De Beebaa go
Joshua
Hanu dagodo o de beebaa nei
De Beebaa go Joshua go taane go Joshua ne siia. Hanu e maanadu bolo denga mada hagaodi go tangada haimeedabu go Phinehas ne siia; ia go dahi dangada ne gidee mee ne hai i de masavaa laa. Gai iai taalanga o de hagadee kii a de gau Israel Canaan, i de masavaa a Joshua ne dagi ai gilaadeu, go taane ne suuia Moses. Aanei denga hegau nnui e sisi i de beebaa nei: go de hulo gi baasi dai o Jordan, de hagadee kii o Jericho, de hebagi i Ai, de hagahoou o de hagatoo donu hagaheloongoi i magavaa o de Maadua ma ono dangada.
Dahi gubu hagamogomogo: “Ailaa nei gai goodou hilihilia be goai oodou e daumaha ange aagena … aagai au ma dogu huaabodu, gimaadeu e daumaha ange gi Tagi Maolunga” (24.15).
Denga vaevaaenga
De hagadee kii ina o Canaan (1.1—12.24)
Denga vaaenga o de henua (13.1—21.45)
a. De henua i baasi dua o Jordan (13.1-33)
b. De henua i baasi dai o Jordan (14.1—19.51)
c. Denga aduhale o de hagaola (20.1-9)
d. Denga aduhale o de aamuli o Levi (21.1-45)
De aahe o denga aamuli i baasi dua gi delaadeu mommee (22.1-34)
Muna hagaodi a Joshua (23.1-16)
De hagahoou o de hagatoo donu hagaheloongoi i Shechem (24.1-33)
1
Muna a de Maadua ange gi Joshua
1 Dua huu de magau o Moses tangada hai hegau o Tagi Maolunga, gai Tagi Maolunga ga hai ange gi tangada bale o Moses go Joshua, tama daane a Nun, 2 “Dogu dangada hai hegau go Moses gu magau loo; deenei ai, dagina de huaadangada alodahi nei ma goodou hulo gi de baasi laa o Jordan, go de henua aagu e gaavange gi gilaadeu, de gau Israel. 3 Gai mommee alodahi o oodou alohi vae e tuu ange aagena, au e gaavadu naa donu gi goodou, bei dagu hai gu tala ange ai gi Moses.*Deut 11.24-25 4 Gai oodou goinga e daamada mai i de vao ma Lebanon ga hano ai gi ssaalingaa vai laumalie go Euphrates, ma de henua alodahi o de gau Heth ga dae ai gi de Mediterranean i de baasi i dai, i de baasi ange gi de mommee e danu ai de laa. 5 Gai e deai naa donu se dangada e maua i de hai baasi adu gi de goe i taulooloa doo mouli. Gai au e noho madali goe bei dogu hai ne noho ai laa hogi i daho Moses, gai au e dee tili naa donu goe aabe hano gee mai i oo daha.*Deut 31.6, 8; Heb 13.5
6 Gai koe gi lodo mmahi ma de lo taane; go hiidinga go koe e dagina de huaadangada nei gi de henua aagu gu hagatoo donu ange gi oodou dubuna madagidagi e gaavange gi gilaadeu.*Deut 31.6-7, 23 7 Gai koe gi lodo mmahi ma de lo taane. Gai kana ange haia gi bei hainga alodahi, a dogu dangada hai hegau go Moses gu tala adu gi de goe; aude huli gee mai ai gi hano gi de madau aabe go de masui, gi hagadagadaga age ai goe i mommee alodahi oou e hano aagena. 8 Koe gi dee dilia muna i de beebaa o denga hainga nei, aagai koe gi hagamaumau ina ga maanadu mee nei i de laangi ma de boo, ma de kana ange ga daudali i mee alodahi e sisi ai, gi hagadagadaga age ai goe ma de sula i mee alodahi aau e hai. 9 E aha, au tee tala adu laa koe gi lodo mmahi ma de lo taane? Koe gi dee madagu aabe manavasaa oo lodo, go hiidinga Tagi Maolunga doo Maadua e noho madali goe i mommee alodahi oou e hano aagena.”
10 Gai Joshua ne hai ange gi dagi o dangada, 11 “Goodou hulo hagailoo ina ange gi dangada i de mommee nnoho gaainga, hai ange, ‘Hagadabena ina hanu oodou mee. Gai dua naa huu e dolu laangi, gai gidaadeu gu hulo laa lo te saalingaa vai go Jordan e hulo ai gi de baasi dai, gai gidaadeu ga kave ai de henua a Tagi Maolunga doodou Maadua, e gaavadu e henua ai goodou.’ ”
12 Gai Joshua ne hai ange hogi gi de aamuli o Reuben, ma de aamuli o Gad, aama dahi luu baasi de aamuli o Manasseh,*Num 32.28-32; Deut 3.18-20; Josh 22.1-6 13 “Goodou gi dee ngalo muna a Moses, tangada hai hegau o Tagi Maolunga gu tala adu gi goodou, ga hai adu, ‘Tagi Maolunga doodou Maadua e gaavadu naa gi goodou dahi mommee hagammabu, ia gu gaavadu gi goodou de henua nei.’ 14 Gai oodou bodu, ma oodou dama, aama oodou manu, gi nnoho i de henua a Moses gu gaavadu gi goodou, i de baasi i dua o Jordan. Gai denga daane alodahi i oodou magavaa gu dau i de hebagi, gi hagauda ina olaadeu goloa hebagi, e hulo i mada i mua o oodou daina e balea ange ai gilaadeu, 15 ga dae ai gi de gaavange a Tagi Maolunga gi oodou daina olaadeu mommee hagammabu, bei dana hai gu gaavadu ai naa oodou mommee, gi maua ai hogi e gilaadeu i de henua, i de henua a Tagi Maolunga doodou Maadua e gaavange gi gilaadeu. Gai ga lava naa huu mee nei, gai goodou gu maua i de aahe ga nnoho oodou mommee, go mommee a Moses, tangada hai hegau o Tagi Maolunga gu gaavadu gi goodou i baasi i dua o Jordan, i de baasi ange gi ssoobonga o de laa.”
16 Gai gilaadeu ga hai ange gi Joshua, “Gimaadeu e hai naa donu mee alodahi aau gu tala mai gi gimaadeu, ma de hulo gi mommee alodahi aau e kave gimaadeu gi hulo aagena. 17 Gai gimaadeu e hagallongo adu naa donu hogi gi de goe, bei demaadeu hai ne hagallongo ange ai laa gi Moses i mee alodahi. Gai Tagi Maolunga doo Maadua gi noho i oo daha, bei dono hai ne noho ai laa hogi i daho Moses! 18 Gai be goai e hai baasi adu gi au muna, aabe e dee hagallongo adu gi au muna alodahi e tala ange gi de ia, e daa donu gi magau. Gai koe gi lodo mmahi ma de lo taane.”