10
1 E vakaa naa gilaadeu e hagaduulia hainga dee heohi,
ma gilaadeu e haia hainga e hagaduasala ina dangada;
2 ma de kave gee de heohi o de gau hagaau aloha,
ma tee hagamodu muna o ogu dangada gu duasala laa i de heohi,
ma de vaivai hai denga haahine gu maakau olaadeu bodu
ma de gaiaa mee o denga gauligi gu deai olaadeu damana.
3 Gai ni aha naa oodou e hai i de laangi o de hagaduasala,
ma de masavaa e dae mai ai de hai ngadaa i de mommee mmao?
Go daho ai oodou e hulo gi balea adu goodou?
Gai go hee naa donu oodou e dugu ai oodou goloa lagolago?
4 Gai gu deai ange oodou mee e hai,
aagai go de ino donu huu gi lalo madali gilaadeu gu noonoodia,
aabe go de baakuu madali de gau maakau.
Gai mee nei alodahi tee maua donu i de hagahelui dono lili,
gai dono lima goi hagaabo donu huu.
De hagaduasala o Assyria
5 E vakaa naa Assyria, de laagau aagu ne hagahai hegau i dogu lili,
dono lima go togo aagu ne hagahai hegau i dogu bole.*Isa 14.24-27; Nah 1.1—3.19; Zep 2.13-15
6 Au ne hai ia gi hano gi hai baasi ange gi dahi huaahenua baubau,
au ne kave ia gi hai baasi ange gi dahi huaadangada oogu e lili ai laa,
ma de hai gi de mahi gilaadeu ga kave olaadeu goloa,
aama de dagadagahi gilaadeu bei denga bela i honga denga haiava.
7 Aagai e dee deenei dana hagasaele,
e dee deenei hogi dana mee ne maanadu;
aagai ia ne hagatau de oha,
ma de hagadee kii denga huaahenua soa.
8 Ia ne hagadaba, “E aha, ogu dagi alodahi e dee ni hodooligi?
9 Calno tee bei laa dagodo o Carchemish?
Hamath tee bei laa dagodo o Arpad?
Gai Samaria tee bei laa dagodo o Damascus?
10 Au ne hagadee kii denga nohoanga hodooligi e daumaha ange laa gi denga diinonga;
olaadeu diinonga e maolunga ange i diinonga o Jerusalem ma Samaria —
11 e aha, au e dee hai naa hogi Jerusalem ma ono diinonga
bei dagu hai ne hai ai laa Samaria ma ono diinonga?”
12 Deelaa ai, de masavaa naa huu a de Ia Aamua e hagalava ai ana hagatau alodahi ange gi de mounga go Zion ma Jerusalem, gai ia e hagadaba naa, “Au e hagaduasala naa de hodooligi o Assyria, i hiidinga dono lodo maolunga ma luoono mada hagamaolunga. 13 Go hiidinga ia ne hagadaba,
‘Au ne maua i de hai mee nei i ogu mahi donu ma dogu iloo mee,
go hiidinga de dahi ogu donu ange.
Au ne aau gee goinga o denga huaadangada,
ma de kave olaadeu goloa hagamogomogo;
au ne hagadee kii gilaadeu e nnoho i kilaa
bei dagodo hegau a dahi kaau daane.
14 Au gu haalo naa dogu lima
e kave ai de lava o denga huaadangada;
bei dagodo o tangada e hagabudulia denga ngago gu tili laa,
gai au e hagabuni mai naa henua alodahi;
gai e deai naa donu se bakau e gabagaba,
aabe se manu e hhanga dono ngudu e goo.’ ”
15 E aha, e maua e taguu i de hagadaba, bolo ia e kii ange i tangada e hagaabo ina,
aabe go ssoaa i de hagadaba bolo ia e kii ange i tangada e soaa ina mee?
E dagodo be go dahi laagau e hagaabo ina tangada e daohia age,
aabe go de laagau e daohia age tangada e dee se laagau laa!
16 Deenei ai, de Ia Aamua, Tagi o denga hagabuulinga hebagi,
e hai naa gi mmagi ono daane hebagi mmahi,
gai dono hagadubu e haula naa i de ahi ula.
17 De Maalama o Israel e hai naa ga se ahi,
de Ia Dabu o Israel se ahi ula;
gai e dudu naa ga deai manu daladala
ma manu duiduia i dahi laangi donu huu.
18 De mahamaha o lodo henua i kilaa ma de gelegele e ssomo ai manu
e oha naa donu ga odi,
bei tangada magi e hagadaga iho laa.
19 Gai denga manu ssomo e doe i de lodo henua e sogoisi naa;
gai tamaa gauligi e maua i de sisi ga daohi.
De aahe mai o dangada o Israel e doe
20 De laangi laa gai dangada o Israel e doe,
ma gilaadeu ne ola i dangada o Jacob
e dee tali hagalodolodo ange naa gi de ia
ne oohaa laa delaadeu henua;
aagai gilaadeu e hai naa Tagi Maolunga,
de Ia Dabu o Israel, go delaadeu tali, i de heohi.
21 Dangada e doe e aahe mai naa,
dangada o Jacob e doe e aahe mai naa gi de Maadua Mmahi.
22 Israel, e dee galemu naa donu de soa oo dangada
bei de lagolago gelegele i gabugabu tai,
gai e sogoisi naa donu huu e aahe mai.
Gai gu lava donu i de hagamodu i de heohi, bolo e daa gilaadeu gi maakau.*Rom 9.27
23 De Ia Aamua, Tagi o denga hagabuulinga hebagi,
e hagasula ina de oha de henua alodahi gu tala laa.
24 Deenei ai, e hagadaba de Ia Aamua, Tagi o denga hagabuulinga hebagi: “Ogu dangada e nnoho laa i Zion, goodou aude maatagu i de gau Assyria, e hagailiilihia laa goodou i de laagau, ma de hagaabo de laagau ga daa ai goodou, bei hegau a de gau Egypt. 25 E dee mmule naa donu gai gu helui dogu lili i goodou, gai dogu bole gu daa gilaadeu gi maakau. 26 Gai Tagi o denga hagabuulinga hebagi e hagailiili naa gilaadeu i taula, bei dana hai ne hai ai de gau Midian i de baba o Oreb; gai ia e hagaabo ange naa dono dogo gi honga de vai, bei ana hegau ne hai laa i Egypt.*Jdg 7.25 27 De laangi laa gai dana mee e hagauda adu gi oodou eu e aau gee naa, gai dana laagau hagahai hegau e hagauda adu e hadi naa, i hiidinga goodou gu pedi.” *i hiidinga goodou gu pedi: muna Hebrew i kinei e dee iloo danuaa dono hagadoonunga.
28 Denga daane hebagi gu tae gi Aiath,
gilaadeu gu hulo ma gu ui i Migron;
gilaadeu gu dugu olaadeu goloa i Mikmash.
29 Gilaadeu gu hulo laa lo te mommee gelo,
gilaadeu e nnoho naa i Geba i de boo.
Ramah gu bolebole,
Gibeah o Saul gu savini ma gu hano.
30 Dangada i Gallim, goodou tangi!
Laishah, goodou hagalaangona!
Dangada o Anathoth, goodou pasa ange!
31 Madmenah gu saavini ma gu hano;
dangada o Gebim gu hulo ma gu mmuni.
32 Anailaa nei gai ia e nnoho naa i Nob,
ia e tugi ange naa dono lima gi tamaa hine o Zion,
i de mounga o Jerusalem.
33 Tilo, de Ia Aamua, Tagi o denga hagabuulinga hebagi
e duuduu iho naa denga laa mmahi ga baakuu.
Gai manu lloa e sele iho naa,
gai gilaadeu e lodo maolunga e hai naa ga maolalo.
34 Ia e sele naa denga manu ssomo i lodo mee muimui i taguu;
denga manu lloa o Lebanon e sele iho naa donu.