1 Tangada lodo senga e hagadaba i ono lodo,

“E deai donu se Maadua.”

Gilaadeu alodahi e hakino gee, alaadeu hegau e hai e baubau;

e deai donu se dangada e haia tanuaa.*Rom 3.10-12

2 De Maadua e galo iho i de langi ma e tilo dangada,

e tilo be hanu gilaadeu e heiangi, aabe hanu gilaadeu e saalaa de Maadua.

3 Gilaadeu alodahi gu huuhuli gee;

gilaadeu alodahi gu hakino gee;

gu deai donu se dangada e haia tanuaa,

gu deai donu se dangada daudahi.

4 E aha, dangada e haia de baubau tigi heiangi nei donu —

go gilaadeu e vaivai haia ogu dangada bei de gai a dangada pelaoaa,

gai gilaadeu e dee dalodalo ange gi de Maadua?

5 Gai olaadeu dagodo, de mommee e deai ai se mee hagamaatagu

gai gilaadeu e kona mmao de maatagu.

Gai de Maadua e hagassii saele naa ivi o dangada e hebagi adu gi de goe.

Koe gu hagadookaa gilaadeu,

go hiidinga de Maadua gu tili gilaadeu.

6 Mee naa gi humai de hagaola o Israel i Zion!

De masavaa a de Maadua e hagaahe ange ai de manuuia o ono dangada,

gai Jacob gi malangilangi, Israel gi lodo danuaa!