15
De lili o Tagi Maolunga i Judah
1 Gai Tagi Maolunga ne hai mai gi de au, “E dee galemu naa donu de tuu o Moses ma Samuel i ogu mada i mua, gai au e dee anga ange naa donu gi de huaadangada nei. Haia gilaadeu gi hulo gee mai i ogu daha! Gilaadeu gi hulo donu!*Exo 32.11-14; Num 14.13-19; 1 Sa 7.5-9 2 Gai noo gilaadeu e ssili adu, ‘Go hee omaadeu e hulo aagena?’ gai koe ga hai ange, ‘E hagadaba Tagi Maolunga:
Gilaadeu gu hagababa ange e maakau, e maakau;
gilaadeu gu hagababa ange gi de gadilaasa,
e daia i de gadilaasa;
gilaadeu gu hagababa ange gi de onge,
e maakau i de onge;
gilaadeu gu hagababa e kave gi dahi henua gee,
e gaavee gi dahi henua gee.’ *Rev 13.10
3 Au e hai naa gi loomai e haa hagadaagangaa mee oha gi gilaadeu, go Tagi Maolunga e hagadaba: de gadilaasa e daa ga maakau dangada, ma denga gaaduu e dada dangada ga gaavee, aama manu llele ma manu lodo henua e gai laa ma de daa gilaadeu. 4 Gai au e hai naa denga nohoanga hodooligi alodahi o henua i lalo gi maatagu i olaadeu dagodo, i hiidinga hegau a Manasseh tama daane a Hezekiah, de hodooligi o Judah ne hai i Jerusalem.*2 Ki 21.1-16; 2 Ch 33.1-9
5 Jerusalem, goai naa e aloha adu gi de goe,
gai goai naa e dangi i oo hiidinga?
Gai goai naa e humai e siilia be aahee oo dagodo?
6 Koe ne tili au,
go Tagi Maolunga e hagadaba;
koe tee modu de ahe dua.
Deelaa ai, au e hagaabo naa dogu lima e hagaduasala ai goe;
au gu dalea i de golomagi ogu lodo.
7 Au e nonu naa gilaadeu bei de hai e hili ai laa denga grain i de poogo laagau,
i gaogao denga haitoga o de henua.
Au e hai naa gilaadeu gi hinangalosaa i alaadeu dama,
ma de daa gi maakau ogu dangada;
go hiidinga gilaadeu tigi sui donu i olaadeu dagodo.
8 Au e hai naa gi kii ange de soa haahine gu maakau olaadeu bodu,
i denga gelegele i gabugabu tai.
Au e gaamai tangada daa dangada
gi hai baasi ange gi dinana o alaadeu dama daane
i de madohi lua o de laangi.
Au e daa hagalele naa donu huu dagu hai gi duu ange gi gilaadeu
de mee hagamanavasaa ma de hagamaatagu.
9 Tinana ne hanaua e dogohidu dama e baageaa naa
ga hai ana manava hagaodi.
De laa o dono mouli e danu naa donu huu i lo te laangi;
ia e hagadogaa ma de hagangadi mee ina.
Gai au e daa naa gi maakau dangada e doe i de gadilaasa,
i mada i mua o olaadeu hagadaumee,”
go Tagi Maolunga e hagadaba.
De nanu o Jeremiah
10 Gu hagaaloha ogu dagodo, dogu dinana,
mee naa koe tee haanau donu au,
au se daane e hai baasi ma de hagadaumee ange de henua aagena!
Au tee gaavange sseene e sui aabe gu kave sseene e sui,
gai dangada alodahi e pasa baubau i de au.
11 E hagadaba Tagi Maolunga,
“Ni muna abodonu, au e hagaola naa goe ange gi dahi hagatau danuaa;
ni muna abodonu, au e hai naa oo hagadaumee gi dangidangi adu gi de goe
i denga masavaa hagamanavasaa ma masavaa hai ngadaa.
12 E aha, e maua e tangada i de hhadi de iron,
go iron mai i henua i ngaiho ma bronze?
13 Oodou lava ma oodou goloa hagamogomogo
au e hai naa gi ni mee e maua i de hebagi, gai e dee hagao,
i hiidinga oodou haisala
gu hagahonu doodou henua alodahi.
14 Au e hai naa goodou gi hai hegau ange gi oodou hagadaumee
i dahi henua oodou e dee iloo,
gai dogu lili e bei naa de ahi mmahi
e ula laa ga hai baasi adu ai gi goodou.”
15 Tagi Maolunga, koe e iloo mee alodahi,
manadua mai au ma de bale mai au,
suuia ange hegau a dangada ne hagaduasala ina dogu mouli.
Koe e golomagi mmao oo lodo — koe gi dee gaavee gee au;
manadua dogu hagangadi mee ina i hiidinga o doo ingoo.
16 De masavaa aagu ne gidee ai au muna, gai au ne gai au muna;
au e malangilangi i au muna ma de lodo danuaa ai,
go hiidinga au gu kave doo ingoo,
Iahweh, de Maadua o denga hagabuulinga hebagi.
17 Au tee noho madali de gau doo mee,
aabe ne malangilangi madali gilaadeu;
au ne noho sogosogo, go hiidinga doo lima ne daohi au,
gai koe gu hai gi kona dogu lili.
18 Gu aha gu dee maua ai nei gi ui dogu mmae,
gai ogu maanuga gu kona mmao, gu dee maua gi mmahu?
Koe gu bei dahi ngadi saalingaa vai,
ma de vai gu dee sali laa.
19 Deenei ai, e hagadaba Tagi Maolunga:
“Noo koe e dahuli oo lodo, gai au e hagaahe mai donu goe,
gai koe ga hai hegau mai ai gi de au.
Gai noo koe e tala muna haigamaiana,
e dee go muna e deai haigamaiana,
gai koe e hai naa go tangada e daalaa agu muna.
De huaadangada nei gi aahe mai gi de goe,
aagai koe e dee ahe ange gi gilaadeu.
20 Au e hai naa goe gi bei de bae makaga ange gi de huaadangada nei,
gai se bae bronze makaga;
gilaadeu e hebagi adu naa gi de goe
aagai gilaadeu e dee maua gi kii i de goe,
go hiidinga au madali goe
e buibui ma de hagaola goe,
go Tagi Maolunga e hagadaba.
21 Au e hagaola naa goe mai i de gau baubau
ma de hagaola goe mai i de gau alasala.”