3
De hagaduasala o Jerusalem ma Judah
1 Tilo, de Ia Aamua,
Tagi o denga hagabuulinga hebagi
e kave gee naa de bale o Jerusalem ma Judah
ma goloa olaau e tali hagalodolodo ange laa aagena,
ma denga gai alodahi, ma vai alodahi;
2 taane mmahi ma taane abo i de hebagi,
tangada hagamodu muna ma de pelaabisi,
tangada e daalaa mee tigi loomai ma taane dagi,
3 ma tagi o tinolima daane hebagi, ma taane maolunga,
ma taane hagasaele ma tangada heiangi i de hai huuhuaa mee, aama tangada hai helau.
4 Au e hai naa de gau mmodo gi dagina gilaadeu,
gai olaadeu dagi go denga gauligi vaaligiligi.
5 Dangada e hagadau vaivai daakodo naa i olaadeu magavaa,
dahi dangada e vaivai hai tangada ange laa ma tangada e baa ange gi de ia.
De gauligi e hai baasi ange naa gi tangada madumadua,
tangada maolalo e hai baasi ange naa gi tangada hagadubu.
6 Dahi dangada e poo naa dahi ono daina
i de huaabodu o dono damana, ga hai ange,
“Koe e dahi oo malo laa daha, go koe e dagina gidaadeu,
koe e dagina de mommee maoha nei!”
7 Aagai ia e oo naa i de laangi laa, ga hai ange,
“Au e dee maua i de hagadanuaa mee nei.
E deai donu gai be ni malo i dogu hale;
goodou e dee hai au go doodou dagi.”
8 Jerusalem e oha naa ga maoha,
gai Judah e hagadee kii ina naa,
i hiidinga alaadeu muna ma hegau e hai baasi ange gi Tagi Maolunga,
ma de hagangadi mee dono mahamaha.
9 Olaadeu mada e hagabaubau donu huu gilaadeu;
gilaadeu e hagaago mai olaadeu haisala bei Sodom;
gilaadeu e dee hagammuni donu olaadeu haisala.
E vakaa naa gilaadeu!
Gilaadeu e hagaduasala donu huu gilaadeu.
10 Daalaa ange gi gilaadeu e heohi bolo gilaadeu e duadonu naa,
gai gilaadeu e gai naa hua o alaadeu hegau.
11 E vakaa naa tangada baubau! Ia e hai ngadaa naa!
Ana hegau ne hai e aahe ange naa donu huu gi de ia.
12 Denga gauligi e vaivai hai naa ogu dangada,
denga haahine e dagudagu ange naa gi gilaadeu.
Ogu dangada, oodou dagi e dagi gee goodou;
gilaadeu e kave gee goodou i de haiava.
13 Tagi Maolunga gu humai gi dono mommee hagamodu muna;
ia gu duu e hagamodu muna o dangada.
14 Tagi Maolunga e hagamodu naa muna
o denga daane maatua ma dagi o ono dangada:
“Go goodou ne oohaa dagu veelengaa grape,
ma de gaiaa goloa o de gau hagaau aloha i lodo oodou hale.
15 Gu aha goodou gu vaivai hai ai naa ogu dangada,
ma de hagaduasala de gau hagaau aloha?”
go de Ia Aamua, Tagi o denga hagabuulinga hebagi e hagadaba.
16 E hagadaba Tagi Maolunga,
“Denga damaa hine o Zion e hagamaolunga,
gilaadeu e seesee hagassoenga saele,
ma de galogalo hai kai saele;
gilaadeu e lagalaga maalie i delaadeu seesee,
gai mee dau i olaadeu gubu vae e dadangi.
17 Deelaa ai, de Ia Aamua e hai naa gi ssomo denga mangeo
i biho o denga haahine o Zion,
Tagi Maolunga e hai naa gi maalali olaadeu biho.”
18 De laangi laa gai de Ia Aamua e kave gee naa olaadeu mee hagalaagii: denga mee dau i olaadeu gubu vae, ma mee nnoa ai olaadeu biho, ma mee dau be ni baasi maasina i olaadeu ua, 19 ma olaadeu hakai dalinga, ma mee dau i olaadeu gubu lima, ma mee e haoli ai olaadeu mada, 20 ma goobai malo, ma seeini e dau i olaadeu gubu vae, ma mee nnoa ungaalodo, ma manu iai vai malo, ma mee dau, 21 ma buulei lima ma buulei usu, 22 ma malo hoou, ma malo lloa, ma malo laa daha, ma gede dagidagi, 23 ma galaasa dilodilo, ma linen, ma goobai malo, aama denga malo e haoli ai luu mada.
24 Gilaadeu gu dee maanongi gai gu pilo;
gu dee beele gai gu noonoa i denga daula;
gu dee selu olaadeu biho gai gu malali olaadeu biho;
gu dee kahu i malo danuaa gai go malo daladala;
gilaadeu gu dee mahamaha gai gu maaga i de baalanga.
25 Oodou daane e daia naa ga maakau i de gadilaasa,
gai oodou daane mmahi e maakau naa i de hebagi.
26 Denga haitoga o Jerusalem e tangi naa ma de hinangalosaa,
bei dagodo o de hine e noho i honga de gelegele, gu deai ono malo.