De Beebaa go
Job
Hanu dagodo o de beebaa nei
De Beebaa o Job e dee iloo danuaa de masavaa ne sisi ai, gai agu made mee e sisi ai ne hai i de masavaa o denga dubuna maatua o de gau Israel. De beebaa nei e sisi ai taalanga o dahi daane danuaa ne tuu ange laa aagena denga hai ngadaa nnui — ana dama alodahi ne maakau, ana mee alodahi ne odi i teai, gai ia ne hai dahi magi kona ma de hakino gee. De beebaa nei e sisi ai e dolu hagadau madaangudu, gai e hagaago mai ai de hai a Job ma ono soa e tonu ange ai gi denga hai ngadaa nei. De hagaodi o mee nei, gai de Maadua e hai hegau laa i magavaa o dangada, de ia e dagina denga madaangudu ne hakide ange gi a Job.
Soa o Job ne ssala de hiidinga o Job gu hagaduasala ai laa. Gilaadeu e maanadu bolo de Maadua e hagao ange tangada e haia tanuaa, aagai e hagaduasala tangada e haia de baubau, deelaa ai, gilaadeu e hagataba bolo a Job ne hagaduasala i hiidinga ia gu haisala. Job ne maanadu bolo ia se dangada hai hegau danuaa ma de heohi, deelaa ai, e dee heohi donu de kona dono hagaduasala. Job tee donu ange be gu aha de Maadua gu hai ai, gi kona de lagolago mee baubau e hai ange gi de ia. Ia ne hagadaumee ange donu gi de Maadua, aagai a Job tee tili donu dono gai, gai ia ne lodo e tala anga dono heohi gi de Maadua, ma de ahe ange e kave de hagadubu e gaavange laa gi tangada danuaa.
De Maadua tee basa ange donu gi muna ssili a Job, aagai ia ne basa ange gi a Job bei dagodo o dono gai, ma de hagaago ange gi a Job dagodo o dono sauaa ma dono heiangi, i hanu ada o mee o Job e donu ange laa aagena. Gai a Job ne hagamaolalo ga hagadaba, bolo de Maadua e heiangi gai e maolunga. Ia ne dahuli ono lodo ga tala bolo ia gu haisala, i hiidinga o muna baubau aana gu tala i dono lili.
Muna hagaodi e tala de hagaahe ange a de Maadua, de lava o Job ga bei ono dagodo i mua, gai ne kii ange donu de laumalie. Gai de Maadua ne hagasee soa o Job, i hiidinga gilaadeu tee tonu ange gi dagodo de hagaduasala o Job. Gai go Job donu huu ne donu ange, bolo de Maadua e maolunga ange i maanadu a dangada.
Dahi gubu hagamogomogo: “Gai Tagi Maolunga ne ssili ange gi Satan, ‘Koe gu gidee naa dagodo o dogu dangada hai hegau go Job? E deai ange donu se dangada e bei ono dagodo i henua i lalo; ia e dee haisala ma de heohi, gai e madagu i de Maadua, ma de kino i de baubau. Gai ia goi duudagi donu huu de hai hegau i de muna abodonu, e dee galemu donu koe gu hai au gi hai baasi ange gi de ia, ma de hagaduasala ia, gai e deai donu hiidinga’ ” (2.3).
Denga vaevaaenga
Muna i taamada (1.1—2.13)
Job ma ono soa (3.1—31.40)
a. De nanu o Job (3.1-26)
b. Tahi madaangudu (4.1—14.22)
c. De lua madaangudu (15.1—21.34)
d. Tolu madaangudu (22.1—27.23)
e. De tuhi dagodo o de heiangi (28.1-28)
f. Muna hagaodi a Job (29.1—31.40)
Muna a Elihu (32.1—37.24)
De basa ange o Tagi Maolunga gi a Job (38.1—42.6)
Muna hagaodi (42.7-17)
1
Dagodo o Job ma dono lava
1 E dahi daane e noho i de henua go Uz, dono ingoo go Job. Ia se daane e dee haisala gai e heohi, gai ia e madagu i de Maadua ma de kino i de baubau. 2 Gai e dogohidu ana dama daane ma e dogodolu damaa hine. 3 Gai e hidumano ana ssiibi, ma e dolumano gamelo, ma e mano kaau daane e noonooa dagilua ange gi denga laagau hagahai hegau, aama e limalau donkey haahine, gai e soa hogi ono dangada hai hegau. Gai ia se daane maolunga i magavaa o dangada alodahi i baasi i dua.
4 Gai ana dama daane ne hai denga daonga i olaadeu hale alodahi, gai gilaadeu e ssala ange hogi olaadeu daina haahine dogodolu gi loomai gi gaimee ma de unu uvaini madali gilaadeu. 5 Gai de masavaa huu e odi ai laangi olaadeu e daonga ai, gai a Job ga aalu gilaadeu ga gaamai ga hagagilimalali. Gai ia ne oho age i boo taiao ga hai dagidahi sigidaumaha dudu ange gi gilaadeu. Go hiidinga ia ne hagadaba, “Kana adu agu dama ne haisala ma de pasa baubau i de Maadua i olaadeu lodo.” Aanei hegau a Job e hai i laangi alodahi.
Tahi hagatale o Job
6 Dahi laangi huu gai dama a de Maadua*dama a de Maadua e bei go denga dangada de langi. ne hagabuni mai gi mada luu mada o Tagi Maolunga, gai Satan ne humai hogi madali gilaadeu.*Gen 6.2 7 Gai Tagi Maolunga ne ssili ange gi de ia, “Go hee oou ne humai ai naa?”
Satan ne basa ange, ga hai ange gi Tagi Maolunga, “Au ne humai i dua dogu aheahe saele i henua i lalo alodahi.”
8 Gai Tagi Maolunga ga ssili ange hogi gi Satan, “Koe gu gidee naa dagodo o dogu dangada hai hegau go Job? E deai ange donu se dangada e bei ono dagodo i henua i lalo; ia e dee haisala ma de heohi, gai e madagu i de Maadua ma de kino i de baubau.”
9 Gai Satan ne hai ange gi Tagi Maolunga, “E aha, e dee se hiidinga o Job e madagu ai laa i de Maadua?*Rev 12.10 10 Gai e dee go hiidinga koe e buibui ia ma dono huaabodu aama ana mee alodahi? Koe gu hagamanuuia ana hegau alodahi, gai ana manu haangai gu hhao ma gu honu honga de henua. 11 Aagai noo koe e hagaabo doo lima ga poo ange gi ana mee alodahi, gai ia e huli adu naa ga hai baasi adu gi de goe.”
12 Gai Tagi Maolunga ga hai ange gi Satan, “Au e gaavadu gi de goe ssauaa e hai ai be ni aha aau e lodo e hai ange gi ana mee alodahi. Gai koe e dee maua i de poo ange gi dono angaanga.” Gai Satan ga hano gee ai loo i mada luu mada o Tagi Maolunga.
13 Dahi laangi gai denga dama daane ma damaa hine a Job e daonga ma de unu uvaini i de hale o delaadeu daina daane madua, 14 gai dahi dangada hagailoo ne savini mai gi daho Job, ga hai ange, “Au kaau nogo hagabalabala de gelegele, gai au donkey e gaimee i olaadeu gaogao, 15 gai de gau Seba ne loomai ga hebagi mai gi gimaadeu, ga kave denga manu alodahi, gai ga daa gu maakau de gau hai hegau alodahi. Gai go au donu huu ne ola, gai au ga humai ai nei e tala adu gi de goe.”
16 De masavaa o taane laa goi tala ai ana muna, gai gu humai ange hogi dahi dangada, ga hai ange, “Dahi ahi mai i daho de Maadua gu hano iho i de langi ma gu dudu denga ssiibi ma de gau hagaloosi. Gai go au donu huu ne ola, gai au ga humai ai nei e tala adu gi de goe.”
17 De masavaa a taane laa goi tala ai ana muna, gai gu humai ange hogi dahi, ga hai ange, “E dolu hagabuulingaa daane o de gau Chaldea ne loomai ga hebagi mai gi gimaadeu, ga kave gee ai denga gamelo ma de daa ga maakau de gau hai hegau i de gadilaasa. Gai go au donu huu ne ola, gai au ga humai ai nei e tala adu gi de goe.”
18 De masavaa o taane laa goi tala ai ana muna, gai gu humai ange hogi dahi, ga hai ange, “Au dama daane ma au damaa hine e daonga ma de unu uvaini i de hale o dau dama daane madua, 19 gai tilo, dahi madangi mmahi ne ssau mai i lodo henua ga hagaili de hale laa gu baguu iho ga baalasi gilaadeu alodahi gu maakau. Gai go au donu huu ne ola, gai au ga humai ai nei e tala adu gi de goe.”
20 Gai a Job ne hidi age ga ssae ono malo ma de dahi dono biho. Gai ia ga ino gi honga de gelegele ga daumaha ange gi de Maadua, 21 ga hagadaba,
“Au ne ngadi haanau mai i lo te dinae o dogu dinana,
gai au e ngadi ahe naa hogi gi kilaa.
Go Tagi Maolunga ne gaamai, gai go Tagi Maolunga e gaavee gee;
duuhia de ingoo o Tagi Maolunga.”
22 Mee nei alodahi ne hai, gai a Job tee haisala donu aabe ne hagabaubau de Maadua i dahi mee daudahi.