3
MUNU PINAKARRIMAPULALU NGARRKAKU (3:1-24)
1 Kuwiyirrangungu jintangapa jurru mirlkawarrangu waninyikinyi. Mirtawa japirr marna jurrulu, “Ngani wurrarnangu Ngarrkalu? ‘Mayi munu ngananyaku wiyirrja mungkarranguja yintanga’? Palajun muwarr pirningu?” 2 Yimpirnili mirtawalu, “Jintarranguja mungkaja yintaja ngalkulupalayi. 3 Wurrarnangalayaku Ngarrkalu, ‘Waraja mungkajakun yintanga waninyi, partijirri kaninyja, mungka marramarranga, palaja munu ngananyaku mayi, munu warlinakupa pala mungka, marlkarringimarra’.” 4 Jurrulu wurrarnala, mitu marna, “Nyuntu munu marlkarri jarruluman. 5 Palamaja mungkaja ngalkuluman, Ngarrkakapali jarruluman, miranu ngalypakupa kurluku. Palaku Ngarrka malyparr karrinyi. Palangamarra wurrarnangu, ‘Munu palamaja mungkaja ngananyaku’.” Mitulu wurrarnalu jurrulu, “Munu pinakarra Ngarrkanga.” 6 Mayi parrjarn-parrjarnikinyi mirtawalu, kurlkalkalu parrjarnakinyi, ngalypakata. Kurlkali marnakinyi, “Miranu jiliminyi palamalu mayilu.” Ngarrkakapali miranu jarrinyaku karrinyikinyi mirtawa. Palaja nyarrakarti mungkakarti yana, mayi ngartarna, ngana. Jinta nyupanga palinymilingi yinyali. Palinyju pukurl ngana. 7 Kurlkapirli jarrinyipulu, yirrirnipularninyi kurta waninyikinyipulu. Palaja kurntany jarrinyipulu. Palajalu yarni marnapularninga jirrji parrkajalu wirtujalu.
8 Jarurrukartingi Ngarrka jina pinakarrinyipulu jakarr-jakarrkarra yintanga marntija. Wirntijartiny kuku jarrinyipulu mungkarrangungu Ngarrkangamarra.
9 Pirirriku kamarnalu Ngarrkalu, “Wanyjarningi nyuntu?” 10 Puntaju marnalu, “Yuu, yintanga pinakarrinyarnanta nyuntu marntija. Kurta waninyikinyirni. Palajalu wirntijartiny ngaju, kuku jarrinyarnangu.” 11 Japirr marna Ngarrkalu, “Nganija miranu jarrinyan kurta waninyikinyin? Nyarraja mungkaja, ‘Marrngu Miranu Jinakata Ngalypakupa Kurluku’, palaja mayi nganan nyuntulu?” 12 Pirirrilu wurrarnalu, “Nyuntulu mirtawangarra yinyanyin nyungu. Palaja mungkaja yinyanyi palinyjungarra, mayi nganarna.”
13 Mirtawa japirr marna Ngarrkalu, “Ngani jirnin nyuntulu?” Wurrarnala, “Jurrulu mitu marnanya, palinyja muwarrja nganarna.”
14-15 Jurrungu wurrarnala Ngarrkalu, “Kurlu yija jirnin nyuntulu. Puntaju kurlu jilamarnanga yija, munu jinta kuwiyirranguku, nyuntukujakun.
Ngarlungungarra yankuluman.
Kurlurlu ngalkuluman ngarramarnti.
Malyparr jilamarnanta mirtawaku,
Mirtawa malyparr jilamarnanga nyuntuku.
Partanykarrangupa nyuntumili mirtawamilipa kulilu yirrilipiyarninyi.
Jurnturtu nyuntu pijurnanga jilamanta yija mirtawamilalu partanyjupa,
Jina paliny pijurnanga jilaman yija nyuntulu.”
16 Mirtawanga wurrarnala,
“Parra-parra wirtu yungkulumarnanta yija partanyja kanganyaja.
Miranungarra nyuntu partanyja kanganyaja parra-parraku,
yirrku yiji pirirriku marrapa karrirrulumanpalu.
Nyampali wantulumangu yija nyuntuku.”
17-19 Palaja pirirringi wurrarnala Ngarrkalu,
“Mayi nyarra wurrarnarnangu munu ngananyaku.
Munu pinakarrimajinpa nyuntulu.
Nyuntumilija mirtawaja muwarrja mayi nganan nyuntulu
palaja mungkaja.
Puntaju warrarn kurlu jilamarna yija ngajulu.
Turlpulupiyi parupa jiripa nganin-nganinpa.
Nyuntulu mayiku kanyjilamanpa ngarramarnti.
Mayiku pirti marrjalu karlinyarruluman,
karrpurrangu karrpurrangu ngartarnarruluman,
yijalu jirrmilju ngalkulumanta.
Marlkarrija, jungka jarruluman.
Jipi jirnirninti jungkaja,
Kurlurluja jirnirninti.
Marlkarrija, jungka jarruluman yarranakanu.”
20 Pirirrimarninyju yini marna palinymili mirtawa, “Eve”. Pipi nganyjurruku wiyirrku.
21 Palaja wurru karnuja kuwiyija yarni marnapuluka Ngarrkalu, wirrirnipuluku palinyju, Adam-kupa palinymili mirtawaku. 22 Palaja Ngarrkalu wurrarna, “Marrngulu munu pinakarrimiji. Mungkaja Marrngu Miranu Jinakataja purlpi ngana. Paliny kuwarri nganyjurrukapali, kurlkapirli waninyi ngalypakupa kurluku. Ngalali palamaja warinyjapa mungkaja, wankanyu kalkunakataja. Palaja wankanyu wantuliny ngarramarnti, marlkarrimajirri wantuliny. Ngampa pilamarna ngajulu ngananyangamarra.”
23 Palajangarra Eden-jangarra yintaja ngakarnapulinyi Ngarrkalu. Jalanga ngakarnapulinyi, karlinyaku jungkaku, mayirrangu jungkanga wirrinaku, mayiku pulanymilaku turlpanya jinaku.
24 Palaja Ngarrkalu wirrirni angel, kakarra palanga yintanga, wirtu pukun wirrkanapinti. Milya warinykurnu warinykurnu yananyikinyi pala wirtu wirrkanapinti, parrparrpa karra marninyi. Palanga angel-ja wurrarnala Ngarrkalu, “Nyuntulu ngampa pinaku marrngu ngalpanyajaku wangka pala mungkakarti, pala wankanyu kalkunakatakarti mungkakarti.”