59
De haisala, de tala haisala, ma de hagaola
1 Tilo, de lima o Tagi Maolunga e dee bodobodo, gu dee maua i de hagaola,
aabe luoono dalinga gu longoduli gu dee langona.
2 Aagai oodou baubau gu vvae gee goodou mai i doodou Maadua;
oodou haisala gu haoli luoono mada i goodou,
deelaa ai, ia gu dee langona oodou dalodalo.
3 Oodou lima gu hai ma gu hakino gee i denga dodo,
gai oodou madannia gu hai goodou ma gu haisala.
Oodou ngudu gu tala muna hhadu,
gai oodou alelo gu musumusu denga mee baubau.
4 Gu deai donu dangada e daalaa de muna abodonu i de masavaa hagamodu muna
e deai hogi e gaavange tangada gi de hainga i de muna abodonu.
Dangada alodahi gu hagadonu alaadeu ngadi muna
e hagadaumee ai ma alaadeu muna hadu;
gilaadeu e hagahale denga hai ngadaa, ma de hai gi sula de baubau.
5 Gilaadeu e hagamaasae ngago a denga labodo hagammau;
ma de hai de hale o de neveneve.
Be goai e gaina alaadeu ngago e magau donu,
gai noo dahi alaadeu ngago e mahaa, gai dahi labodo hagammau gu maasae.
6 Alaadeu hale neveneve e dee maua i de hai ai malo;
gai alaadeu hegau e dee maua i de buibui gilaadeu.
Gai alaadeu hegau e baubau,
gai alaadeu mee e hai go de vaivai hai dangada.
7 Gilaadeu e moolau donu delaadeu hai de baubau,
gai e moolau hogi delaadeu daa dangada ga magau.
Gai maanadu i olaadeu lodo e baubau;
gai mee gu maoha ma de oohaa e gidee i haiava olaadeu e seesee ai.*Rom 3.15-17
8 Gilaadeu e dee tonu ange gi dagodo o de nnoho baba,
gilaadeu e dee hai hegau donu i de heohi.
Gilaadeu gu hai olaadeu haiava gi pigo;
gai dangada e seesee i lodo haiava nei e dee tonu ange gi dagodo o de noho baba.
9 Deelaa ai, de hagamodu muna heohi e mmao gee donu i gidaadeu,
gai de heohi e dee dae ange donu gi gimaadeu.
Gimaadeu e tali gi maalama, aagai e gohu donu huu;
gimaadeu ne tali gi hagamaalama,
aagai gimaadeu e seesee i de malu o de gohu.
10 Gimaadeu e haahaa saele i gaogao de buibui bei dagodo o de gau dee kide,
gimaadeu e haahaa saele bei dagodo o dangada e deai olaadeu ganomada.
Gimaadeu e baakuu saele i lo te laangi e dagodo be gu dai gohugohu de mee;
gimaadeu e bei dagodo o de gau maakau i magavaa o denga daane mmahi.
11 Gimaadeu alodahi e hagangolo bei denga bea,
gai e gonogono bei denga manu kono.
Gimaadeu ne ssala de hagamodu muna heohi, aagai gimaadeu tee gidee,
gimaadeu e tali de hagaola, aagai e mmao gee donu i gimaadeu.
12 Go hiidinga omaadeu baubau i mada luoo mada e lagolago mmao,
omaadeu haisala gu hagabaubau donu gi gimaadeu.
Omaadeu baubau e daakodo donu i omaadeu daha,
gai gimaadeu e iloo donu omaadeu baubau.
13 Gimaadeu ne hagamaanege ma de hagadee iloo Tagi Maolunga,
gimaadeu ne daahuli gee i demaadeu Maadua;
gimaadeu ne hai denga hagatau hagadaemaha ma de hai baasi,
gimaadeu e tala muna hhadu ne loage laa i omaadeu lodo.
14 Gai de hagamodu muna heohi gu buibuia,
de heohi gu mmao gee;
gai mee abodonu gu dee gidee i denga aduhale,
gai de muna abodonu gu dee gidee hogi.
15 Gai gu deai donu se muna abodonu e gidee i kilaa;
gai tangada e kino laa i de baubau e vaivai haia.
Gai Tagi Maolunga tee malangilangi i dana gidee
bolo gu deai se hagamodu muna heohi.
16 Ia ne gidee bolo gu deai donu se dangada daudahi,
gai gu lele ono mouli i teai se dangada e balea;
gai ia ga hagahai hegau dono lima sauaa e hagaola ina,
gai go dono heohi ne gaavange gi de ia de kii.*Isa 63.5
17 Ia e dau de heohi bei de mee dau i hadahada
ma de hagauda de goobai baalanga o de hagaola i honga dono biho;
gai e gahu i malo e sui ange ai i de hagaduasala,
ma de saabini ia i de lodo mmahi bei de malo laa daha.*Eph 6.14, 17; 1 Th 5.8
18 Gai ia e hagao ange naa gilaadeu gi bei alaadeu hegau,
ma de bole ange gi ono hagadaumee,
ma de hagao ange hegau a dangada e kino i de ia;
gai ia e sui ange naa hegau a dangada e nnoho i tagudai.
19 Gai dangada i baasi dai e maatagu naa i de ingoo o Tagi Maolunga,
dangada e hagadubu naa dono mahamaha mai i de sobo age o de laa.
Gai ia e humai naa bei denga vai nogo bonodia laa,
gai de madangi o de manava a Tagi Maolunga e ili ga kave gee.
20 “De Ia Hagaola e humai naa gi Zion,
gi daho dangada o Jacob gu daahuli gee laa i olaadeu haisala,” *Rom 11.26
go Tagi Maolunga e hagadaba.
21 Gai e hagadaba Tagi Maolunga, “Deenei dagu hagatoo donu hagaheloongoi ange gi gilaadeu: dogu Hagasaalunga e noho naa i oo daha, ma agu muna gu hhao adu gi lo too ngudu, e dee hulo gee naa donu mai i lo too ngudu, ma mai i lodo ngudu o au dama, aama lodo ngudu olaadeu hagadiilinga, mai iainei ga hano ai,” go Tagi Maolunga e hagadaba.