3
Jon walitogh ár end yefrende
1 Njam tuk warsagh ár Kaisar Tiberiusém télimndau Rom 15 yunjéf, táf Fontius Failet témorwén Judiamén gafana, Erod témorwén limánégh ár Galili yuwon, Erode yánngén Filif témorwén limánégh ár Itulia a Trakonitisan a Lisanias témorwén limánégh ár Abileneyan, 2 a táf Anas a Kayafas ghéngén wárogh sénko ár tarwén, Buk si yénmormén Jonefaf Jakarayane ambumoefaf fanfne yuwon. 3 Yémon yarendam méinyotio Joden yu, si táitotau walitoghmén a tawalitotau yaufita awengoghét. 4 Ndernáye yéfarotaménd Buk sian Ngánjánene mat yátogh ár Aisayane si,
“Ámb ár ke nutne fanfne yuwon,
'End frengéghét Yuraye álighét,
wafrogh mbarkánd end yáyot.
5 Méinyotio yékwyékw wéfángéghét
a méinyotio mband tunakéf fénarghét a fafatot.
Méinyotio ménjuté end so em mbarkánd
a yaufi end so em frengéghkaf.
6 A méinyotio árém so tinjongi Ngánjánene wanjarégh.'”
7 Jon norayai ár mérénfaf árké tanmorwén nuwot walitoghét yáfaf, “Fém kamban ghérsafé ár mérén! Emon fém emndai Ngánjánene nékwta sái kenngongi? 8 Yénayam so ewafrotati árkéménayam féfe so tayaufrongi ndené té nawengongi yaufita. A yau yaufi si kufngongi féfenjo kénjún ndené, 'Ebraam siyém téfene áki.' Yéndo emndetan fém ndené yéné wím tambén Ngánjánam so tautorngé ambum Ebraameyot. 9 Mbilé siyém frengéghkaf yém wén sérémb néfghét, a árké wénam yau njam mer mbwe yéfuna yéné wén siyém néfghét a fését wighét.”
10 Ár mérnam yémotayénd, “Némé yéndfem so yafrotam yénandmé?”
11 Joném ewawangoi, “Ár efe sómbio sodafé njam yém ámb ároe so taramangé, a efe njamkefé yém ndenéyameyo so yafrote.”
12 Mani kafégh ár ndenéyameyo enmormén nu walitoghét, fá namotayénd, “Watamegh ár, némé so yafrotam?”
13 Yémon emndai fá, “Yau féfenjo méndeye takafangi kétamé némé té engémndan.” 14 Ámb fiyaram wéi yémotayéng, “Yéndfem némé so yafrotam?”
Yémo ewawangoi, “Yau ewarémnati maniot ár o ekafetati unyéghe a eremngotati féfenjo fayam.”
15 Ár kawanjetawét oyárghafé a méinyotio tikfan kéwérsotawét nde Jon némé Keriso namndé. 16 Joném ewawangoi méinyotioat, “Yéndon ewalitotan fém nue. Wénde efe tane soramé yéném tane muyé so taindangé, endene sandol ángégh fénaghét yénd féyotarofnar wém. Yémon so ewalitote fém Ngánján Mbérmbére a fése. 17 Fá siyém frengéghkaf yém njénro faloghét kétándmé fifiyafé mbwe yánjo foke. Kétándmé yémon so yésámbune saf, so euménde fifiyafé mbwe yánjo méngo kénjún, wénde so tawarongé njénro kémboghofnar fése.” 18 A ámb tárfár sie Joném tawawéngsotau ár a mer si tawawaitotau yéfeyot.
19 Wénde njam Joném yarnam Erod limánégh ár ménamén yémon nawerai yánngnoene amaf, Erodias a ámb yaufiyam ewafrotam, 20 Erodém yasamngoi yénandmé yéfefaf. Jon yélawayénd kwéfkwéf méngon.
Yesuene walitoghmén
21 Njam méinyotio ár ewalitotam, Yesu wéi yálitotam. Njam fá Ngánjánafé oraighan témorwén njafar táf nasawéryéng, 22 a Ngánján Mbérmbér néneworyéng Yesuefaf men kénjúmé ndenanit mamu. Si yénmormén kétándmé njafarta, “Fém ném tane uwéghafé ambum, yénd minde náuwétan fefaf.”
Yesuene ákiafenemén
23 Yesu namndai 30 yunjéf táf yánjo ásáfogh yérnyai.
Yesu maratan nakmai ndené Josefene ambum yém
Josef témorwén Eliene ambum,
24 Matatene ambum, Lefiene ambum, Melkiene ambum,
Yanaiene ambum, Josefene ambum,
25 Matatiasene ambum, Amosene ambum,
Nakumene ambum, Esliene ambum, Nagaiene ambum,
26 Matene ambum, Matatiasene ambum,
Semeinene ambum, Josekene ambum, Jodene ambum,
27 Joananene ambum, Resane ambum,
Jerufafelene ambum, Sialtielene ambum, Neriene ambum,
28 Melkiene ambum, Adiene ambum,
Kosamene ambum, Elmadamene ambum, Erene ambum,
29 Josuane ambum, Elieserene ambum, Jorimene ambum
Matatene ambum, Lefiene ambum.
30 Simionene ambum, Judane ambum,
Josefene ambum, Jonamene ambum, Eliakimene ambum,
31 Meliane ambum, Menane ambum,
Matatane ambum, Natanene ambum, Deifidene ambum,
32 Jesiene ambum, Obedene ambum,
Boasene ambum, Samonene ambum, Nasunene ambum,
33 Aminadafene ambum, Ramene ambum,
Ejronene ambum, Feresene ambum, Judane ambum,
34 Jeikofene ambum, Aisekene ambum,
Ebraamene ambum, Terane ambum, Naorene ambum,
35 Serukene ambum, Reuene ambum,
Felekene ambum, Eferene ambum, Selane ambum,
36 Keinanene ambum, Afasadene ambum,
Semene ambum, Noane ambum, Lamekene ambum,
37 Metuselane ambum, Inokene ambum,
Jaredene ambum, Maalalelene ambum, Kenanene ambum,
38 Enosene ambum, Setene ambum,
Edémene ambum, Ngánjánene ambum.