4
De gau hai hegau ma de gau hagaloosi
1 Gai ga langona huu e Sanballat bolo gimaadeu e hagaahe age de buibui, gai gu dee heohi ange donu gi ono lodo, gai ia gu kona mmao de lili. Gai ia ga basa hakadanga i de gau Ssuu, 2 i madamada o ono dangada ma de hagabuulinga hebagi o Samaria, ga hai ange, “Ni aha a de gau Ssuu baageaa nei e hai nei? E maua nei donu e gilaadeu i de hagaahe age hanu mee? Gilaadeu e hai naa alaadeu sigidaumaha? Gai e maua naa donu e gilaadeu i de hagalava mee nei i dahi laangi sogosogo? Gai e maua naa donu e gilaadeu i de hai hanu hadu i denga gainga gu lava naa i de dudu?”
3 Gai Tobiah, taane Ammon, ne duu hogi madali ia ga hai ange, “Delaadeu bae e hagaduu age naa e maoha naa donu huu i de gage ai o de gaaduu de vao!”
4 Gai au ne dalodalo ga hai ange, “Demaadeu Maadua, hagalaangona, go hiidinga gimaadeu gu hagangadi mee ina; hagaahea ange gi gilaadeu alaadeu muna, gai haia gi noonoodia gilaadeu gi gaavee gi dahi henua gee. 5 Aude degi ange donu gi mee olaadeu gu haisala ai, aabe gi haolia olaadeu haisala mai i mada luoo mada; go hiidinga gilaadeu gu hagadookaa de gau hagatuu.”
6 Gai gimaadeu ne duudagi de hagaduu age de buibui alodahi, ga hai gu madohi lua age gi lunga, i hiidinga dangada ne llodo mmahi i de hai hegau.
7 Aagai ga langona huu e Sanballat ma Tobiah, ma de gau Arabia, ma de gau Ammon, aama de gau Ashdod bolo goi duudagi huu de hagaahe age o de buibui o Jerusalem, gai mommee masaavava laa gu dai buni ange donu, gai gilaadeu gu kona mmao de llili; 8 gai gilaadeu ga hai dahi hagatau e loomai ai e hebagi ange gi Jerusalem, ma de hai gi hai ngadaa de aduhale. 9 Gai gimaadeu ne dalodalo ange gi demaadeu Maadua, ma de dugu hanu dangada gi hagaloosia i de laangi ma de boo e buibui ai gimaadeu i gilaadeu.
10 Gai dangada o Judah ne hagadaba, “De gau molimoli gu daalea, gai gimaadeu gu dee maua i de hagaduu age de buibui, i hiidinga de lagolago gainga.”
11 Gai odaadeu hagadaumee gu hagataba, “Gilaadeu e dee angahia naa donu aabe e gidee taadeu masavaa e tae ai gi olaadeu magavaa, ga daa ai gilaadeu gu maakau ma de hai gi tuu de hegau.”
12 Gai de gau Ssuu e paa ange laa gi gilaadeu ne loomai ga hai mai, gi gimaadeu i e madaangahulu hanonga, “Gilaadeu e loomai naa i mommee alodahi olaadeu e nnoho ai ga hebagi mai gi gimaadeu.”
13 Deelaa ai, au ne hai hanu dangada gi hagaloosia tua de buibui i mommee alodahi e maolalo ai laa de buibui. Au ne hili hanu dangada mai i denga hagadiilinga ma alaadeu gadilaasa, ma dao, aama alaadeu mee hholu gi hagaloosia. 14 Gai dua huu dagu tilo dagodo o mee nei, gai au ga hidi age ga hai ange gi de gau aamua, ma denga dagi aama dangada ange laa, “Goodou aude maatagu i gilaadeu. Gai goodou manadua de Ia Aamua maolunga ma de hagamaatagu, gai goodou hebagi i hiidinga oodou daina daane, ma oodou dama daane, ma damaa hine, ma oodou bodu aama oodou hale.”
15 Gai omaadeu hagadaumee gu langona e gilaadeu, bolo gimaadeu gu iloo alaadeu hagatau, gai de Maadua gu hai gi dee ssula alaadeu hagatau. Gai gimaadeu alodahi ga ahe ange gi de buibui, dahi ma dahi gi ana hegau.
16 Mai i de laangi laa gai dahi luu baasi o ogu dangada hai hegau e hai hegau, gai de baasi ange laa e hagauda olaadeu dao, ma mee buibui, ma mee hholu, aama de kahu i olaadeu malo hebagi. Gai denga dagi ne tuu i dua o dangada alodahi o Judah, 17 e hagaduulia laa de buibui. Gai dangada e molimolia mee ne hai hegau i dahi lima gai de lima ange laa e poo dono goloa hebagi, 18 gai dangada alodahi e hagaduulia laa de buibui, e dau alaadeu gadilaasa i de masavaa alaadeu e bae ai de buibui. Gai taane e ilihia laa de hanga manu e duu i ogu gaogao.
19 Gai au ne hai ange gi de gau aamua, ma denga dagi, aama dangada alodahi, “De hegau nei se hegau hai ngadaa gai se mommee laumalie e hai ai, gai odaadeu mommee e hai hegau ai i honga de buibui e dee hebaa, aagai e mmao odaadeu magavaa. 20 Gai be go hee naa huu oodou e langona ai de ili o de hanga manu, gai goodou ga hagabuni mai gi omaadeu daha i kilaa. Gai taadeu Maadua e hebagi naa donu i odaadeu hiidinga.”
21 Deelaa ai, gimaadeu ne duudagi de hai hegau; dahi luu baasi o denga daane e poo alaadeu dao mai i taiao ga dae ai gi de ssula age o denga heduu. 22 Gai au ne hai ange gi dangada i de masavaa laa, “Dahi ma dahi ma dono dangada hai hegau gi nnoho i Jerusalem i de boo, gai gilaadeu ga hagaloosi ai i de boo, ma de hai hegau i de laangi.” 23 Gai au ma ogu daina daane, ma ogu dangada hai hegau, aama denga daane hagaloosi ne loomai laa madali au, tee hagaui donu omaadeu malo, gai dahi ma dahi ne poo dono goloa hebagi i dono lima madau.