6
1 Tagi Maolunga ne basa ange gi Moses, ga hai ange,*Num 5.5-8 2 “Noo dahi dangada gu haisala, gai ia tee hai hegau i de muna abodonu ange gi Tagi Maolunga, gai ne hadu muna ange gi tangada ne gaavange dahi mee ia gi doange ina, be ia gu gaiaa mee laa, aabe ne vaivai dagodo ange gi tangada ange laa, 3 be ia gu gidee de goloa o dahi dangada gu tili laa, gai ia ga hadu muna ai, be ia ne basa hagatoo donu i de hadu muna, aabe ia ne hai ange dahi baubau bee nei ange gi tangada ange laa — 4 gai de masavaa naa huu o tangada e donu iho ai bolo ia gu haisala i dana hai mee nei, gai ia gi hagaahea ange mee aana ne gaiaa laa, be go mee aana ne kave laa i de vaivai dagodo, be go mee ne gaavange laa ia gi doange ina, be se mee ne tili gai ia ga gidee, 5 be se mee niiana gu hagatoo donu hadu muna ai. Ia gi hagaahea ange mee nei alodahi ga hagapuni ange dahi diba i diba e lima ga hagaahe ange ai gi tangada niiana mee laa, i de laangi aana e hai ai ssigidaumaha o tagasala. 6 Gai ia gi gaamai gi tangada haimeedabu mee e hai ai ssigidaumaha o tagasala ange gi Tagi Maolunga: e dahi ssiibi daane mai i dana hagabuulingaa manu, e deai mee e baubau i dono angaanga, gai koe hagabaulia ange gi bei de hagaoanga o ssigidaumaha o tagasala. 7 Deenei de hai a tangada haimeedabu e tala ai ono haisala, i mada luu mada o Tagi Maolunga, gai ono haisala gu maatala i mee alodahi gu hagabuu ange ai ssala gi de ia.”
Ssigidaumaha dudu
8 Tagi Maolunga ne basa ange gi Moses, ga hai ange, 9 “Basa ange gi Aaron ma ana dama daane, hai ange: ‘Aanei hainga o ssigidaumaha dudu: ssigidaumaha dudu e dugu i honga de mommee o ssigidaumaha i de boo laa alodahi ga dae ai gi taiao age, gai de ahi i honga de mommee o ssigidaumaha e hai donu gi ula. 10 Gai tangada haimeedabu gi gahu i dono malo linen, ma dono malo huna linen, go de malo e mua ange gi dono angaanga, gai ia ga aau gee lehu ne doe laa i ssigidaumaha dudu, i honga de mommee o ssigidaumaha, ga dugu ange gi gaogao de mommee o ssigidaumaha. 11 Gai ia ga hagaui ono malo dabu, ga ahe ange ga gahu i ono malo i de laa tubua, gai ia ga kave denga lehu laa ga llingi i dahi mommee gilimalali i tua de mommee nnoho gaainga. 12 Gai de ahi i honga de mommee o ssigidaumaha e hai donu gi gaa i masavaa alodahi, e dee dugu gi made; gai tangada haimeedabu gi gaavange lahhie gi honga de ahi i denga daiao alodahi, ga hagatau ange mee o ssigidaumaha dudu gi ono elunga, gai ia ga dudu ai denga mee moomuna o ssigidaumaha hagadanuaa magavaa. 13 Gai de ahi i honga de mommee o ssigidaumaha e hai donu gi gaa i masavaa alodahi; e dee hai donu gi made.
Ssigidaumaha o grain
14 “ ‘Aanei hainga o ssigidaumaha o grain. Go denga dama daane a Aaron e gaamai ssigidaumaha nei gi de mommee o ssigidaumaha, i mada luu mada o Tagi Maolunga. 15 Gai dahi gilaadeu gi buulia hanu pelaoaa lligi mai i ssigidaumaha o grain madali denga lolo ma frankincense alodahi gu hilo ange laa aagena, ga dudu i honga de mommee o ssigidaumaha e hai ai de mee hagamaanadu, se mee nnamu kala ange gi Tagi Maolunga. 16 Gai Aaron ma ana dama gi haia mee e doe gi haia ai pelaoaa dee hagahua ga gai i de mommee dabu, i lo te buibui o de hale malo hagabuni. 17 Pelaoaa nei e dee labu i mee hagahua ga dao ai. Au gu gaavange tiba nei e hai ai delaadeu duuhanga mai i dagu sigidaumaha e hai laa i de ahi; gai se mee dabu mmao, bei ssigidaumaha o haisala aama ssigidaumaha o tagasala. 18 Denga daane alodahi i de aamuli o Aaron e maua i de gai mee nei, bei de hai a Tagi Maolunga gu hagasauaa ange ai gi oodou atangada alodahi, ni mee mai i denga sigidaumaha e hai i de ahi. Be goai e poo ange gi mee nei gai ia gu dabu hogi.’ ”
19 Gai Tagi Maolunga ne basa ange gi Moses, ga hai ange, 20 “Deenei ssigidaumaha a Aaron ma ana dama daane e gaavange gi Tagi Maolunga i de laangi o tangada e hagadabu ai i de lolo: e dahi diba i diba e madaangahulu o dahi ephah*⅒ ephahagu made se 2 pauni. o pelaoaa lligi bei ssigidaumaha o grain i de laa tubua, dahi luu baasi e hai ai sigidaumaha i taiao gai de baasi ange laa i de ahiahi. 21 Gai mee nei e hai i lolo ga dunu i honga de pelaini; gai koe e hilo gi danuaa ga gaamai ai e hai ai ssigidaumaha o hua manu bei grain gu maoha,†Muna nei e dee iloo danuaa dono hagadoonunga i muna Hebrew. gai gu ni dibadibaa, se mee nnamu kala ange gi Tagi Maolunga. 22 Gai tangada i magavaa dama daane o Aaron e hagadabu ange gi tuulanga o tangada haimeedabu, gi gaamai ssigidaumaha nei e gaavange gi Tagi Maolunga, bei de hai gu hagasauaa ange ai laa gi gilaadeu ga hano ai; ssigidaumaha nei e dudu alodahi. 23 Denga sigidaumaha alodahi a tangada haimeedabu e hai i denga grain e dudu alodahi; e deai donu mee e gai ai.”
Ssigidaumaha o haisala
24 Gai Tagi Maolunga ne basa ange gi Moses, ga hai ange, 25 “Basa ange gi Aaron ma ana dama daane, hai ange, ‘Deenei de hai e hai ai ssigidaumaha o haisala. De manu e hai ai sigidaumaha o haisala e daa gi magau i de mommee e daa ai laa de manu o ssigidaumaha dudu i mada luu mada o Tagi Maolunga; gai se mee dabu mmao. 26 Tangada haimeedabu e haia laa ssigidaumaha o haisala gi gaina kano o de manu laa, i de mommee dabu i lo te buibui o de hale malo hagabuni. 27 Gai be goai naa huu e poo ange gi kano o de manu laa gai ia gu dabu hogi; gai noo hanu ono dodo gu ssii ange ga baalau ai dahi malo, gai koe daia de malo laa i dahi mommee dabu. 28 Gai de gumedi hadu ne boale ai laa ono kano e oha gi maoha; gai noo se gumedi bronze ne boale ai, ga ssolo ono lodo gi danuaa ga hagamaa i vai. 29 Gai de gau haimeedabu alodahi e maua i de gaimee ai; mee nei e dabu mmao. 30 Aagai e deai donu kano o de manu o ssigidaumaha o haisala e gai, go de manu e kave laa hanu ono dodo gi lo te hale malo hagabuni e tala ai haisala i de mommee dabu; gai e dudu donu i de ahi.