De Beebaa go
Nehemiah
Hanu dagodo o de beebaa nei
Agu made De Beebaa go Nehemiah go Nehemiah ne siia madali Ezra, i daha denga ngadau e 445-443 b.c. Gai e maua i de vvae haa:
1. De ahe o Nehemiah gi Jerusalem, i de masavaa a de hodooligi o Persia, ne kave ai ia e hai ai de goobenaa o Judah.
2. De hagaduu age ange de buibui o Jerusalem.
3. De dau a Ezra hainga a de Maadua, ma de tala a dangada olaadeu haisala.
4. Hanu hegau ange a Nehemiah ne hai.
Dahi mee laumalie e gidee i lo te beebaa nei, go dagodo de hagadonu a Nehemiah de Maadua, ma dono dalodalo ange gi de ia i masavaa alodahi.
Dahi gubu hagamogomogo: “Dua huu e madalima ma lua laangi, gai de buibui gu lava, i de madalua ma lima laangi o de malama go Elul. Gai ga langona huu e omaadeu hagadaumee alodahi mee nei, gai denga huaahenua alodahi i luoomaadeu baasi gu maatagu, ma de dookaa; gilaadeu gu tonu iho bolo de hegau nei gu sula, i hiidinga de bale a demaadeu Maadua” (6.15-16).
Denga vaevaaenga
De ahe o Nehemiah gi Jerusalem (1.1—2.20)
De hagaahe age de buibui o Jerusalem (3.1—7.73)
De dau o denga hainga, ma de hagahoou o de hagatoo donu hagaheloongoi (8.1—10.39)
Hanu hegau ange a Nehemiah ne hai (11.1—13.31)
1
Talodalo a Nehemiah
1 Muna a Nehemiah, tama daane a Hacaliah.
De malama huu go Kislev,*Kislev e bei go daha Laaga (November) ma Daholaa (December). i de madalua ngadau,†de madalua ngadau e bei go de madalua ngadau o Artaxerxes ne hodooligi ai. i dogu masavaa nogo noho ai i de madaaolo go Susa, 2 gai Hanani, dahi ogu dangada, ne humai i Judah madali hanu daane, gai au ne ssili ange gi gilaadeu dagodo o de gau Ssuu gu aahe laa gi de henua, aama dagodo o Jerusalem.
3 Gai gilaadeu ga hai mai, “Dangada ne ola ga nnoho i de henua gu hai ngadaa mmao ma de hagadookaa olaadeu dagodo; de buibui o Jerusalem gu maoha, gai ono haitoga gu lava i de dudu i de ahi.”
4 De masavaa huu aagu ne langona ai muna nei, gai au gu dangi. Gai au ne daemaha ogu lodo ma de hagahiigai aama de dalodalo ange gi de Maadua o de langi i hanu laangi. 5 Au ne hai ange:
“Tagi Maolunga de Maadua o de langi, gai se Maadua maolunga ma de hagamaatagu, gai e daohi dau hagatoo donu heloongoi ma doo abodonu ange gi gilaadeu e aaloha i de goe aama de daohi au muna; 6 hagahuuhulia mai luoo dalinga ma luoo mada, mage hagalaangona talodalo a doo dangada hai hegau, e dalodalo ai i mada luoo mada i de laangi ma de boo i dagodo o de gau Israel, oo dangada hai hegau, ma de tala adu haisala o de gau Israel gu haisala adu ai gi de goe. Ni muna abodonu, gimaadeu ma ogu dubuna madagidagi gu haisala adu donu gi de goe. 7 Gimaadeu gu hai hegau baubau adu donu gi de goe i demaadeu dee daohi au hainga ma au muna gu hagasauaa, aama au hagamodu gu lava i de gaavange gi doo dangada hai hegau go Moses.
8 Hagamaanadu i au muna gu tala ange gi Moses, ma gu hai ange, ‘Noo goodou e dee hai hegau i de muna abodonu, gai au e hai naa goodou gi mavaevae saele i denga huaahenua ange laa,*Lev 26.33 9 aagai noo goodou e aahe mai gi de au, ma de daudali i agu muna gu tala adu gi goodou, e dee galemu donu goodou gu mavaevae saele gi de bido laa o henua i lalo, gai au e hagaahe mai naa donu goodou gi de mommee aagu gu hili e dugu ai dogu ingoo.’ *Deut 30.1-5
10 Gilaadeu go oo dangada hai hegau ma au dangada gu hagao i doo sauaa ma doo lima mmahi. 11 Dogu Ia Aamua, aude haihaia hagalaangona dalodalo a doo dangada hai hegau ma dalodalo a oo dangada hai hegau, e malangilangi laa i de hagadubu i doo ingoo. Haia gi sula hagatau a doo dangada hai hegau ailaa nei, ma de abodonu mai gi de au i mada i mua o taane nei.”
De masavaa laa gai go au tangada e daohia de unu a de hodooligi.