1 Tagi Maolunga, go koe dogu buibui;

koe gi dee hagadogaa ina loo au.

2 Hagaola ina mai au ma de hagamouli au i hiidinga koe e heohi;

huli mai doo dalinga ma de hagaola mai au.

3 Go koe de baba makaga oogu e buibui ai,

go de mommee oogu e maua i de hano aagena i masavaa alodahi;

koe gu hagadaba bolo au gi hagaola ina mai au,

gai go koe dogu baba ma dogu mommee buibui makaga.

4 Dogu Maadua, hagaola ina mai au i tangada alasala,

ma mai i lodo lima o de gau baubau ma de alasala.

5 Dogu Ia Aamua go Iahweh, go koe dagu tali hagalodolodo;

au ne hagadonusia goe mai i dogu gauligi.

6 Au ne dau adu gi de goe mai i de masavaa oogu ne haanau ai,

gai go koe ne hagasao ina mai au i lo te dinae o dogu dinana.

Au e tuhi naa donu huu goe ga hano ai.

7 Dogu mouli se hagailonga ange gi dangada soa,

aagai go koe dogu mommee buibui makaga.

8 Au e hai gi honu dogu ngudu i de tuhi goe,

ma de tala dagodo o doo mahamaha i taiao ga boo ai.

9 Koe gi dee dilia donu au i de masavaa oogu e madumadua ai,

gai koe gi dee huli gee i de au i de masavaa oogu e baageaa ai.

10 Go hiidinga ogu hagadaumee e pasa i de au;

gilaadeu gu hagasaele de hai e daa ai au gi magau

11 ma de hagataba, “De Maadua gu dee anga ange gi de ia;

gidaadeu ne doolohi ia ga poo,

i hiidinga e deai donu se dangada e hagaola ina ia.”

12 De Maadua, koe gi dee hagammao gee i de au;

dogu Maadua, hagamoolau mai, ma gi balea mai au.

13 Haia gi dookaa ma de llilo gilaadeu e hai baasi mai gi de au;

haia gi hagangadi mee ina ma teai selaadeu hagadubu.

14 Aagai au e dee tuu naa donu dagu tali hagalodolodo,

ma de hai gi kii ange dagu tuhi goe i masavaa alodahi.

15 Gai au e tala naa dagodo o doo heohi,

dau hagaola i laangi alodahi,

go hiidinga au e dee maua donu i de hagahidi ono dagodo.

16 De Ia Aamua go Iahweh, au e humai naa ga tala au hegau hagalele mouli;

au e tala naa dagodo o doo heohi, go doo heohi donu huu.

17 De Maadua, koe ne agoago mai au i dogu gauligi,

gai au goi tala donu huu dagodo o au hegau hagalele mouli.

18 Gai ga madumadua naa donu au ga sinasinaa dogu biho,

dogu Maadua, koe gi dee dilia loo au,

ga dae ai gi dagu tala ange dagodo o doo mmahi

gi denga atangada alodahi e loomai i muli.

19 De Maadua, doo heohi e hano ga dae gi lo te langi,

go koe donu huu e haia denga hegau nnui,

de Maadua, e deai ange donu e bei oo dagodo.

20 Koe ne hai gi gidee e au denga hai ngadaa lagolago ma de baubau,

gai koe e ahe ange naa ga hagaola dogu mouli,

ma de hagaahe age au i de mommee o de gau maakau.

21 Koe e hai gi laumalie dogu hagadubu,

ma de ahe ange ga hagaaneane ogu lodo.

22 Dogu Maadua, au e tuhi goe i de harp,

i hiidinga koe e hai hegau i de muna abodonu;

au e daahili ma de tuhi goe i de lyre,

de Ia Dabu o Israel.

23 Au e oo naa i dogu malangilangi,

i de masavaa oogu e daahili ai ga tuhi goe;

dogu hagasaalunga aau ne hagaola laa e tuhi hogi goe.

24 Gai au e tala naa dagodo o au hegau heohi i taiao ga boo ai,

go hiidinga gilaadeu e nnoho laa e daa au gi magau

gu hagadookaa ina ma de hagangadi mee ina.