamuli o Ishmael
(1 Ch 1.28-31)
12 Gai deenei de aamuli o tama daane a Abraham go Ishmael, go tama a Hagar, de hine Egypt, gai go de hine hai hegau o Sarah, ne haanau ange laa gi Abraham.
13 Aanei denga dama daane a Ishmael, mai i tama madua ga hano iho ai: go Nebaiot, tama madua a Ishmael, ma Kedar, ma Adbeel, ma Mibsam, 14 ma Mishma, ma Dumah, ma Massa, 15 ma Hadad, ma Tema, ma Jetur, ma Naphish, aama Kedemah. 16 Aanei dama daane a Ishmael, go gilaadeu dagi o denga aamuli e madaangahulu ma lua, olaadeu aduhale ma mommee nnoho gaainga ne gaavange hogi olaadeu ingoo aagena. 17 (Gai Ishmael ne mouli i e 137 ngadau. Gai ia ne hai ana manava hagaodi ga magau, gai ia gu hagabuni madali ono dangada.) 18 Gai gilaadeu ne nnoho mai i Havilah ga dae ai gi Shur, i baasi dua o Egypt, i de baasi ange gi Assyria. Gai gilaadeu e kino i olaadeu daina ange laa.*Muna hagaodi i de gubu nei e dee iloo danuaa dono hagadoonunga i muna Hebrew.
De haanau o Esau ma Jacob
19 Gai deenei taalanga o de huaabodu o Isaac, tama daane a Abraham.
Abraham ne hagadili Isaac; 20 gai ga madahaa huu ngadau o Isaac, gai ia ga kave Rebekah, tamaa hine a Bethuel, taane Syria mai i Mesopotamia, go taina hahine o Laban, ga hai bodu ange gi de ia. 21 Gai Isaac ne dalodalo ange gi Tagi Maolunga i dagodo o dono bodu, i hiidinga tigi ai ana dama; gai Tagi Maolunga ga basa ange gi dana dalodalo, gai Rebekah gu hai dama. 22 Gai luu dama i lo tono dinae ne hagadau usu, gai ia ga hagadaba, “Gu aha gu dagodo ai nei au bee nei?” Gai ia ne hano ga ssili ange gi Tagi Maolunga.
23 Gai Tagi Maolunga ne hai ange gi de ia,
“E lua huaahenua i lo too dinae,
gai luu huaadangada i oo lodo naa e dee nnoho hagabuni;
dahi e mmahi ange i de ia ange laa,
gai tama madua e hai hegau ange naa gi tama gauligi.” *Rom 9.12
24 Gai de masavaa huu o de hine laa ne haanau ai, gai tilo, se maasanga nogo i lo tono dinae. 25 Gai tama ne haanau mai i mua e mmea, gai dono angaanga alodahi e huluhulua, gai ia ga hagaingoo ange ia go Esau.†Esau i muna Hebrew e bei e huluhulua. 26 Gai muli mai, gai dono daina gu haanau, gai ia e kumi de muli de vae o Esau, gai ia ga hagaingoo ange ia go Jacob.‡Jacob i muna Hebrew e bei go de ia ne guumia muli de vae, aabe go de ia e daahanga ina dangada. Gai Isaac gu madaono ono ngadau, i de masavaa a Rebekah ne haanau ai delaau maasanga.
De boolonga o tama madua
27 Gai ga maatua huu luu gauligi daane laa, gai Esau se daane dau i de dili manu, ia ne noho saele i lodo henua, aagai Jacob se daane dee muu, ia e noho i lodo hale malo. 28 Gai Isaac e aloha i Esau, go hiidinga ia e lodo e gai denga kano manu; aagai Rebekah e aloha i Jacob.
29 Dahi laangi gai Jacob ne hai dahi suba, gai Esau ne ahe mai i lodo henua, gai ia gu kona dono saalohia. 30 Gai ia ga hai ange gi Jacob, “Aude haihaia gaamai hanu au suba mmea naa e gai au, go hiidinga au gu kona donu dogu saalohia.” (Deelaa ai, ia gu hagaingoo ange go Edom.)§Edom i muna Hebrew e bei go mmea.
31 Jacob ne hai ange, “Hagao ina mai gi de au de boolonga o tama madua.”
32 Esau ne hai ange, “Au gu dai magau i dogu saalohia, gai ni haigamaiana aha de boolonga o tama madua mai gi de au iainei?”
33 Gai Jacob ga hai ange, “Hagatoo donu mai gi de au i mua.” Gai ia ga hagatoo donu ange gi de ia, ga hagao ange de boolonga o tama madua gi Jacob.*Heb 12.16
34 Gai Jacob ne gaavange gi Esau hanu pelaoaa ma hanu suba lentil. Gai ia ga noho ga gaimee ma de unu, muli mai gai ia ne hano gee mai i kilaa.
Gai Esau ne hagangadi mee donu de boolonga o tama madua.
*25:10 Gen 23.3-16
*25:11 Gen 16.14
*25:18 Muna hagaodi i de gubu nei e dee iloo danuaa dono hagadoonunga i muna Hebrew.
*25:23 Rom 9.12
†25:25 Esau i muna Hebrew e bei e huluhulua.
‡25:26 Jacob i muna Hebrew e bei go de ia ne guumia muli de vae, aabe go de ia e daahanga ina dangada.
§25:30 Edom i muna Hebrew e bei go mmea.
*25:33 Heb 12.16