1 Duuhia Tagi Maolunga, dogu Baba makaga,

gai go de ia e hagaboo ina ange luoogu lima gi de hebagi,

aama ogu madannia gi taua.

2 Go ia e abodonu mai gi de au ma dogu mommee e mmuni ai,

ma dogu mommee buibui makaga aama dogu Ia Hagaola;

go ia dagu mee hungihungi ma dogu buibui;

go de ia e hagadee kii ina denga huaadangada.

3 Tagi Maolunga, se aha tangada gai koe ga anga ange ai gi de ia,

gai se aha tama a tangada gai koe ga maanadu ange ai ia?*Job 7.17-18; Psa 8.4

4 Tangada e bei de madangi o de manava;

ono laangi e mouli ai e bei de goohunga e ngalue laa.

5 Tagi Maolunga, haia gi singa iho dau langi, gai koe ga iho mai ai.

Boogia ange denga mounga, gi buu age ai de useahi.

6 Hagalabalaba ina dau uila ma gi hagamavaevae saele ina ai denga hagadaumee;

dilia dao o dau mee hholu gi ssenga ange ai gilaadeu.

7 Haalo ina mai doo lima i de mommee maolunga,

daangia age au ma de hagaola mai au i lo te moana gelo,

aama mai i ssauaa o de gau henua gee.

8 Gilaadeu e hadu muna,

gai alaadeu hagatoo donu e dee ni muna abodonu.

9 De Maadua, au e daahili adu gi de goe i dahi daahili hoou;

ma de hagadangidangi adu i de harp e madaangahulu ono daula,

10 ange gi de ia e dugua ange gi kii denga hodooligi,

ma de hagaola dono dangada hai hegau go David mai i de gadilaasa hagamaakau.

11 Hagaola ina au ma de hagamouli au mai i ssauaa o de gau henua gee,

go gilaadeu e daalaa denga muna hhadu,

gai olaadeu lima e hagatoo donu ai e daahanga dangada.

12 Gai amaadeu dama daane gi bei dagodo o denga manu e ssomo danuaa laa,

gai amaadeu damaa hine gi bei dagodo o denga duludulu

gu daadaa laa e hagaduu ai de hale o de hodooligi.

13 Omaadeu mommee doange gai

gi hoohonu i denga hagadaagangaa gai.

Amaadeu ssiibi gi hagadili gi lagolago ange i de mano,

gai manu i lodo amaadeu veelenga gi lagolago ange i tahisemada;

14 amaadeu kaau gi lagolago alaadeu dama,

gai gi deai alaadeu dama e ssege aabe gi dee haanau;

gai gi deai dangada e duasala i lodo omaadeu haiava.

15 E manuuia dangada e dagodo bee nei;

E manuuia dangada go Tagi Maolunga delaadeu Maadua.