27
De hagauda a Jeremiah de laagau hagahai hegau
1 Taamada de hodooligi o Zedekiah*Zedekiah: hanu beebaa Hebrew ange laa e hai ange Jehoiakim. tama daane a Josiah, de hodooligi o Judah, gai Tagi Maolunga ne hagaago ange ana muna gi Jeremiah.*2 Ki 24.18-20; 2 Ch 36.11-13 2 Gai Tagi Maolunga ne hai mai gi de au, “Haia dahi laagau hagahai hegau i daula ma hanu laagau lui ga hagauda ange gi luu baasi doo ua. 3 Gai koe ga aalu ga hai ange gi de gau sui o de hodooligi o Edom, ma de hodooligi o Moab, ma de hodooligi o Ammon, ma de hodooligi o Tyre aama de hodooligi o Sidon, gu loomai mai laa gi Jerusalem i daho Zedekiah, de hodooligi o Judah. 4 Gai koe haia gilaadeu gi daalaa ange gi olaadeu dangada aamua, ‘E hagadaba Tagi o denga hagabuulinga hebagi, de Maadua o Israel: Aanei oodou muna e tala ange gi oodou dangada aamua: 5 Go au ne haalo ina dogu lima sauaa, ga hai ai henua i lalo, ma ono dangada aama manu dolodolo e nnoho ai, gai go au hogi ne gaavange mee nei gi tangada aagu e lodo e vange aagena. 6 Gai au gu gaavange denga henua nei alodahi gi dogu dangada hai hegau go Nebuchadnezzar, go de hodooligi o Babylon gi hodooligi ai; gai au gu hai hogi denga manu dolodolo gi hai hegau ange gi de ia. 7 Gai denga huaahenua alodahi e hai hegau ange naa gi de ia, ma dana dama daane, aama dono mogobuna, ga dae gi de odi de masavaa o dono henua. Gai muli mai naa huu gai denga huaahenua soa ma hodooligi mmahi e hai ia gi hai hegau ange gi gilaadeu.
8 Gai noo dahi huaahenua be se nohoanga hodooligi e dee hai hegau ange gi Nebuchadnezzar, de hodooligi o Babylon, aabe e dee nnoho i lalo dono sauaa, gai au e hagaduasala naa de huaahenua laa i de gadilaasa, ma de onge, aama de mee hagamaakau, go Tagi Maolunga e hagadaba, ga dae ai gi dagu hai ia gi oohaa de huaahenua laa alodahi. 9 Gai goodou e dee hagallongo muna a oodou pelaabisi, ma oodou dangada e daalaa mee e dee iloo, ma oodou dangada hagadonu midi, ma oodou hilohilo ma eidu, aama oodou dangada e haia gi loage denga hagasaalunga e tala adu laa gi goodou, “Goodou e dee hai hegau ange naa donu gi de hodooligi o Babylon.” 10 Gilaadeu e pasa pelaabisi naa ga hadu muna adu ai gi goodou, ga hidi mai ai doodou noodia ga gaavee gee mai i doodou henua. Gai au e hai naa goodou gi hulo gi denga henua gee gi maakau ai. 11 Aagai au e dugu naa de huaahenua e nnoho i lalo o de hodooligi o Babylon ga hai hegau ange gi de ia, gi nnoho i delaadeu henua, gai gilaadeu ga doo de gelegele ga nnoho ai, go Tagi Maolunga e hagadaba.’ ”
12 Au ne tala ange hogi muna nei gi Zedekiah, de hodooligi o Judah, ma gu hai ange, “Koe gi noho i lalo ssauaa o de hodooligi o Babylon, ga hai hegau ange ai gi de ia ma ono dangada, gi mouli ai goe! 13 Gai ni haigamaiana aha doodou maakau ma oo dangada i de gadilaasa, ma de onge aama de mee hagamaakau, a Tagi Maolunga gu hagamodu laa, e hai ange gi denga huaahenua e dee hai hegau ange gi de hodooligi o Babylon? 14 Goodou aude hagalaangona muna a denga pelaabisi e hai adu naa, ‘Goodou e dee hai hegau ange naa donu gi de hodooligi o Babylon.’ Go hiidinga gilaadeu e hadu muna adu gi goodou. 15 ‘E dee go au ne haia gilaadeu gi loadu, go Tagi Maolunga e hagadaba, aagai gilaadeu e hadu muna, i delaadeu pasa pelaabisi i dogu ingoo. Deenei ai, au e alualu naa goodou gi hulo gee, gi maakau ai goodou, go goodou ma denga pelaabisi hadu muna, e pasa pelaabisi adu naa gi goodou.’ ”
16 Gai au ne basa ange gi de gau haimeedabu, ma de hagabuulingaa dangada laa, ga hai ange, “E hagadaba Tagi Maolunga: Goodou aude daudali i muna a denga pelaabisi e tala adu gi goodou bolo goloa o de hale o Tagi Maolunga gu dai hagaahe mai naa i Babylon, go hiidinga gilaadeu ni pelaabisi hadu muna. 17 Goodou aude hagallongo ange gi gilaadeu; gai goodou nnoho i lalo o de hodooligi o Babylon gi dee maakau ai goodou. Gai ni haigamaiana aha de hai de oha de aduhale nei? 18 Noo gilaadeu ni pelaabisi abodonu, gai noo muna a Tagi Maolunga e daakodo i olaadeu daha, gai gilaadeu gi dangidangi ange gi Tagi o denga hagabuulinga hebagi gi dee gaavee ai gi Babylon goloa e doe i de hale o Tagi Maolunga, ma de hale o de hodooligi o Judah aama Jerusalem. 19 Gai e hagadaba Tagi o denga hagabuulinga hebagi i dagodo o denga duludulu, ma taaba e hhao ai laa vai, ma mee e dugu ange aagena, ma goloa alodahi e doe i de aduhale nei, 20 go goloa a Nebuchadnezzar, de hodooligi o Babylon tee kave laa i de masavaa aana ne kave gee ai Jehoiachin tama daane a Jehoiakim, de hodooligi o Judah i Jerusalem gi Babylon, ma de gau aamua alodahi o Judah ma Jerusalem — 21 aanei muna a Tagi o denga hagabuulinga hebagi, de Maadua o Israel ne tala i dagodo o denga goloa alodahi e doe i de hale o Tagi Maolunga, aama de hale o de hodooligi o Judah, aama Jerusalem: 22 ‘Mee nei e moolia naa donu ga gaavee gi Babylon ga dugu ai ga dae ai gi dagu aalu ga gaamai, go Tagi Maolunga e hagadaba. Gai au e hagaahe mai naa donu goloa laa gi de mommee nei.’ ”