1 Tangada heohi gu magau,

gai e deai donu dangada e anga ange aagena;

dangada e haia de mee abodonu gu gaavee gee,

gai e deai donu dangada e iloo.

Go hiidinga tangada heohi ne gaavee gee

e hagaola mai ai ia i de baubau.

2 Dangada e hai hegau laa i de heohi

e ulu naa ga kave de baba;

gilaadeu e mmabu naa i delaadeu maakau.

3 Aagai goodou — dama a de hine e haia gi loage hagasaalunga, loomai kinei,

goodou hagadiilinga o denga haahine dagodo haisala ma de hai be se manu!

4 Goai oodou e hakadanga ai naa?

Gai goai oodou e hagangadi mee naa

ma de hagassomo ange oodou alelo aagena?

E aha, e dee go goodou dama a de gau hagamaanege,

ma hagadiilinga a de gau hadu muna?

5 Goodou e llodo mmao e hai be ni manu

i magavaa o denga oak ma manu ssomo nnui alodahi;

goodou e sigidaumaha oodou dama i lodo geelonga

ma lalo hadu i gaogao mounga.

6 Denga hadu malali i lodo geelonga go oodou diinonga;

go gilaadeu, go gilaadeu oodou duuhanga.

Goodou e llingi ange aagena ssigidaumaha o mee unu,

ma de sigidaumaha ange denga grain gi gilaadeu.

Gai e maua e mee nei i de hagahelui ogu lodo?

7 Goodou e dagodo haisala i ulu mounga ma honga duuduu,

ma de hulo gi kilaa e hai ai oodou sigidaumaha.

8 Goodou gu maaga ange hagailonga o oodou diinonga

gi oodou abaaba ma laagau i luu baasi oodou haitoga.

Goodou gu huuhuli gee i de au,

goodou gu aau malo e haoli ai oodou moenga,

ma gu kage gi honga oodou moenga

ma de hai gi kii ange de lahalaha,

e dagodo haisala ai i mada i mua o oodou diinonga;

goodou e gidee naa delaadeu gilisau.

9 Goodou ne hulo gi daho Molek*Molek, aabe go de hodooligi. ma denga lolo olive

ma de hai gi lagolago oodou vai hagamaanongi.

Goodou ne hai gi hulo oodou dangada sui gi tae gi denga mommee mmao,

ma de hai gi loiho hanu gi tae gi de mommee o de gau maakau.

10 Goodou gu daalea i oodou haingaa mee alodahi,

aagai goodou tee hagataba, “E deai donu haigamaiana.”

Gai oodou mahi ne aahe mai hogi gi goodou,

deelaa ai, goodou tee daalea.

11 Goai oodou ne manavasaa ma de maatagu ai,

gai goodou ga hadu muna mai ai gi de au,

goodou tee manadua donu au,

aabe ne manadua au i oodou lodo?

E dee go hiidinga gu daulooloa dagu golomagi ogu lodo,

gai goodou ga dee maatagu ai i de au?

12 Au e tala naa dagodo o oodou heohi ma oodou hegau,

gai mee nei e deai naa donu haigamaiana adu gi goodou.

13 Gai de masavaa oodou e dangidangi ai i de bale,

gai oodou hagabuulingaa diinonga gi hagaola ina goodou!

De madangi e ili naa gilaadeu alodahi ga kave gee,

gai se damaa madangi naa donu huu e ilihia gilaadeu ga gaavee gee.

Aagai tangada e buibui i ogu daha e henua naa i de henua,

ma de kave dogu mounga dabu.

“Hagaduulia age, hagaduulia age, hagadabena ina de haiava!

Aaua gee mee e buibuia de haiava o ogu dangada.”

15 E hagadaba de Ia Maolunga Mmao go de Ia Aamua —

go de ia e mouli ga hano ai, gai dono ingoo e dabu:

“Au e noho i de mommee maolunga ma de dabu,

aagai au e noho hogi i daho tangada

e dahuli ono lodo ma de lodo maolalo,

gai au ga hagamouli de hagasaalunga o tangada lodo maolalo

aama de hagammahi lodo o dangada gu daahuli olaadeu lodo.

16 Au e dee hagabaubau donu ga hano ai,

aabe e lili i masavaa alodahi,

kana haia e au ga baageaa lodo o tangada —

go de hagasaalunga o tangada aagu ne hai.

17 Au ne lili i hiidinga dono nnoo hagamau mee;

gai au e hagaduasala naa ia, ma de haoli luoogu mada i dogu lili,

aagai ia ne duudagi donu huu de hai ono lodo.

18 Au gu gidee donu ana haingaa mee, aagai au e hagaieiangi naa donu ia,

au e dagi naa ia ma de hagaaneane ia,

aama ono dangada e hinangalosaa,

19 ma de hai gilaadeu e hinangalosaa i Israel gi duuhia.

De noho baba, de noho baba,

ange gi gilaadeu e mmao, ma gilaadeu e paa mai,

Gai au e hagaieiangi naa gilaadeu.*Eph 2.17

20 Aagai de gau baubau e bei dagodo o honga tai beabeau;

e dee maua laa gi malino,

gai ono beau e maga age bela ma gelegele.”

21 E hagadaba dogu Maadua,

“E deai donu se noho paba o de gau baubau.” *Isa 48.22