4 De masavaa a Moses ne langona ai muna nei, gai ia ga ino ga hagabaa luoono mada gi honga de gelegele; 5 ga hai ange gi Korah ma denga daane madali ia, “Boo taiao gai Tagi Maolunga e hagaago mai naa be goai ono dangada gai goai e dabu, gai goai e maua i de hano e hagabaa ange gi de ia. Gai tangada naa huu aana e hili, gai ia gi humai gi hagabaa ange gi de ia.*2 Ti 2.19 6 Gai deenei doodou mee e hai: Korah ma dono hagabuulinga alodahi, gi gaavee hanu gumedi o denga maga ahi ma mee maanongi, 7 gai daiao naa huu gai goodou ga hhao ange hanu maga ahi ma hanu mee maanongi gi lodo gumedi laa, i mada luu mada o Tagi Maolunga. Gai tangada naa huu a Tagi Maolunga e hili, gai go ia e dabu. Goodou denga daane de aamuli o Levi, gu gona odi donu oodou mee e hai!”

8 Gai Moses ga hai ange gi Korah, “Denga daane de aamuli o Levi, goodou nnoho mai hagalaangona agu muna! 9 Goodou e hagangadi mee naa donu de hili a de Maadua o Israel goodou, ga vvae gee goodou mai i de hagabuulingaa dangada o Israel, ga hai gi maua e goodou i de loomai e hagapaa ange gi de ia, gi haia ai hegau i lo te tabernacle o Tagi Maolunga, aama de tuu i mada o de hagabuulingaa dangada o Israel, gi hai hegau ange ai gi gilaadeu? 10 Ia gu gaamai goodou ma dangada alodahi i de aamuli o Levi gi paa ange gi de ia, aagai goodou gu llodo naa hogi e kave tuulanga o tangada haimeedabu? 11 Deenei ai, go Tagi Maolunga donu oodou e hai baasi ange naa aagena. Gai goai go Aaron, gai goodou ga hai baasi ange ai naa gi de ia?”

12 Gai Moses ga aalu gi loomai Dathan ma Abiram luu dama daane a Eliab. Gai gilaau ne hai ange, “Gimaau e dee loadu! 13 Koe e maanadu bolo se mee hai ngaohie dau hagassao mai gimaadeu i de henua iai vai uu ma hooni lagolago, ga gaamai gimaadeu e daa gi maakau i de vao nei? Gai iainei koe gu lodo hogi go koe demaadeu dagi? 14 Gai koe tee gaamai hogi gimaadeu gi dahi henua iai vai uu ma hooni lagolago, aabe e bolo mai hanu gelegele ma veelengaa grape moomaadeu. Gai koe ga llao mai naa hogi de ganomada o denga daane nei ⌊ga hai gi ni dangada hai hegau niiou⌋? E deai, gimaau e dee loadu donu!”

15 Gai Moses gu kona mmao de lili, gai ia ga hai ange gi Tagi Maolunga, “Koe gi dee hagadubu ina donu delaadeu sigidaumaha. Tigi ai donu se donkey daudahi aagu ne kave mai i olaadeu daha, aabe gu hai ange dahi baubau gi gilaadeu.”

16 Gai Moses ga hai ange gi Korah, “Goodou ma de hagabuulingaa daane madali goe loomai gi mada luu mada o Tagi Maolunga daiao, madali Aaron. 17 Gai dahi ma dahi gi gaavee dana gumedi e dudu ai laa denga mee maanongi, gai ia gi dugua ange hanu mee maanongi gi ono lodo, gai goodou denga daane e 250 ga gaamai oodou mee dudu mee maanongi gi mada luu mada o Tagi Maolunga; goodou alodahi ma Aaron gi gaamai oodou mee dudu mee maanongi.” 18 Deelaa ai, denga daane laa alodahi ne gaamai alaadeu gumedi e dudu ai laa denga mee maanongi, ga hhao ange maga ahi ma mee maanongi aagena, gai gilaadeu ga loomai ga tuu i de haitoga o de hale malo hagabuni madali Moses ma Aaron. 19 Gai Korah ne hai gi loomai de hagabuulingaa dangada alodahi gi de haitoga o de hale malo hagabuni, gi hagadaumee ange ai gi luu daane laa. Gai de mahamaha o Tagi Maolunga gu hagasula ange gi de hagabuulingaa dangada laa. 20 Gai Tagi Maolunga ga hai ange gi Moses ma Aaron, 21 “Vaaea gee gooluu mai i de hagabuulingaa dangada naa, gai au ga daa gilaadeu gi maakau iainei donu.”

22 Gai gilaau ga ino ga hagapaa olaau mada gi honga de gelegele, ga hai ange, “De Maadua, go de Maadua o hagasaalunga o dangada alodahi, koe ga daohi naa donu huu doo lili i de hagabuulingaa dangada nei, i hiidinga haisala o dahi dangada sogosogo?”

23 Gai Tagi Maolunga ga hai ange gi Moses, 24 “Hai ange gi de hagabuulingaa dangada alodahi gilaadeu gi ngaalue gee, i de mommee iai hale malo o Korah, ma Dathan aama Abiram.”

25 Gai Moses ne hidi age ga hano gi daho Dathan ma Abiram; gai denga daane maatua o de gau Israel ne daudali ange i de ia. 26 Gai ia ga hai ange gi de hagabuulingaa dangada, “Goodou hagamoolau ngaalue gee mai, i de mommee iai hale malo o denga daane baubau nei! Goodou e dee poo ange gi hanu olaadeu goloa, gi dee maakau ai goodou, i hiidinga olaadeu haisala.” 27 Gai dangada ga ngaalue gee mai i denga hale malo o Korah, ma Dathan aama Abiram. Gai Dathan ma Abiram gu loomai ga tuu i mada haitoga olaau hale malo, madali olaau bodu ma alaau dama, aama alaau gauligi vaaligiligi.

28 Gai Moses ga hai ange, “Deenei doodou hai e iloo ai bolo go Tagi Maolunga ne haia au gi humai gi haia hegau nei alodahi, au tee humai donu huu i de au. 29 Noo denga daane nei e maakau bei de hai o dangada e maakau ai laa i de laa tubua, gai e dee go Tagi Maolunga ne haia au gi humai. 30 Aagai noo Tagi Maolunga e hai dahi mee hagalele mouli hoou, gai de henua e mahanga lua ga holo gilaadeu, madali olaadeu goloa alodahi, ma de tili ange gilaadeu gi de mommee o de gau maakau, i de masavaa olaadeu goi mouli ai, gai goodou gu iloo bolo denga daane nei gu hagangadi mee donu Tagi Maolunga.”

31 Gai de masavaa aana ne tala ai ga lava ana muna nei, gai de gelegele i olaadeu lalo gu mahanga lua; 32 gai de henua gu mahuge ga holo denga daane laa, madali olaadeu huaabodu ma dangada alodahi ne daudali ange i Korah, aama olaadeu goloa alodahi. 33 Gai gilaadeu ma olaadeu goloa alodahi gu tili iho gi de mommee o de gau maakau; gai de gelegele gu ahe ange ga buni, gai gilaadeu alodahi gu maakau, ga dee nnoho i magavaa o hagabuulingaa dangada. 34 Gai de gau Israel alodahi i olaadeu gaogao ga saavini ga hulo gee, i de masavaa alaadeu ne langona ai delaadeu oo, gilaadeu ne hagataba, “De henua kana holo hogi gidaadeu!”

35 Gai de ahi ne humai i daho Tagi Maolunga ga daa gu maakau de 250 daane laa, i de masavaa alaadeu e hai ai alaadeu sigidaumaha i mee maanongi.

36 Gai Tagi Maolunga ga hai ange gi Moses, 37 “Hai ange gi Eleazar, tama daane a tangada haimeedabu go Aaron, ia gi aaua mai denga mee hhao maga ahi laa i lo te ahi, ga kave denga maga ahi iai gi dahi mommee mmao ga llingi ai, go hiidinga mee laa e dabu. 38 Gai mee hhao maga ahi a denga daane ne haisala laa ga hidi mai ai delaadeu maakau, dugidugia gi baabaa ga haoli ai de mommee o ssigidaumaha, mee laa gu dabu, go hiidinga gu kave gi mada luu mada o Tagi Maolunga. Gai de mee nei gi se hagailonga e hagakana ange ai de gau Israel.”

39 Gai tangada haimeedabu go Eleazar ne kave mee hhao maga ahi a denga daane laa ne hai ai alaadeu sigidaumaha, ga dugidugi gu baabaa ga haolia ai de mommee o ssigidaumaha, 40 bei de hai a Tagi Maolunga gu tala ange ai laa gi Eleazar i daho Moses. Gai se mee e hagamanadua ange ai gi de gau Israel, bolo e deai ange donu dangada, go dahi aamuli donu huu o Aaron, e maua i de humai e dudu denga mee maanongi, i mada luu mada o Tagi Maolunga, ia kana bei hogi dagodo o Korah ma dangada ne daudali ange i de ia.

41 De laangi i dua mee nei, gai de hagabuulingaa dangada alodahi o Israel ne nnanu i Moses ma Aaron, ga hai ange, “Gooluu gu daa ma gu maakau dangada o Tagi Maolunga.”

42 Gai de masavaa o dangada alodahi ne hagabuni ai, e hai baasi ange gi Moses ma Aaron, gai gilaadeu ga huuhuli ange gi de hale malo hagabuni. De masavaa laa donu huu, gai gu haolia i de hagausinga, gai de mahamaha o Tagi Maolunga gu hagasula mai. 43 Gai Moses ma Aaron ga hulo ga tuu i ma te hale malo hagabuni, 44 gai Tagi Maolunga ga hai ange gi Moses, 45 “Vaaea gee gooluu mai i daho de hagabuulingaa dangada nei, gai au ga daa gilaadeu gi maakau iainei.” Gai gilaau ga ino ga hagapaa olaau mada gi honga de gelegele.

46 Gai Moses ga hai ange gi Aaron, “Hannoo gaavee de mee hhao maga ahi, haoa ange hanu maga ahi i honga de mommee o ssigidaumaha gi ono lodo, ga dugu ange hanu mee maanongi gi honga maga ahi laa, gai koe ga hagamoolau ga kave gi magavaa o de hagabuulingaa dangada, e tala ai olaadeu haisala. Go hiidinga de mee hagamaakau gu daamada donu de daa gi maakau dangada, i hiidinga de lili o Tagi Maolunga.” 47 Gai Aaron ne hagassula muna a Moses, ma de savini gi magavaa o de hagabuulingaa dangada laa; aagai tilo, de mee hagamaakau laa gu daamada donu de hai i magavaa o dangada. Gai ia ga dugu ange mee maanongi gi honga maga ahi laa, ga tala ai haisala o dangada. 48 Gai ia ne hano ga duu i magavaa o dangada gu maakau aama dangada goi mouli laa, gai de mee hagamaakau laa gu tuu. 49 Gai ne 14,700 ange dangada ne maakau i dua o dangada ne maakau laa madali Korah. 50 Gai Aaron ne ahe mai gi daho Moses i de haitoga o de hale malo hagabuni, i de masavaa ne tuu ai de mee hagamaakau laa.