5 Gai Moses ne hai ange gi de hagabuulingaa dangada, “Aanei mee a Tagi Maolunga gu tala mai gidaadeu gi haia.” 6 Gai Moses ga gaamai Aaron ma ana dama daane ga hagagilimalali gilaadeu i vai. 7 Gai ia ga hakahu ange Aaron i dono malo belee, ga nnoa lo tono ungaalodo, ma de hakahu ange ia i de malo laa daha, ga hagauda ange de ephod gi de ia ga nnoa i de malo hagalaagii e nnoa ai laa de ephod. 8 Gai ia ga hagauda ange gi de ia de mee dau i hadahada, gai ia ga hhao ange de Urim ma de Thummim gi lo te mee dau i hadahada. 9 Gai ia ga dugu ange de goobai malo gi honga dono biho, ga nnoa ange talaa baalanga goolo gi ma te goobai laa, go de hau goolo dabu, bei de hai a Tagi Maolunga gu tala ange ai gi Moses.

10 Gai Moses ga poo mai de lolo hagadabu, ga hagasulu ai de tabernacle ma mee alodahi i ono lodo, ga hagadabu ai mee laa alodahi. 11 Gai ia ga hagatoo madaua ange hanu lolo gi honga de mommee o ssigidaumaha i e hidu hanonga, ga hagadabu ai de mommee o ssigidaumaha ma ono goloa alodahi, ma taaba ma ono dagelo. 12 Gai ia ne llingi ange hogi hanu lolo hagadabu laa gi honga de biho o Aaron ga hagasulu ai aama de hagadabu ai ia. 13 Gai Moses ga gaamai hogi denga dama daane a Aaron, ga hakahu ange gilaadeu i olaadeu malo belee, ga noonooa olaadeu ungaalodo, ma de noonooa ange olaadeu goobai gi honga olaadeu biho, bei de hai a Tagi Maolunga gu tala ange ai laa gi Moses.

14 Ia ne gaamai de kaau e hai ai ssigidaumaha o haisala, gai Aaron ma ana dama daane ne dugu ange olaadeu lima gi honga de biho o de manu laa. 15 Gai Moses ga daa gu magau de manu laa ga hagasulu ange dono madannia gi lodo ono dodo, ga hulu ange gi denga hanga i honga de mommee o ssigidaumaha, ga hagagilimalali ai de mommee o ssigidaumaha laa. Gai ia ga llingi ange denga dodo e doe laa gi tahido o de mommee o ssigidaumaha, e hagadabu ai, gai gi gilimalali ai. 16 Gai ia ne kave denga mee moomuna alodahi e pigi ange gi denga dae, ma mee moomuna o de ade, ma luu kidney ma denga mee moomuna iai, ga dudu i honga de mommee o ssigidaumaha. 17 Aagai ia gi gaavee de kaau laa ma dono gili, ma ono kano, ma ono duudae gi duungia i tua de mommee nnoho gaainga, bei de hai a Tagi Maolunga gu tala ange ai laa gi Moses.

18 Aagai ia ga gaamai hogi ssiibi daane e hai ai laa ssigidaumaha dudu; gai Aaron ma ana dama daane ga dugu ange olaadeu lima gi honga de biho o de manu laa. 19 Gai Moses ne daa de manu laa gi magau ga dabudabui ange ono dodo gi luu baasi de mommee o ssigidaumaha. 20 Gai ia gi duuduudia ssiibi daane laa, ga dudu de biho, ma denga aalanga aama denga mee moomuna. 21 Gai ia ga hhui denga dae ma denga vae i vai, gai Moses ga dudu ssiibi daane laa alodahi i honga de mommee o ssigidaumaha, e hai ai ssigidaumaha dudu, se mee nnamu kala e hai i de ahi ange gi Tagi Maolunga, bei de hai a Tagi Maolunga gu tala ange ai laa gi Moses.

22 Ia ne gaamai hogi ssiibi daane ange laa, go ssiibi daane e hai ai de hagadabu; gai Aaron ma ana dama daane ga dugu ange olaadeu lima gi honga de biho o de manu laa. 23 Gai Moses ga daa gi magau de manu laa, ga kave hanu ono dodo ga hulu ange gi honga de hiihii talinga madau o Aaron, ma honga de madannia madua o dono lima madau, aama honga tabuvae madua i dono vae madau. 24 Gai Moses ga gaamai hogi denga dama daane Aaron, gai ia ga hulu ange hanu dodo gi honga hiihii o olaadeu dalinga madau ma honga madannia maatua o olaadeu lima madau, aama honga dabuvae maatua o olaadeu vae madau; gai Moses ga dabudabuia ange dodo e doe gi luu baasi o de mommee o ssigidaumaha. 25 Gai Moses ga kave denga mee moomuna ma de muli iai laa mee moomuna, ma mee moomuna alodahi e pigi ange laa gi honga denga dae, ma mee moomuna alodahi o de ade, ma luu kidney ma mee moomuna iai, ma de aalanga o de vae madau. 26 Gai ia ne kave mai i lo te gede iai pelaoaa dee hagahua gu hagadabu ange laa gi Tagi Maolunga, dahi keege dee hagahua, ma dahi keege gu hilo ange lolo aagena, aama dahi besgede, ga dugu ange gi honga o denga mee moomuna ma de aalanga o de vae madau laa. 27 Gai ia ne gaavange mee nei gi lo te lima o Aaron ma lodo lima o ana dama daane, gai gilaadeu ga daodaohi age mee laa e hai ai ssigidaumaha daodaohia age i mada luu mada o Tagi Maolunga. 28 Gai Moses ga ahe ange ga kave gee mee laa mai i lodo olaadeu lima, ga dudu i honga de mommee o ssigidaumaha madali ssigidaumaha dudu, e hai ai ssigidaumaha o de hagadabu, se sigidaumaha nnamu kala e hai i de ahi ange gi Tagi Maolunga. 29 Gai Moses ga kave de aalanga o de aloalo ga daodaohi age, e hai ai ssigidaumaha daodaohia age i mada luu mada o Tagi Maolunga; deenei tuuhanga o Moses mai i ssiibi daane ne hai ai laa de hagadabu, bei de hai a Tagi Maolunga gu tala ange ai gi de ia.

30 Gai Moses ne kave hanu lolo hagadabu ma hanu dodo mai i honga de mommee o ssigidaumaha, ga hagatoo madaua ange gi honga o Aaron ma ono malo, ma honga o ana dama daane ma olaadeu malo. Gai ia ga hagadabu ai Aaron ma ono malo, aama ana dama daane ma olaadeu malo.

31 Gai Moses ga hai ange gi Aaron ma ana dama daane, “Gaavee denga kano manu nei ga boale i gaogao de haitoga o de hale malo hagabuni, gai goodou ga gai ai madali denga pelaoaa mai i lo te gede iai pelaoaa gu hagadabu laa, bei dagu hai gu tala adu ai laa bolo go Aaron ma ana dama e gaina mee nei. 32 Gai goodou gi duungia donu mee alodahi e doe i kano manu ma denga pelaoaa nei i de ahi. 33 Gai goodou e dee ssao donu e hulo gee mai i de hale malo hagabuni i e hidu laangi, ga dae ai gi de odi ange laangi o doodou hagadabu, i hiidinga e hidu laangi oodou e hagadabu ai. 34 Gai mee alodahi ne hai nei anailaa nei ga tala ai oodou haisala, go Tagi Maolunga ne daalaa mai. 35 Gai goodou nnoho saele donu huu i gaogao de haitoga o de hale malo hagabuni i e hidu laangi ma e hidu boo, ga hai ai hegau a Tagi Maolunga gu tala adu gi goodou, gi dee maakau ai goodou; go hiidinga gu lava i de tala mai au gi daalaa adu gi goodou.” 36 Gai Aaron ma ana dama daane ne hai donu ga bei mee alodahi a Tagi Maolunga gu tala ange gi Moses.