24
1 Gai ga gidee huu e Balaam bolo Tagi Maolunga e malangilangi i de hagamanuuia Israel, gai ia tee ahe ange e hai hanu huuhuaa mee, bei denga hanonga ange laa, aagai ia ne huli ga hano gi de vao. 2 Gai Balaam gu gidee de gau Israel e nnoho gainga madali olaadeu aamuli. Gai de Hagasaalunga o de Maadua gu hano iho gi ono elunga, 3 gai ia ga tala ana muna, ga hagadaba,
“Muna a Balaam, tama daane a Beor,
muna a taane e gidee mee,
4 muna a taane ne langona muna a de Maadua,
ma de gidee de midi hagaago ange mai i daho de Ia Mmahi Mmao laa;
ia ne hagabaguu gi lalo, gai luoono mada e aala.
5 Jacob, ga dae laa de mahamaha oo hale malo,
Israel, oo mommee nnoho gaainga e mahamaha!
6 Gai e bei denga geelonga i de mommee lahalaha,
ma denga veelenga i gaogao dahi saalingaa vai,
ma denga aloe a Tagi Maolunga ne doo,
ma denga cedar e ssomo i gaogao denga vai.
7 Denga vai e ssali mai naa i lodo alaadeu bagede;
gai ana golee e doo i lodo vai lagolago,
gai dono hodooligi e maolunga ange i Agag,
dono nohoanga hodooligi e hagaamua naa.
8 De Maadua ne hagassao mai ia i Egypt,
gai luoono hanga e mmahi bei de kaau daane aada;
ia e oha naa denga huaahenua e kino i de ia,
ga hadihadi gi too dagidahi olaadeu ivi,
ma de tili gilaadeu i dana mee hholu.
9 Israel e dogoduli naa bei de laiono,
gai e bei de laiono hahine — goai e maua i de hhango ia?
Gilaadeu e hagamanuuia ina goe, e hagamanuuia naa,
gai gilaadeu e hagamalaia ina goe, e hagamalaia naa.” *Gen 12.3; 49.9
10 Gai Balak gu lili mmao i Balaam. Gai ia ne paa luoono lima i hiidinga dono lili, ga hai ange gi Balaam, “Au ne aalu adu goe gi humai gi hagamalaia ina ogu hagadaumee, gai tilo, koe gu hagamanuuia gilaadeu i denga hanonga e dolu nei. 11 Deenei ai, hagamoolau ahe gi doo henua. Au ne hai adu bolo au e hagao adu goe, aagai Tagi Maolunga gu hai gi deai soo hagaoanga.”
12 Gai Balaam ga hai ange gi Balak, “E aha, tee daalaa ange e au gi denga daane aau ne hai gi loadu gi ogu daha, ga hai ange, 13 ‘Ga gaamai naa donu e Balak gi de au, dono hale e honu laa i selevaa ma goolo, aagai au e dee maua donu i de hai ogu mee e lodo ai, e dee hilihili be se mee danuaa aabe se mee baubau. Au e dee maua donu i tee daudali i muna a Tagi Maolunga, gai au e tala donu huu muna a Tagi Maolunga e tala mai’? 14 Tilo, au ga ahe nei gi daho ogu dangada. Aagai koe humai, gai au ga tala adu, dagodo o mee a de huaadangada nei e hai adu gi de goe ma oo dangada, i laangi e loomai.”
Muna pelaabisi a Balaam i de haa hanonga
15 Gai Balaam ne basa pelaabisi, ga hagadaba,
“Muna pelaabisi a Balaam tama daane a Beor,
go muna a taane madagide,
16 muna a taane e hagalaangona muna a de Maadua,
ma de donu ange gi de iloo mee o de Ia Maolunga Mmao laa,
ma de gidee midi mai i daho de Ia Mmahi Mmao laa,
ia e hagabaguu gi lalo gai luoono mada e aala.
17 Au e gidee ia, gai e dee go iainei;
au e daumada ia, aagai ia tigi baa mai.
Dahi heduu e sobo age naa i daho Jacob,
dahi laagau hodooligi e sula age naa i Israel;
ga dagahi gi bala de biho o Moab,
ma de ngadi biho o hagadiilinga o Sheth.
18 Edom e hagadee kii ina naa,
dono hagadaumee go Seir e hagadee kii naa hogi,
aagai Israel e kii naa.
19 Dahi dagi e sula age naa i daho Jacob,
ga daa naa gu maakau dangada ne ola i denga aduhale.”
Muna pelaabisi a Balaam i de lima hanonga
20 Gai ga gidee huu e Balaam de gau Amalek, gai ia ne basa, ga hagadaba,
“Amalek go tahi i magavaa o denga huaahenua i taamada,
aagai e oha naa donu i de hagaodi.”
21 Ia ne gidee hogi de gau Ken, gai ia ga tala ana muna, ga hagadaba,
“Doo mommee noho e makaga,
gai doo hoohanga e hili i lo te baba;
22 aagai de gau Ken e daia naa ga maakau,
i de masavaa o de gau Assyria e noonooa ai goodou ga kave!”
23 Gai ia ne tala ana muna, ga hagadaba,
“E vakaa naa dangada, goai e maua gi ola
i de masavaa a de Maadua e hai ai mee nei?
24 Denga vaga e loomai naa i Kittim*Kittim e bei go Cyprus.
ga hebagi ange gi Assyria ma Eber;
gai gilaadeu e oohaa naa hogi.”
25 Gai Balaam ne hidi age ga ahe gi dono hale; gai Balak ne ahe hogi ga hano.