5
Taahili o de veelengaa grape
1 Au e daahili ange gi de ia oogu e aloha ai
i taahili o dagodo o dana veelengaa grape:
De ia oogu e aloha ai e dahi ana veelengaa grape,
i honga dahi duuduu e ssomo danuaa ai laa denga manu.*Mat 21.33; Mark 12.1; Luke 20.9
2 Ia ne hagabalabala de gelegele ga aau age denga hadu,
gai ga doo i denga grapevine danuaa hugadoo.
Ia ne hagaduu hogi dahi hale dagitilo i kilaa
ma de hai dahi mommee e kumi ai uvaini.
Gai ia ne tali gi hhua mai ai denga grape danuaa,
aagai ni grape baubau donu huu ne hhua mai ai.
3 Goodou e nnoho laa i Jerusalem ma dangada o Judah,
goodou hagamodu ina omaau muna ma dagu veelengaa grape.
4 Ni aha ange aagu tee hai ange laa gi dagu veelengaa grape?
Au ne tali gi loage ai denga grape danuaa,
gai gu aha gu ni grape baubau donu huu ne hhua mai ai?
5 Iainei gai au e tala adu gi goodou
dagu hai e hai ai dagu veelengaa grape:
au e aau gee naa de buibui i luu baasi,
gai e oha naa ga maoha;
au e oha iho naa dono buibui,
gi dagadagahia ai gi lalo.
6 Au e hai naa de veelenga laa gi se ngadi gelegele;
au e dee velevele naa donu aabe hagabalabala de veelenga laa,
gai gi ssomo age ai denga manu duiduia ma manu daladala;
au e hai ange naa gi denga hagausinga
gi haia gi dee pala iho de langi gi ono elunga.
7 De veelengaa grape a Tagi o denga hagabuulinga hebagi go de hale o Israel,
gai dangada o Judah go de veelenga oona e malangilangi ai laa.
Ia ne ssala de hagamodu muna heohi i kilaa,
aagai tilo, go de daa dangada donu huu aana ne gidee;
ia ne saalaa de heohi,
aagai tilo, go de tangi donu huu o dangada aana ne langona!
E vakaa naa de gau baubau
8 E vakaa naa gilaadeu e haia ga lagolago olaadeu hale,
ma de hagallaha ange olaadeu alahenua,
ga dae ai gi teai ange mommee e doe,
gai go goodou donu huu e nnoho i honga de gelegele laa.
9 Tagi o denga hagabuulinga hebagi
gu hagatoo donu ma gu langona e au:
“Ni muna abodonu, denga hale nnui e ngadi daakodo naa,
gai denga hale danuaa e deai naa dangada e nnoho ai.
10 Gai de madaangahulu acre*de madaangahulu acre: muna Hebrew e hai ange go de madaangahulu yoke, e bei go de gelegele a denga kaau e madaangahulu e hagabalabala i dahi laangi. o denga veelengaa grape
e dahi donu huu bath†dahi bathagu made se 5 gaalene. uvaini e maua ai,
e dahi homer‡dahi homeragu made se 300 pauni. golee e doo naa
aagai e dahi ephah§dahi ephahagu made se 30 pauni. e maua ai.”
11 E vakaa naa dangada e oho age laa i taiao,
e ssala hanu mee mmahi e unu,
ma de aala ga nnoho gi lo te boo,
ga dae ai gi delaadeu unu ga ssenga i uvaini!
12 Gilaadeu e hanu harp ma lyre i alaadeu daonga,
ma tambourine ma flute aama uvaini;
aagai gilaadeu e hagangadi mee hegau a Tagi Maolunga,
aama tee hagadubu ana hegau e hai.
13 Deelaa ai, ogu dangada e gaavee naa gi denga henua gee,
go hiidinga teai selaadeu iloo mee;
olaadeu daane maolunga e maakau naa i de hiikai,
gai olaadeu hagabuulinga soa e maakau naa i de hieunu.
14 Deelaa ai, de mommee o de gau maakau gu hhanga dono ngudu ma gu laumalie,
e holo ai de gau maolunga o Jerusalem ma ono hagabuulinga soa,
aama alodahi e daonga ma de hagalongaa i kilaa.
15 Dangada e hai naa ga maolalo,
gai dangada e hagamaolalo ina na,
tangada hagamaolunga e hagangadi mee ina naa.
16 Aagai Tagi o denga hagabuulinga hebagi
e hagaamua naa i hiidinga dana hagamodu i de heohi,
gai de Maadua dabu e hagaago mai naa bolo ia e dabu i dono heohi.
17 Gai denga ssiibi gauligi e gaimee naa i kilaa bei de mommee iai helii,
gai hanu dangada gee e gaimee naa i de mommee o de gau lava gu maoha laa.
18 E vakaa naa dangada e daangia saele baubau i daula o de mee dee heohi,
ma de dada saele haisala bei daula o de hada,
19 gai dangada e hagataba laa, “Tagi Maolunga gi hagamoolau,
ia gi moolau de hai ana hegau gi gidee ai gimaadeu.
Haia mee nei gi tae mai, gai gi moolau de hai hegau a de Ia Dabu o Israel,
gi iloo ai e gimaadeu!”
20 E vakaa naa gilaadeu e daalaa bolo de baubau go tanuaa,
gai tanuaa go de baubau,
gilaadeu e tala bolo de gohu go de maalama
gai de maalama go de gohu,
gai gilaadeu e tala bolo de mee mmala e mee maimai,
gai de mee maimai e mmala.
21 E vakaa naa gilaadeu e maanadu laa
bolo gilaadeu ni dangada heiangi ma de tonu!
22 E vakaa naa denga daane dau i de unu uvaini,
ma denga daane mmahi i de hilo denga mee mmahi,
23 go gilaadeu e degi ange gi tangada gu haisala
i hiidinga o de ngadi gaavange hagasenga,
aagai e dee hagamodu muna o tangada tigi haisala i de mee heohi.
24 Deenei ai, e bei de ahi ula e dudu ai laa denga helii mmasa
gai denga helii mmasa e dudu ga odi i lo te ahi ula,
gai olaadeu aga e hulo ga pobo;
olaadeu huaala e ilihia e de madangi bei de mama o denga gelegele,
go hiidinga gilaadeu gu tili de hainga a Tagi o denga hagabuulinga hebagi,
ma de hagangadi mee muna a de Ia Dabu o Israel.
25 Deelaa ai, Tagi Maolunga gu lili mmao i ono dangada,
gai ia ne hagaabo dono lima ga daa gilaadeu gu maakau.
Denga mounga gu ngalungaalue;
de gau maakau gu daakodo saele i honga denga haiava bei denga gainga.
Gai mee nei alodahi tee maua donu i de hagahelui dono lili,
gai dono lima goi hagaabo donu huu.
26 Ia e hagaduu age naa dahi hagailonga ange gi denga huaahenua mmao,
ia e hagavogi ange gi gilaadeu i luu bido o henua i lalo,
gai tilo, gilaadeu e hagamoolau mai naa ma de hakemo mai!
27 E deai donu se gilaadeu e dalea aabe dai baguu,
e deai hogi e dai seni aabe seni,
gai e deai donu se mee e nnoa ai olaadeu ungaalodo e madala,
e deai hogi se mee e nnoa ai olaadeu mee vae e maoha.
28 Dao o alaadeu mee hholu e kangi,
alaadeu mee hholu alodahi gu dada ma gu maalena;
vae o alaadeu hoosa e bei hadu makaga,
gai hagasii o olaadeu hada hebagi e bei dagodo o ssou.
29 Gilaadeu e hagangolo bei de laiono, ma denga laiono mmahi;
gilaadeu e hagangolo i de maua dahi manu,
ga kave gee gai e deai donu e maua i de hagaola.
30 Gilaadeu e hagangolo naa i de manu laa i de laangi laa,
bei de hagangolo o beau o de moana.
Gai noo tangada e galo ange ga tilo de henua,
gai tilo, gu gohu ma de hai ngadaa;
denga hagausinga e haoli naa de maalama.
*5:1 Mat 21.33; Mark 12.1; Luke 20.9
*5:10 de madaangahulu acre: muna Hebrew e hai ange go de madaangahulu yoke, e bei go de gelegele a denga kaau e madaangahulu e hagabalabala i dahi laangi.
†5:10 dahi bathagu made se 5 gaalene.
‡5:10 dahi homeragu made se 300 pauni.
§5:10 dahi ephahagu made se 30 pauni.