1 Na lei vure soko tara sogha halavu tatavale na beti, ma Yahweh te bosa vania Joshua te vagha eni, 2 “Ko vilira hangavulu rua na mane sasakai sopa kema, 3 mo ko bosa vanira, ge kara holai hangavulu rua na vatu ivei tara tughuru iga na lei manesukaghi ghobuna na beti tina Jordan, ma kara holai ma kara ovuovu kolui tana bona kau kabu iga tana bongi taeni.”

4 Ma Joshua te holo kolura hangavulu rua na mane sasakai sopa kema, 5 me bosa vanira te vagha eni, “Kau tona ighobuna i Jordan inaghona na Bokisi ni Vetena ni Baubahu Tabu nina Yahweh, nimiu na God. Sopa sakai tamiu ke tabe datoa sakai na vatu, makau holavalai hangavulu rua na vatu, tango sakai ta hangavulu rua na kema. 6 Na vatu ini ka gonia na vatei ghanaghana oliana na beti te beto me mua tave. Tana lei bongi ke mai, ma ge kara huatighau rana dalemiu, ‘Na hava na ghanaghana iga na lei vatu raini?’ 7 Keri ge kau bosa tughu vanira te vagha eni, ‘Na lei vatu raini tai ghanaghana olia iga na beti tina Jordan te mua tave tana bona tara hola halavua na Bokisi ni Vetena ni Baubahu Tabu nina Yahweh.’ Na vatu ini kara tughuru iga didira na vatei ghanaghana oli rana Israel.”

8 Na vure tara goni taonia na hava Joshua te bosa vanira nia, mara holai hangavulu rua na vatu sule ighobuna na beti tina Jordan taonia sopa kema taonia na hava Yahweh te bosa vania nia Joshua. Ra holai na vatu va ivei tara taludatoi ga na vale tapole, gara vara datoi ivei tara nea na lutuani. 9 Ma Joshua ghua te kisua sakai na vatei ghanaghana oli nia hangavulu rua na vatu i ghobuna na beti tina Jordan tana bona tara tughuru iga na lei manesukaghi tara holaa na Bokisi ni Vetena ni Baubahu Tabu. Me ghana so ritini mai so itaeni na vatei ghanaghana oli eni.

10 Na lei manesukaghi tara hola na Bokisi ni Vetena ni Baubahu Tabu tara tughuru beto i ghobuna na beti tina koekobe ra goni kale sokoi na lei bosana Yahweh te vahea Joshua. Aeni te vagha na hava Moses te aravaghighi.

Tana bona ia eni, na vure tara mina sakutua tana pari mamaha va na beti tina. 11 Mi tana bona gaira udolu tara sara ilevuna na beti tina vaho gera sakutua halavu, rana manesukaghi tara hola nina Bokisi ni Vetena ni Baubahu Tabu Yahweh. 12 Na lei malaghai tana kemadira Ruben ma Gad, maia na vike a Manasseh, tara idevira rana Israel na sogha halavuana na beti tina taonia nina arevaghi Moses. 13 E vati hangavutu na togha ni malaghai laga raini tara gonigonidila ni veitotoghoni tara sogha halavua na nanata Jericho tana matana Yahweh.

14 Tana dani vaghana eni a Yahweh te nea Joshua ge haba vule tana matadira na vure ni Israel, mi tana lei bongi ni volana te vagha tara nea iga Moses idania.

15 Mi muruna eni Yahweh te bosa vania Joshua, 16 ge ke kokokoe sule vanira na lei manesukaghi tara holaa na Bokisi ni Vetena ni Baubahu Tabu ge kara dato sania na beti tina. 17 Ma Joshua te goni taonia na hava God te bosa vania nia.

18 Tana bona tara dato sania mai na beti na lei manesukaghi ini, na beti te vuivuni ni ghoe tave oli te ghaghua haia iga me saravia na kakaburuana/keburuana na beti.

19 Rana vure Israel tara sogha halavua na beti tina Jordan tana hangavulu/paregho na bongina na vuivuni na vula tana niulu,*vuivuni na vula tana niulu Tana leu ni Jew, Abib, eruani na ahana Nisan. Abib te vuivuni tana na vula torogha imurina hangavulu sakai na vula March. mara ghaha na bona tara holoa nia Gilgal, tana paleva uluna Jericho. 20 Iga Joshua e holai hangavulu rua na vatu tana beti tina Jordan, me varavarai. 21 Ma Joshua e ghoi bosa vanira rana Israel, “Tana lei bongi ke mai nagho, rana lei dalemiu igeva kara huatighau ma kara ghaghua, ‘?Na hava na ghanaghana iga na lei vatu ini?’ 22 Keri gekau bosa tughu vanira te vagha eni, ‘Iani rana Israel tara sogha halavua na beti tina Jordan tana bona te mamaha. 23 Tana matamiu, a Yahweh, nimiu na God, te nea ge mamaha na beti tina ritini ighau udolu tau soga halavu, te vagha te nea iga ge mamaha na tahi Sisi ga sogha halavu ighita udolu. 24 E nea te vagha eni ge na lei taba ni vure tana maramana kara manahana nina maana Yahweh, ge kau nia kikinima a Yahweh, nimiu na God, itaeni maia ke va me va.