31
1 “De masavaa laa, go Tagi Maolunga e hagadaba, gai au e hai naa go de Maadua o denga aamuli alodahi o Israel, gai gilaadeu e hai naa go ogu dangada.”
2 Gai e hagadaba Tagi Maolunga:
“Dangada ne ola mai i de gadilaasa
e maua naa de abodonu i lodo henua.”
De masavaa a Israel ne ssala ai dono hagamaabunga,
3 gai Tagi Maolunga ne hakide ange gi de ia*gi de ia: muna nei go lo te Beebaa Greek iai. De Beebaa Hebrew e hai ange gi de au. i de mommee mmao, ga hai mai,
“Dogu aloha i de goe e dee ngado donu,
deelaa ai, au ne duudagi de muna abodonu adu gi de goe.
4 De bua moe go Israel, au e hagaduu age naa goe,
gai koe e duu age naa donu!
Gai koe e hagadangidangi naa i dau tambourine
ma de anu ai i doo malangilangi.
5 Gai koe e ahe ange naa ga doo denga veelengaa grape
i honga denga duuduu o Samaria;
gai dangada e dooa denga veelengaa grape
e gai naa olaadeu hua.
6 Gai e dahi naa laangi a de gau dagitilo e oo ai
i honga mommee iai mounga o Ephraim, ga hagataba,
‘Loomai, gidaadeu ga loage gi Zion,
gi daho Tagi Maolunga, taadeu Maadua.’ ”
7 E hagadaba Tagi Maolunga:
“Goodou daahili ma de malangilangi i hiidinga o Jacob,
gai hevaalogi ange gi dagi o denga huaahenua.
Haia gi nngana oodou tuhi, ma de hagataba,
‘Tagi Maolunga, hagaola ina doo huaadangada,
go dangada o Israel e doe.’
8 Tilo, au e hagaahe mai naa gilaadeu i henua i ngaiho,
ma de hagabuni mai gilaadeu i luu bido o henua i lalo.
E hanu naa hogi dangada dee kide ma de gau balagelage i olaadeu magavaa,
ma denga haahine hai tama aama denga haahine gu hai olaadeu hagalangona;
dahi hagabuulingaa dangada soa e aahe mai naa gi kinei.
9 Gilaadeu e loomai naa ma de tangi;
gai gilaadeu e dalodalo mai naa
i de masavaa aagu e hagaahe mai ai gilaadeu.
Gai au e dagi mai naa gilaadeu i gaogao denga saalingaa vai,
ma de haiava ssoe gi dee baakuu ai gilaadeu,
i hiidinga go au tamana o Israel,
gai Ephraim go dagu dama daane madua.
10 Denga huaahenua, goodou hagalaangona muna a Tagi Maolunga,
gai hagadele ina i denga henua mmao:
‘De ia ne haia ga mavaevae saele Israel e hagabuni mai naa gilaadeu,
ma de tilo ange gilaadeu bei dagodo o tangada hagaloosi ssiibi.’
11 Gai Tagi Maolunga e hagaola naa Jacob,
mai i ssauaa o dangada e mmahi ange i gilaadeu.
12 Gai gilaadeu e daga mai naa ma de daahili i honga tuuduu o Zion;
gilaadeu e malangilangi naa i mee danuaa a Tagi Maolunga:
go denga grain, ma uvaini, ma lolo,
ma dama a de hagabuulingaa ssiibi ma guudi aama kaau.
Gilaadeu e bei naa de veelenga gu maluulu danuaa laa,
gai gilaadeu e dee daemaha ange naa donu.
13 Gai denga bua moe e aanu naa i de malangilangi,
madali denga dama daane aama de gau maatua hogi.
Au e hai naa gilaadeu gi dee tangi gai gi malangilangi;
au e hagaaneane naa olaadeu lodo
ma de hai gilaadeu gi malangilangi gu dee daemaha.
14 Au e hai naa gi boobosu de gau haimeedabu i gai lagolago,
gai ogu dangada e hoohonu naa i agu mee danuaa,”
go Tagi Maolunga e hagadaba.
15 E hagadaba Tagi Maolunga:
“Dangada e langona de leo o dahi i Ramah,
e dangi ma de dangi see.
Rachel e dangi i hiidinga o ana dama;
ia tee lodo gi hagaaneane ina ono lodo,
i hiidinga ana dama gu odi i de maakau.” *Gen 35.16-19; Mat 2.18
16 E hagadaba Tagi Maolunga,
“Duudia dau dangi gai sooloa oo loimada,
go hiidinga e dahi donu hagaoanga o au hegau,
go Tagi Maolunga e hagadaba.
Gai gilaadeu e aahe mai naa i de henua o de hagadaumee.
17 Gai e dahi donu oodou tali ange gi de masavaa e humai,
go Tagi Maolunga e hagadaba.
Oodou dama e aahe mai naa gi delaadeu henua donu.
18 Au gu langona de dangi o Ephraim:
‘Koe ne haele au bei dahi kaau gauligi tigi dala laa,
gai iainei gu hagalava dau haele au.
Hagaahea mai au, gai au e aahe mai naa donu,
i hiidinga go koe go Iahweh, dogu Maadua.
19 Dua dogu huli gee i de goe,
gai au ne dahuli ogu lodo;
dua dogu agoagona ga donu ange,
gai au ne hagailiili ogu hadahada ⌊i dogu daemaha⌋.
Au ne dogaa ma de hagadogaa ina,
i hiidinga o ogu baubau i de masavaa oogu e dama daane ai.’
20 E aha, e dee go Ephraim dagu dama daane hagamogomogo,
go tama oogu e malangilangi ai?
Gai dee galemu tee modu dogu hai baasi ange i agu muna,
aagai au e dee ngalo donu ia.
Deenei ai, au e buliaamou donu i de ia,
au e abodonu ange naa donu gi de ia,
go Tagi Maolunga e hagadaba.
21 Maaga ina doo haiava e seesee ai,
gai hagatuulia age hanu mee hagailonga e dagi ai goe;
diiloo gi danuaa de haiava laumalie,
ma de haiava oou ne humai ai.
De bua moe go Israel, ahe mai,
ahe mai gi oo aduhale.
22 Tamaa hine e dee hai hegau i de mee abodonu,
dee hee maa taulooloa doo lua lodo?
Tagi Maolunga gu hai dahi hegau hoou i henua i lalo —
dahi hahine e duuli naa dahi daane.”
23 Gai e hagadaba Tagi o denga hagabuulinga hebagi, de Maadua o Israel: “De masavaa naa huu aagu e hagaahe ange ai delaadeu manuuia, gai dangada i de henua o Judah ma ono aduhale e aahe ange naa ga tala muna nei:
‘De mommee nei, Tagi Maolunga e hagamanuuia goe,
de mommee nnoho iai de heohi, ma tuuduu dabu!’
24 Dangada e nnoho naa i Judah ma ono aduhale alodahi: de gau hai veelenga ma dangada e hulo saele madali alaadeu hagabuulingaa ssiibi. 25 Gai au e hai naa gi mmabu gilaadeu e daalea, ma de haangai gilaadeu gu deai olaadeu mahi.”
26 De masavaa laa gai au ne alahage ga galogalo saele, gai au ne seni danuaa donu.
27 “Tilo, e tae mai naa laangi, go Tagi Maolunga e hagadaba, aagu e hhao ai Israel ma Judah i hagadiilinga o dangada ma dama a denga manu. 28 Bei dagu hai ne tilo ai laa ga unuunusi age ma de oha gilaadeu, ma de hagadee kii, ma de daa ga maakau, ma de hagaduasala gilaadeu, gai au e tilo naa hogi ga hagatuu age ma de doo gilaadeu, go Tagi Maolunga e hagadaba. 29 Laangi laa gai dangada e dee hagataba naa:
‘Denga damana ne gai denga grape mmala,
gai niho o denga gauligi gu ssae.’ *Ezk 18.2
30 Aagai dahi ma dahi e magau donu i ono baubau donu: be goai e gaina grape mmala, ono niho e ssae naa.
31 Tilo, e tae mai naa laangi,
go Tagi Maolunga e hagadaba,
aagu e hai ai dahi hagatoo donu hagaheloongoi hoou
madali dangada o Israel ma dangada o Judah.*Mat 26.28; Mark 14.24; Luke 22.20; 1 Co 11.25; 2 Co 3.6 *Heb 8.8-12; 10.16-17
32 Gai e dee bei donu dagu hagatoo donu hagaheloongoi
ne hai madali olaadeu dubuna madagidagi,
i dagu laangi ne poo ai olaadeu lima
ga hagassao mai gilaadeu i de henua go Egypt,
go hiidinga gilaadeu ne oha dagu hagatoo donu hagaheloongoi,
e dee galemu donu go au delaadeu dangada aamua,
go Tagi Maolunga e hagadaba.
33 Gai deenei dagu hagatoo donu hagaheloongoi
e hai madali dangada o Israel i dua laangi laa,
go Tagi Maolunga e hagadaba.
Au e hai naa gi daakodo agu hainga i alaadeu maanadu,
ma de sisi ange gi olaadeu lodo.
Gai au e hai naa go delaadeu Maadua,
gai gilaadeu go ogu dangada.
34 Gai e deai naa donu se dangada e agoagona ange tangada e baa ange,
aabe go dono daina, ga hai ange,
‘Koe gi iloo Tagi Maolunga,’
go hiidinga gilaadeu alodahi e iloo naa donu au,
mai i de gauligi ga dae ai gi tangada madua,
go Tagi Maolunga e hagadaba,
go hiidinga au e degi ange naa gi olaadeu hegau baubau
gai au e dee ahe ange naa donu e manadua olaadeu haisala.”
35 E hagadaba Tagi Maolunga,
go de ia ne haia de laa
gi hagamaalama ina de laangi,
go de ia ne hagatau ina huulonga o de maasina ma denga heduu
gi hagamaalama ina ai de boo,
gai go de ia e hagangalungalue ina tai
gai ono beau gu haganguu —
dono ingoo go Tagi o denga hagabuulinga hebagi:
36 “Noo huulonga o mee nei gu llilo mai i mada luoogu mada,
go Tagi Maolunga e hagadaba,
gai hagadiilinga o Israel gu dee se huaahenua hogi
i mada luoogu mada ga hano ai.”
37 E hagadaba Tagi Maolunga:
“Noo e maua i de haide lo te langi i lunga,
gai noo denga dagelo o henua i lalo e odi i de gidee danuaa,
gai au e tili naa hagadiilinga alodahi o Israel
i hiidinga o mee alodahi alaadeu gu hai,”
go Tagi Maolunga e hagadaba.
38 E hagadaba Tagi Maolunga, “Tilo, e tae mai naa donu laangi e hagaahe age ai de aduhale o Tagi Maolunga, mai i de hale dagitilo o Hananel ga dae ai gi de Haitoga i Tege. 39 Gai de uga haide e dagi mai naa i kilaa ga hano ai gi tuuduu o Gareb, ma de hano ga dae gi Goah. 40 De geelonga alodahi iai laa angaanga o de gau maakau ma de tili ai denga lehu, ma denga veelenga ga dae ai gi ssaalingaa vai go Kidron, ga dae ai gi tege o de Haitoga o denga Hoosa i de baasi gi dua, e hagadabu ange naa gi Tagi Maolunga. Gai de mommee nei e dee ahe ange naa donu e unusi age aabe e oha ga hano ai.”