5
Taahili a Deborah ma Barak
1 Gai Deborah ma Barak, tama daane a Abinoam ne daahili i de laangi laa, ga hagataba:
2 “Denga dagi ne dagi de gau Israel,
gai dangada ne malangilangi i de hulo gi de hebagi.
Duuhia Tagi Maolunga!
3 Denga hodooligi, goodou hagalaangona!
Denga dagi o de henua, goodou hagalaangona!
Gai au ga daahili ange gi Tagi Maolunga,
de Maadua o Israel.
4 Tagi Maolunga, de masavaa oou ne hano gee mai ai i Seir,
de masavaa oou ne seesee mai ai i de henua o Edom,
gai de henua ne ngalungalue, de langi gu pala,
uaa, denga hagausinga ne llingi iho denga vai.
5 Denga mounga gu ngalungaalue
i mada luu mada o Tagi Maolunga,
Sinai gu ngalungalue hogi
i mada luu mada o Tagi Maolunga,
de Maadua o Israel.*Exo 19.18
6 De masavaa o Shamgar, tama daane a Anath,
ma de masavaa o Jael,
gai gu deai e seesee i denga haiava nnui;
dangada gu seesee saele i denga dao haiava.
7 Denga aduhale o Israel gu ngadi daakodo,
gu ngadi daakodo ga dae ai gi dogu dae mai,
au go Deborah, ga hai ai tinana o Israel.
8 De masavaa ne hili ange ai denga maadua hoou,
gai de hebagi gu dae mai gi de henua.
Gu deai mee hungihungi be se dao e gidee
i daho e haasemada daane hebagi o Israel.
9 Au gu maanadu dagi o denga daane hebagi o Israel,
mai i magavaa o dangada ne malangilangi laa i de hulo i de hebagi.
Duuhia Tagi Maolunga!
10 Goodou e kage i honga donkey tea,
ma de nnoho i honga blanket e hola i honga manu nei,
aama goodou e seesee i de haiava,
e tala dagodo o 11 leo o de gau daahili
i de mommee e asu ai vai;
e tala dagodo de heohi ma de kii o Tagi Maolunga,
ma de kii o ono dangada i aduhale vaaligiligi i Israel.
Dangada o Tagi Maolunga e daga iho
ma e hulo gi denga haitoga o de aduhale.
12 Deborah, alahage, alahage!
Alahage, alahage, mage daahili!
Barak, tama daane a Abinoam,
hidi age, dagina gaavee au dangada ne hagadee kii.
13 Gai de gau aamua e doe gu daga iho hogi;
dangada o Tagi Maolunga gu daga iho gi ono daha
e hebagi ange gi denga daane hebagi mmahi.
14 Gilaadeu ne loomai i Ephraim, olaadeu maadua ni dangada Amalek;
gai Benjamin madali gilaadeu ne daudali adu i de goe.
Dagi o de hebagi ne daga mai i Makir,
gai denga dagi ne daga mai i de vaaenga o Zebulun.
15 Dagi o de henua o Issachar ne loomai madali Deborah,
uaa, daane o Issachar ne loomai hogi madali Barak;
gilaadeu ne daudali ange i de ia ga loiho ai gi lo te geelonga.
Denga hagabuulinga o Reuben tee buni
alaadeu hagasaele be se aha alaadeu e hai.
16 Gu aha gu nnoho ai goodou i magavaa o denga buibui ssiibi,
e hagallongo ai de koo o denga ssiibi?
De vaaenga o de aamuli o Reuben
tee maua i de hagasaele delaadeu mee e hai.
17 Dangada o Gilead ne noho donu huu i baasi dua o Jordan;
gai de aamuli o Dan, gu aha goodou gu nnoho ai naa donu huu i honga tai?
De aamuli o Asher goi nnoho donu huu i tagudai,
ma de nnoho i gaogao denga daulanga.
18 Dangada o Zebulun ma Naphtali
tee anga ange donu gi delaadeu maakau;
i honga duuduu ne hai ai de hebagi.
19 Denga hodooligi ne loomai, gilaadeu ne hebagi;
denga hodooligi o Canaan ne hebagi,
i Taanak, i gaogao vai o Megiddo;
aagai teai alaadeu selevaa ne mau.
20 Denga heduu i de langi ne hebagi ange gi Sisera
i olaadeu mommee i lo te langi.
21 De vai mmilo o Kishon ne kave gee gilaadeu,
go de mee mmilo o de vai duai go Kishon.
Dogu hagasaalunga, hagammahi seesee hannoo!
22 Denga hoosa e hagasaamumu i delaadeu saavini mai,
ma de saavini ga hagabagobago olaadeu vae.
23 E hagadaba tangada de langi o Tagi Maolunga,
‘Meroz gi kona de hagamalaia o dangada e nnoho i kilaa,
go hiidinga gilaadeu tee loomai e bale ange Tagi Maolunga,
e bale ange Tagi Maolunga e hebagi ange ai gi de gau mmahi.’
24 Jael, de bodu o Heber, taane Ken,
e manuuia ange i denga haahine alodahi,
i denga haahine e nnoho i lodo hale malo.
25 Sisera ne dangidangi ange i hanu vai unu,
Jael ne gaamai gi de ia hanu vai uu,
ia ne gaamai hogi hanu vai uu haduhadu
i lo te boolo mahamaha.
26 Ia ne poo dahi laagau hagamakaga o de hale malo,
gai dono lima madau ne poo ai dahi haamaa;
ia ne tugi honga de lae o Sisera gu bala,
ia ne velo honga dono lae ga sao gi tua dono biho.
27 Sisera ne baguu, ia ne baguu gi lalo,
ga dagodo i gaogao luoono vae ga dee ngalue ai;
ia ne baguu i gaogao luoono vae, ia ne baguu gi lalo;
ia ne baguu gi lalo, gu magau ga dagodo ai.
28 Tinana o Sisera ne hagaduidui adu
i magavaa denga laagau masaavava, ma de dangi,
‘Gu aha gu mmule mai ai nei dono hada hebagi?
Gu aha gu daulooloa ai nei tee saamumu mai
denga hoosa e daangia ono hada hebagi?’
29 Ono haahine heiangi ne hai ange gi de ia,
gai ia ne basa iho donu huu gi de ia,
30 ‘E aha, gilaadeu tee gidee laa
ma de vaevae goloa ne maua i de hebagi?
E dahi daane hebagi e dahi aabe e dogolua ana damaa hine;
Sisera ne kave malo iai hagadaagangaa leebunga,
ma malo gu maaga e dau ange gi dogu ua —
mee nei alodahi e dee ni mee ne maua i de hebagi?’
31 Tagi Maolunga,
oo hagadaumee alodahi gu odi i de maakau!
Aagai oo soa alodahi gi bei dagodo de mmahi o de laa
i dono masavaa e sobo age ai.”
Gai de henua ne nnoho paba i e madahaa ngadau.