2
De hai e hagatau ai denga aamuli i de mommee nnoho gaainga
1 Gai Tagi Maolunga ne hai ange gi Moses ma Aaron, 2 “De gau Israel alodahi gi hagatuulia olaadeu mommee nnoho gaainga, i luu baasi de hale malo hagabuni. Dahi ma dahi gi noho i de mommee iai de hagailonga ma de flag o de huaabodu o olaadeu dubuna madagidagi.
3 Dangada e hagaduu delaadeu mommee nnoho gaainga i de baasi dua, go de mommee e sobo age ai de laa, go de aamuli o Judah ma olaadeu hagabuulinga, i lalo delaadeu hagailonga. Tagi o dangada o Judah go Nahshon, tama daane a Amminadab. 4 Gai taelodo o dono hagabuulinga hebagi se 74,600.
5 Gai go de aamuli o Issachar e mua ange gi de ia. Tagi o dangada o Issachar go Nathanael, tama daane a Zuar. 6 Gai taelodo o dono hagabuulinga hebagi se 54,400.
7 Ga lava go de aamuli o Zebulun. Tagi o dangada o Zebulun go Eliab, tama daane a Helon. 8 Gai taelodo o dono hagabuulinga hebagi se 57,400.
9 Gai taelodo o dangada alodahi i de mommee nnoho gaainga o Judah, i olaadeu hagabuulinga se 186,400. Go gilaadeu e hulo i mada i mua i de masavaa o dangada e daga ai e hulo.
10 Gai de baasi ngaage go de hagailonga o de mommee nnoho gaainga o Reuben, ma olaadeu hagabuulinga. Tagi o dangada o Reuben go Elizur, tama daane a Shedeur. 11 Gai taelodo o dono hagabuulinga hebagi se 46,500.
12 Gai go de aamuli o Simeon e mua ange gi gilaadeu. Tagi o dangada o Simeon go Shelumiel, tama daane a Zurishaddai. 13 Gai taelodo o dono hagabuulinga hebagi se 59,300.
14 Ga lava go de aamuli o Gad. Tagi o dangada o Gad go Eliasaph, tama daane a Reuel. 15 Gai taelodo o dono hagabuulinga hebagi se 45,650.
16 Gai taelodo o dangada alodahi i de mommee nnoho gaainga o Reuben, i olaadeu hagabuulinga se 151,450. Gilaadeu go de lua hagabuulinga e daga e hulo.
17 Gai de hale malo hagabuni, madali de mommee nnoho gaainga o de aamuli o Levi i lo te ungaalodo laa. Gilaadeu e daga ga hulo, bei delaadeu hai e hagatau ai laa i de mommee nnoho gaainga, dahi aamuli i dono mommee i lalo dono hagailonga.
18 Gai de baasi dai go de hagailonga o de mommee nnoho gaainga o Ephraim ma olaadeu hagabuulinga. Tagi o dangada o Ephraim go Elishama, tama daane a Ammihud. 19 Gai taelodo o dono hagabuulinga hebagi se 40,500.
20 Gai go de aamuli o Manasseh e mua ange gi gilaadeu. Tagi o dangada o de aamuli o Manasseh go Gamaliel, tama daane a Pedahzur. 21 Gai taelodo o dono hagabuulinga hebagi se 32,200.
22 Ga lava go de aamuli o Benjamin. Tagi o dangada o Benjamin go Abidan, tama daane a Gideoni. 23 Gai taelodo o dono hagabuulinga hebagi se 35,400.
24 Gai taelodo o dangada alodahi i de mommee nnoho gaainga o Ephraim, i olaadeu hagabuulinga se 108,100. Gilaadeu go tolu hagabuulinga e daga e hulo.
25 Gai de baasi ngaiho go de hagailonga o de mommee nnoho gaainga o Dan ma olaadeu hagabuulinga. Tagi o dangada o Dan go Ahiezer, tama daane a Ammishaddai. 26 Gai taelodo o dono hagabuulinga hebagi se 62,700.
27 Gai go de aamuli o Asher e mua ange gi gilaadeu. Tagi o dangada o Asher go Pagiel, tama daane a Ocran. 28 Gai taelodo o dono hagabuulinga hebagi se 41,500.
29 Ga lava go de aamuli o Naphtali. Tagi o dangada o Naphtali go Ahira, tama daane a Enan. 30 Gai taelodo o dono hagabuulinga hebagi se 53,400.
31 Gai taelodo o dangada alodahi i de mommee nnoho gaainga o Dan se 157,600. Gai go gilaadeu hugadoo e loadu i muli ma olaadeu hagailonga.”
32 Aanei de gau Israel ne dau, i huaabodu o olaadeu dubuna madagidagi. Gai dangada alodahi e nnoho i olaadeu mommee nnoho gaainga, i olaadeu hagabuulinga, se 603,550. 33 Aagai de aamuli o Levi tee dau madali de gau Israel, bei de hai a Tagi Maolunga ne tala ange ai gi Moses.
34 Gai de gau Israel ne hagassula mee alodahi a Tagi Maolunga ne tala ange gi Moses; gai de hai alaadeu ne hagatuu ai olaadeu mommee nnoho gaainga ma de nnoho i lalo olaadeu hagailonga, go de hai hogi olaadeu ne daga ai ga hulo, dahi ma dahi i dono aamuli ma dono hagadiilinga.