14
De nnanu o dangada
De hagabuulingaa dangada laa ne oo ga tangi; gai gilaadeu ne tangi i de boo laa alodahi. Gai de gau Israel alodahi ga nnanu i Moses ma Aaron; gai de hagabuulingaa dangada laa ga hai ange gi gilaau, “Mee naa gimaadeu ne maakau donu huu i de henua go Egypt, aabe ne maakau donu huu i de vao nei! Gai gu aha Tagi Maolunga gu gaamai ai nei gimaadeu gi de henua nei e daa ai gi maakau? Omaadeu bodu ma amaadeu dama e gaavee naa e omaadeu hagadaumee; gai e dee danuaa ange demaadeu aahe gi Egypt?” Gai dangada ga hagataba i olaadeu magavaa, “Gidaadeu ga hili dahi dangada gi dagina gidaadeu e aahe ai gi Egypt.”
Gai Moses ma Aaron ga ino ga hagapaa olaau mada gi honga de gelegele i madamada o de hagabuulingaa dangada o Israel. Gai Joshua tama daane a Nun ma Caleb tama daane a Jephunneh, luu daane ne hulo laa madali denga daane ga mulidagi ina de henua, ga saesae olaau malo, ga hai ange gi de hagabuulingaa dangada o Israel, “De henua amaadeu ne hulo ga mulidagi se henua danuaa mmao. Noo Tagi Maolunga e malangilangi i gidaadeu, gai ia e kave naa donu gidaadeu gi tae gi de henua laa ma de gaamai gi gidaadeu, de henua iai laa vai uu ma hooni lagolago. Gai goodou aude hai baasi ange gi Tagi Maolunga, be gi maatagu i dangada o de henua laa, go hiidinga e hai ngaohie donu taadeu hagadee kii gilaadeu. Gilaadeu gu deai selaadeu buibui, aagai Tagi Maolunga e noho madali gidaadeu; goodou aude maatagu i gilaadeu.” *Heb 3.16
10 Gai de hagabuulingaa dangada laa alodahi gu llodo e magaa gilaau i denga hadu. De masavaa laa donu huu gai de gau Israel alodahi gu gidee de maalama o de mahamaha o Tagi Maolunga gu haoli de hale malo hagabuni. 11 Gai Tagi Maolunga ga hai ange gi Moses, “Dee hee maa taulooloa de hagangadi mee a de gau nei au? Gai dee hee maa taulooloa delaadeu dee hagadonu agu muna, gai gilaadeu gu gidee donu denga sauaa alodahi aagu gu hai i olaadeu magavaa? 12 Au e daa naa gilaadeu gi maakau i de mee hagamaakau ma de tili gilaadeu, gai au ga hai goe ma doo huaabodu gi se huaahenua soa ma de mmahi ange i gilaadeu.”
De dalodalo o Moses i hiidinga o dangada
13 Aagai Moses ga hai ange gi Tagi Maolunga, “De gau Egypt e langona naa au mee e hai, i hiidinga koe ne hagassao mai de huaadangada nei mai i olaadeu daha i doo sauaa,*Exo 32.11-14 14 gai gilaadeu e tala ange naa gi dangada e nnoho i de henua nei. Gilaadeu gu langona bolo koe, Tagi Maolunga, e noho madali de huaadangada nei; gai koe, Tagi Maolunga e hakide mai gi gimaadeu, gai dau hagausinga e duu i olaadeu elunga, gai koe e hano i olaadeu mada i mua, i lo te duludulu hagausinga i de laangi, gai de boo se duludulu e ula ai laa de ahi. 15 Gai noo koe e daa gi maakau de huaadangada nei, gai denga huaahenua gu langona laa e gilaadeu oo longo ga hagataba, 16 Tagi Maolunga tee maua i de kave de huaadangada nei gi tae gi de henua aana gu hagatoo donu ange gi gilaadeu, deelaa ai, ia gu daa gilaadeu ma gu maakau i de vao.’
17 Dogu Ia Aamua, iainei gai au e dangidangi adu, hagaagona mai de laumalie o doo sauaa, bei dau hai gu hagatoo donu ai, ma gu hagadaba, 18 Tagi Maolunga e dee moolau de lili ma de abodonu, gai e laumalie dono abodonu, ia e degi ange gi baubau ma haisala, aagai ia e dee degi ange donu gi hegau baubau, gai e hagaduasala denga dama i hiidinga haisala olaadeu maadua, ga dae ai loo gi tolu ma de haa atangada.’ *Exo 20.5-6; 34.6-7; Deut 5.9-10; 7.9-10 19 Au e dangidangi adu, degi ange gi baubau o de huaadangada nei, bei dagodo de laumalie doo abodonu, bei dau hai gu degi ange ai naa gi de huaadangada nei, mai loo i Egypt ga dae mai ai gi iainei.”
20 Gai Tagi Maolunga ga hai ange, “Au gu degi ange, bei dau hai gu dangidangi mai ai naa. 21 Aagai au e hagatoo donu i dogu mouli, ma dogu mahamaha e haoa laa ma e honu henua i lalo alodahi,*Heb 3.18 22 bolo e deai naa donu se dangada i magavaa o dangada ne gidee laa dogu mahamaha, ma agu hegau sauaa ne hai i Egypt ma de vao, aagai gilaadeu ne hagatale au i denga hanonga e madaangahulu nei, aama tee daudali i agu muna — 23 e gidee de henua aagu gu hagatoo donu ange gi olaadeu dubuna madagidagi. E deai hogi se gilaadeu e hagangadi mee ina au e gidee de henua laa. 24 Aagai au e kave naa dogu dangada hai hegau go Caleb gi dae gi de henua oona ne hano laa aagena, gai ono hagadiilinga alodahi e henua ai naa i de henua laa, i hiidinga ia e dagodo gee ono lodo, gai ia ne daudali mai i de au i ono lodo alodahi.*Josh 14.9-12 25 Gai go hiidinga de gau Amalek ma de gau Canaan e nnoho i de mommee soe i magavaa mounga, deelaa ai, daiao gai goodou huuhuli aahe gi de vao i de haiava e hano laa gi Tai Mmea.”
26 Gai Tagi Maolunga ga hai ange gi Moses ma Aaron, 27 “Dee hee maa taulooloa de nnanu o de hagabuulingaa dangada baubau nei i de au? Au gu langona de nnanu o de gau Israel ma delaadeu hai baasi mai gi de au. 28 Gai gooluu hai ange gi gilaadeu, ‘E hagadaba Tagi Maolunga, au e hagatoo donu i dogu mouli, bolo au e hai adu naa gi goodou gi bei muna oodou gu langona naa: 29 goodou e maakau naa gai oodou angaanga e daakodo i de vao — go goodou alodahi gu dagimadalua oodou ngadau ga hanage ai, gu dau ma gu sisi oodou ingoo, gai gu hai baasi mai gi de au i doodou nnanu.*Heb 3.17 30 E deai naa donu se goodou e dae gi de henua aagu gu hagatoo donu e gaavadu e nnoho ai goodou, go Caleb donu huu tama daane a Jephunneh ma Joshua tama daane a Nun e tae. 31 Aagai denga dama oodou e hagataba naa bolo e gaavee naa e oodou hagadaumee, go gilaadeu naa aagu e kave gi tae ma de manuuia i de henua oodou e kino ai naa. 32 Aagai aanei oodou dagodo: goodou e maakau naa i de vao nei. 33 Oodou dama e hai naa ga ni dangada hagaloosi ssiibi i de vao i e madahaa ngadau; gilaadeu e hagaduasala naa i hiidinga doodou dee hai hegau i de muna abodonu, ga dae ai gi de odi goodou i de maakau i de vao.*Acts 7.36 34 Gai taelodo o laangi oodou ne hulo ai ga mulidagi de henua se madahaa, deelaa naa hogi taelodo o denga ngadau oodou e hagaduasala ai, i hiidinga oodou baubau; gi tonu iho ai goodou gi oodou dagodo i dogu hai baasi adu gi goodou.’ 35 Go au, Tagi Maolunga, ne daalaa muna nei; gai au e hai ange naa donu mee nei alodahi gi de hagabuulingaa dangada baubau gu hagabuni nei ma e hagadaumee mai gi de au: gilaadeu e odi naa donu i de maakau i de vao nei.”
36 Gai go denga daane a Moses ne hai laa gi hulo gi mulidagi ina de henua, gai ne aahe mai ga hai de hagabuulingaa dangada alodahi ga nnanu i Tagi Maolunga, i delaadeu gaamai hanu longo baubau o de henua, 37 — denga daane ne gaamai laa hanu longo baubau o de henua laa — gilaadeu ne maakau i dahi mee hagamaakau i mada luu mada o Tagi Maolunga. 38 Aagai Joshua tama daane a Nun ma Caleb tama daane a Jephunneh donu huu tee maakau i denga daane ne hulo laa ga mulidagi ina de henua.
De hagatale de hagadee kii de henua
(Deut 1.41-46)
39 Gai Moses ne tala ange muna laa gi de gau Israel alodahi, gai dangada alodahi gu kona mmao de tangi. 40 Gai gilaadeu ne oho age i taiao, ga loage gi denga mommee maolunga i de henua, ga hai ange, “Aanei gimaadeu gu loomai nei e hulo e kave de mommee a Tagi Maolunga gu hagatoo donu mai. Gai gimaadeu e iloo bolo gimaadeu gu haisala donu.”
41 Gai Moses ga hai ange, “Gu aha goodou gu hai ai naa gi dee bei muna a Tagi Maolunga gu tala adu gi goodou? Oodou hagatau e dee ssula naa donu. 42 Goodou aude hulo oodou hagadaumee kana hagadee kii goodou, go hiidinga Tagi Maolunga e dee hano donu madali goodou. 43 Gai de gau Amalek ma de gau Canaan i kilaa, gai goodou e daia naa ga maakau i de gadilaasa. Tagi Maolunga e dee hano naa donu madali goodou, i hiidinga goodou tee daudali i ana muna.”
44 Aagai dangada ne hai donu huu olaadeu lodo ga loage ai ga hulo gi de mommee maolunga i de henua, gai de ngavesi o de hagatoo donu hagaheloongoi a Tagi Maolunga, ma Moses ne nnoho donu huu i de mommee nnoho gaainga. 45 Gai de gau Amalek ma de gau Canaan e nnoho laa i de henua iai mounga ne loiho ga hebagi ange gi de gau Israel, ga hagadee kii gilaadeu ma de doolohi gilaadeu ga tae ai gi Hormah.

*14:9 Heb 3.16

*14:13 Exo 32.11-14

*14:18 Exo 20.5-6; 34.6-7; Deut 5.9-10; 7.9-10

*14:21 Heb 3.18

*14:24 Josh 14.9-12

*14:29 Heb 3.17

*14:33 Acts 7.36