2
Ssigidaumaha o grain
“ ‘Noo dahi dangada e hai dahi sigidaumaha ange gi Tagi Maolunga i hanu hua grain, gai ia gi haia i pelaoaa lligi. Gai ia gi liingia ange lolo gi ono elunga, ma de gaavange frankincense aagena, ga gaamai gi denga dama daane a Aaron, gu hai laa gi ni dangada haimeedabu. Gai tangada haimeedabu gi buulia hanu pelaoaa gu hilo laa ma lolo aama frankincense, ga dudu hanu i honga de mommee o ssigidaumaha e hai ai de mee hagamaanadu; de mee nei se sigidaumaha e hai i de ahi, gai e nnamu kala ange gi Tagi Maolunga. Gai mee e doe i pelaoaa laa go tuuhanga o Aaron ma ana dama daane; deenei tiba dabu mmao mai i ssigidaumaha e hai laa i de ahi, ange gi Tagi Maolunga.
Noo tangada e gaamai hanu hua grain gu dao e hai ai dana sigidaumaha, gai ia gi haia gi ni keege e hai i pelaoaa lligi e deai mee hagahua iai ma de hilo ange lolo aagena, aabe ni besgede dee hagahua e hulu ange lolo aagena. Gai noo koe e hai dau ssigidaumaha o grain ga dunu i honga dahi gumedi hadu baabaa, gai haia i pelaoaa lligi e deai mee hagahua iai, gai gu hilo ma lolo; gai koe dohidohi gi lligi, ga llingi ange lolo gi aagena; deenei de hai e hai ai ssigidaumaha o grain. Gai noo dau sigidaumaha o grain ga dao i lo te anibada iai de pono, gai haia i pelaoaa lligi ma lolo. Gai koe gaamai ssigidaumaha o grain laa ga gaavange gi Tagi Maolunga, gai de masavaa naa huu aau e gaamai ai ga gaavange gi tangada haimeedabu, gai ia ga kave gi de mommee o ssigidaumaha. Gai tangada haimeedabu gi aaua hanu mee mai i ssigidaumaha o grain laa ga dudu i honga de mommee o ssigidaumaha e hai ai de mee hagamaanadu, se ssigidaumaha nnamu kala e hai i de ahi ange gi Tagi Maolunga.
10 Gai mee e doe go tuuhanga a Aaron ma ana dama daane; deenei tiba dabu mmao mai i ssigidaumaha e hai laa i de ahi ange gi Tagi Maolunga.
11 Gai e deai donu mee hagahua e hilo ange gi denga grain oodou e gaamai e sigidaumaha ange gi Tagi Maolunga; goodou e dee dudu hogi hanu mee hagahua be ni hooni gi lodo oodou ssigidaumaha dudu ange gi Tagi Maolunga. 12 Gai goodou e maua i de sigidaumaha ange mee nei gi Tagi Maolunga madali oodou huamanu e hagihagi i taamada, aagai mee nei e dee dudu i honga de mommee o ssigidaumaha bei ssigidaumaha nnamu kala. 13 Gai koe gi gaavange soolo gi denga sigidaumaha alodahi e hai i grain; gai koe gi dee ngalo de gaavange soolo gi au sigidaumaha o grain, de mee nei se hagatoo donu hagaheloongoi i oodou magavaa ma doodou Maadua; oodou sigidaumaha o grain e gaavange soolo aagena.
14 Noo koe gu hai dahi sigidaumaha ange gi Tagi Maolunga i grain e hagihagi laa i taamada, gai ssigidaumaha nei e hai i huamanu e hagihagi i taamada e lala gi mmasa denga gau looloa hoou i honga de ahi ga mmili gi lligi. 15 Gai koe ga llingi ange lolo ma frankincense aagena; deenei de hai e hai ai ssigidaumaha o grain. 16 Gai tangada haimeedabu gi aaua hanu hua grain gu mmili laa ma gu lligi ma de hilo i lolo madali denga frankincense alodahi; de mee nei se sigidaumaha e hai i de ahi ange gi Tagi Maolunga.