1 Tagi Maolunga, hagalaangona mage basa mai gi de au,

go hiidinga au e daemaha ma de duasala.

2 Buibuia dogu mouli, go hiidinga au e hai hegau adu gi de goe i de muna abodonu.

Go koe dogu Maadua, hagaola ina doo dangada hai hegau;

au e hagadonusia goe.

3 Dogu Ia Aamua, abodonu mai gi de au,

i hiidinga au e dangi adu i taiao ga boo ai.

4 Haia gi malangilangi doo dangada hai hegau,

i hiidinga au e dalodalo adu gi de goe, de Ia Aamua.

5 Dogu Ia Aamua, koe e danuaa gai e degi,

gai e abodonu ange mmao gi dangada alodahi e hagahia goe.

6 Tagi Maolunga, anga mai gi dagu dalodalo;

gai hagalaangona dogu dangidangi adu i de abodonu.

7 Au e hagahi goe i laangi oogu e duasala ai,

gai koe e basa mai gi de au.

8 Dogu Ia Aamua,

e deai ange donu i magavaa o denga maadua e bei oo dagodo,

e deai ange hogi hegau e bei dagodo o au hegau.

9 Denga huaahenua alodahi aau ne hai e loomai naa

ga ino gi lalo ga daumaha adu gi de goe, dogu Ia Aamua,

aama de hagamahamaha doo ingoo.*Rev 15.4

10 I hiidinga koe e maolunga mmao gai e hai hegau hagalele mouli,

go koe donu huu de Maadua abodonu.

11 Tagi Maolunga, agoagona mai au i oo lodo,

gai au ga seesee ai i de muna abodonu;

haia gi madagu au i de goe i ogu lodo alodahi.

12 Dogu Ia Aamua, dogu Maadua, au e tuhi goe i ogu lodo alodahi,

gai au e hagamahamaha doo ingoo ga hano ai.

13 Go hiidinga oo abodonu mai gi de au e laumalie mmao;

koe gu hagaola mai au i lo te mommee gelo iai de gau maakau.

14 De Maadua, de gau hagamaolunga gu hebagi mai gi de au;

dahi hagabuulinga daa dangada e ssala hogi au e daa gi magau,

gilaadeu e dee anga adu donu gi de goe.

15 Aagai koe, dogu Ia Aamua, se Maadua e lodo aloha ma de degi,

koe e dee moolau de lili gai e lodo aloha mmao,

ma de hai hegau i de muna abodonu.

16 Huli mai ma gi lodo aloha mai gi de au;

hagammahi ina doo dangada hai hegau i oo mahi,

gai hagaola ina tama daane a doo hahine hai hegau.

17 Hagaagona mai gi de au de hagailonga o doo abodonu,

gi dookaa ai gilaadeu e kino i de au,

i de masavaa alaadeu e gidee ai,

i hiidinga go koe, Tagi Maolunga,

ne balea mai au ma de hagaaneane ogu lodo.