26
De dau o dangada i de lua hanonga
1 Gai dua huu tuu de mee hagamaakau laa, gai Tagi Maolunga ga hai ange gi Moses ma Eleazar, tama daane a tangada haimeedabu go Aaron,*Num 1.1-46 2 “Daulia ga sisi dangada alodahi o Israel, i huaabodu o olaadeu dubuna madagidagi, mai i de madalua ngadau ga hanage ai, go gilaadeu gu maua i de dau i de hebagi i Israel.” 3 Gai Moses ma tangada haimeedabu go Eleazar ga hai ange gi dangada i de mommee soe i Moab i gaogao Jordan i de baasi gee o Jericho, 4 “Daulia ma gi siia ingoo o dangada alodahi, mai i de madalua ngadau ga hanage ai,” bei de hai a Tagi Maolunga gu tala ange ai laa gi Moses.
Gai aanei de gau Israel ne ssao ga hulo gee mai i de henua go Egypt:
5 Mai i de aamuli o Reuben, tama madua a Israel:
go Hanok, ne hai ai de hagadiilinga o Hanok;
ma Pallu, ne hai ai laa de hagadiilinga o Pallu;
6 ma Hezron, ne hai ai laa de hagadiilinga o Hezron;
aama Carmi, ne hai ai laa de hagadiilinga o Carmi.
7 Aanei hagadiilinga o de aamuli o Reuben; gai taelodo o dangada iai se 43,730.
8 Gai tama daane a Pallu go Eliab. 9 Gai denga dama a Eliab: go Nemuel, ma Dathan, aama Abiram. Aanei luu daane a de gau Israel ne hili laa gi ni dagi, gai gilaau ga hagadaumee ange gi Moses ma Aaron madali Korah, i de masavaa alaadeu ne hagadaumee ange ai laa gi Tagi Maolunga, 10 gai de gelegele ne mahanga lua ga holo gilaadeu madali Korah, de ahi ne daa ga maakau e 250 daane. Gai de gau laa ne hai ga se mee e hagakana ange ai gilaadeu. 11 Aagai denga dama daane a Korah tee odi i de maakau.
12 Gai aanei denga hagadiilinga i de aamuli o Simeon:
go Nemuel, ne hai ai de hagadiilinga o Nemuel;
ma Jamin, ne hai ai laa de hagadiilinga o Jamin;
ma Jakin, ne hai ai laa de hagadiilinga o Jakin;
13 ma Zerah, ne hai ai laa de hagadiilinga o Zerah;
aama Shaul, ne hai ai laa de hagadiilinga o Shaul.
14 Aanei hagadiilinga i de aamuli o Simeon, gai taelodo o dangada alodahi iai se 22,200.
15 Gai aanei denga hagadiilinga i de aamuli o Gad:
go Zephon, ne hai ai de hagadiilinga o Zephon;
ma Haggi, ne hai ai laa de hagadiilinga o Haggi;
ma Shuni, ne hai ai laa de hagadiilinga o Shuni;
16 ma Ozni, ne hai ai laa de hagadiilinga o Ozni;
ma Eri, ne hai ai laa de hagadiilinga o Eri;
17 ma Arod, ne hai ai laa de hagadiilinga o Arod;
aama Areli, ne hai ai laa de hagadiilinga o Areli.
18 Aanei hagadiilinga i de aamuli o Gad, gai taelodo o dangada alodahi iai se 40,500.
19 Denga dama daane a Judah go Er ma Onan; gai gilaau ne maakau i de henua go Canaan. 20 Gai aanei denga hagadiilinga i de aamuli o Judah:
go Shelah, ne hai ai de hagadiilinga o Shelah;
ma Perez, ne hai ai laa de hagadiilinga o Perez;
aama Zerah, ne hai ai laa de hagadiilinga o Zerah.
21 Gai dama a Perez: go Hezron, ne hai ai de hagadiilinga o Hezron, ma Hamul, ne hai ai laa de hagadiilinga o Hamul.
22 Aanei hagadiilinga i de aamuli o Judah, gai taelodo o dangada alodahi iai se 76,500.
23 Gai aanei denga hagadiilinga i de aamuli o Issachar:
go Tola, ne hai ai de hagadiilinga o Tola;
ma Puah, ne hai ai laa de hagadiilinga o Puni;
24 ma Jashub, ne hai ai laa de hagadiilinga o Jashub;
aama Shimron, ne hai ai laa de hagadiilinga o Shimron.
25 Aanei denga hagadiilinga i de aamuli o Issachar, gai taelodo o dangada alodahi iai se 64,300.
26 Gai aanei denga hagadiilinga i de aamuli o Zebulun:
go Sered, ne hai ai de hagadiilinga o Sered;
ma Elon, ne hai ai laa de hagadiilinga o Elon;
aama Jahleel, ne hai ai laa de hagadili o Jahleel.
27 Aanei hagadiilinga i de aamuli o Zebulun, gai taelodo o dangada alodahi iai se 60,500.
28 Gai de aamuli o Joseph ne hagadili i daho luaana dama daane go Manasseh ma Ephraim.
29 Gai denga dama a Manasseh:
go Makir, ne hai ai de hagadiilinga o Makir; gai Makir ne hagadili Gilead;
go Gilead, ne hai ai de hagadiilinga o Gilead. 30 Gai aanei dama a Gilead:
go Iezer, ne hai ai de hagadiilinga o Iezer;
ma Helek, ne hai ai laa de hagadiilinga o Helek;
31 ma Asriel, ne hai ai laa de hagadiilinga o Asriel;
ma Shechem, ne hai ai laa de hagadiilinga o Shechem;
32 ma Shemida, ne hai ai laa de hagadiilinga o Shemida;
aama Hepher, ne hai ai laa de hagadiilinga o Hepher.
33 Gai Zelophehad tama daane a Hepher teai donu ana dama daane, ni damaa hine donu huu; gai ingoo o ana damaa hine go Mahlah, ma Noah, ma Hoglah, ma Milcah, aama Tirzah.
34 Aanei hagadiilinga i de aamuli o Manasseh; gai taelodo o dangada alodahi iai se 52,700.
35 Gai aanei denga hagadiilinga i de aamuli o Ephraim:
go Shuthelah, ne hai ai de hagadiilinga o Shuthelah;
ma Beker, ne hai ai laa de hagadiilinga o Beker;
aama Tahan, ne hai ai laa de hagadiilinga o Tahan.
36 Gai aanei denga hagadiilinga o Shuthelah: go Eran, ne hai ai de hagadiilinga o Eran.
37 Aanei hagadiilinga o de aamuli o Ephraim, gai taelodo o denga daane alodahi iai se 32,500. Aanei hagadiilinga o luu dama daane a Joseph.
38 Gai aanei denga hagadiilinga i de aamuli o Benjamin:
go Bela, ne hai ai de hagadiilinga o Bela;
ma Ashbel, ne hai ai laa de hagadiilinga o Ashbel;
ma Ahiram, ne hai ai laa de hagadiilinga o Ahiram;
39 ma Shupham, ne hai ai laa de hagadiilinga o Shupham;
aama Hupham, ne hai ai laa de hagadiilinga o Hupham.
40 Gai luu dama daane a Bela go Ard ma Naaman: go Ard, ne hai ai de hagadiilinga o Ard; aama Naaman, ne hai ai laa de hagadiilinga o Naaman.
41 Aanei hagadiilinga i de aamuli o Benjamin; gai taelodo o dangada alodahi iai se 45,600.
42 Gai aanei denga hagadiilinga i de aamuli o Dan:
go Shuham, ne hai ai de hagadiilinga o Shuham.
Aanei denga hagadiilinga i de aamuli o Dan. 43 Aanei denga hagadiilinga o Shuham i de aamuli o Dan. Gai taelodo o dangada alodahi iai se 64,400.
44 Gai aanei denga hagadiilinga i de aamuli o Asher:
go Imnah, ne hai ai de hagadiilinga o Imnah;
ma Ishvi, ne hai ai laa de hagadiilinga o Ishvi;
aama Beriah, ne hai ai laa de hagadiilinga o Beriah.
45 Denga hagadiilinga o de aamuli o Beriah: go Heber, ne hai ai de hagadiilinga o Heber; ma Malkiel, ne hai ai laa de hagadiilinga o Malkiel.
46 Gai de ingoo o tamaa hine a Asher go Sarah.
47 Aanei hagadiilinga i de aamuli o Asher, gai taelodo o dangada alodahi iai se 53,400.
48 Gai aanei denga hagadiilinga i de aamuli o Naphtali:
go Jahzeel, ne hai ai de hagadiilinga o Jahzeel;
ma Guni, ne hai ai laa de hagadili o Guni;
49 ma Jezer, ne hai ai laa de hagadiilinga o Jezer;
aama Shillem, ne hai ai laa de hagadiilinga o Shillem.
50 Aanei hagadiilinga i de aamuli o Naphtali; gai taelodo o dangada alodahi iai se 45,400.
51 Gai taelodo o de gau Israel alodahi ne dau ga sisi olaadeu ingoo se 601,730.
52 Gai Tagi Maolunga ga hai ange gi Moses,*Num 34.13; Josh 14.1-2 53 “Aanei gilaadeu aau e vaevae ange de henua aagena; gai vaevaaea ange gi bei de taelodo o dangada gu dau i dahi aamuli. 54 Gai koe gaavange gi de aamuli e soa ono dangada de mommee laumalie, gai de aamuli e sogoisi ono dangada dahi mommee e damaa mee mai ange; gai vaevaaea ange gi denga aamuli alodahi olaadeu mommee gi danuaa ange taelodo dangada gu sisi olaadeu ingoo. 55 Aagai de henua e vaevae ange donu gi dangada i de hai tada. Gai gaavange de mommee o dahi aamuli, gi bei taelodo o hagadiilinga o olaadeu dubuna madagidagi. 56 Gai denga mommee e vaevae i de dada, ange gi de aamuli soa aama de aamuli e sogoisi dangada iai.”
57 Gai aanei denga hagadiilinga i de aamuli o Levi ne dau ga sisi olaadeu ingoo:
go Gershon, ne hai ai de hagadiilinga o Gershon;
ma Kohath, ne hai ai laa de hagadiilinga o Kohath;
aama Merari, ne hai ai laa de hagadiilinga o Merari.
58 Gai aanei denga aamuli o Levi: go de hagadiilinga o Libni, ma de hagadiilinga o Hebron, ma de hagadiilinga o Mahli, ma de hagadiilinga o Mushi, aama de hagadiilinga o Korah.
Gai Kohath go tubuna madagidagi o Amram. 59 Gai de ingoo o de bodu o Amram go Jochebed, ia se mogobuna niio Levi ne haanau i Egypt; gai ana dama ange gi Amram go Aaron, ma Moses aama delaau daina hahine go Miriam. 60 Gai Aaron ne hagadili Nadab, ma Abihu, ma Eleazar, aama Ithamar.*Num 3.2 61 Aagai Nadab ma Abihu ne maakau i de masavaa alaau ne hai ai ssigidaumaha i de ahi e dee alaange de hai, i mada luu mada o Tagi Maolunga.*Lev 10.1-2; Num 3.4
62 Gai taelodo o denga daane i de aamuli o Levi gu dagidahi olaadeu malama ga hanage ai se 23,000; gilaadeu tee dau madali de gau Israel, go hiidinga teai donu se mommee ne bolo ange gi gilaadeu madali de gau Israel ange laa.
63 Aanei dangada a Moses ma tangada haimeedabu go Eleazar ne dau, i de masavaa alaau ne dau de gau Israel i de mommee soe o Moab, i gaogao o Jordan, i de baasi laa o Jericho. 64 Aagai e deai donu se dangada i magavaa olaadeu alodahi ne dau, i de masavaa a Moses ma Aaron tangada haimeedabu, ne dau ai de gau Israel i de vao o Sinai. 65 Go hiidinga Tagi Maolunga gu tala olaadeu dagodo, e hai ange, “Gilaadeu e odi naa donu i de maakau i de vao.” Gai teai donu se gilaadeu ne ola, go Caleb donu huu tama daane a Jephunneh, aama Joshua tama daane a Nun.*Num 14.26-35