PINAKARRULUMAN! NYUNGU MUWARR NYUNTUKU
Nyungu muwarr nyuntumili.
Tuku jilaman.
Tukulu parrjalaman nyuntulu
Palaja miranu jilaman wariny
Unknown if consultant checked.
1
# 1
Munumpa: Nganurtulu jini jungkapa kujungurrupa parlparr?
 
Miranu jinakata: Warajalu.
# 2
Munumpa: Nganurtulu jini karrpupa wirlarrapa panikatarrangu wiyirr?
 
Miranu jinakata: Palalu warajalu.
# 3
Munumpa: Nganurtulu jini mujungupa wirlujurapa ngapa?
 
Miranu jinakata: Palalu warajalu.
# 4
Munumpa: Nganurtulu jini kangkarupa maruntupa ngurlarn?
 
Miranu jinakata: Yijalu palalu warajalu.
# 5
Munumpa: Nganurtulu jinipulinyi walangkarrangu pirirripa mirtawa?
 
Miranu jinakata: Yijalu palalu nyarralu jinipulinyi. Palinyju jinijaninyi wiyirrngarra yija, parlparrjapa jungkangapa kujungurrungu.
# 6
Munumpa: Nganurtu yini paliny?
 
Miranu jinakata: Paliny marlu yinijartiny. Wurrarnala pala purlpija mirtanyanga yatilja nyampalingi, ngapingi, Muwujujungu, “Ngajumili yini 'Ngaju Ngarramarnti Ngajungarra'.” Wariny yini “Ngarrka”. Jintalu yini marnayi “Japartu Kankajirri”.
# 7
Munumpa: Wunyjurru? Ngarrkalu muwarr pini marrnguku?
Miranu jinakata: Yu. Purlpimalu muwarr palinyju yinyajanaku wiyirrku. Ngalypakata pala muwarr. Marni pini kapuralyja warnkungujirri. Yinyali nyarranga mirtanyanga yatilja, Muwujujungu.
# 8
Munumpa: Wunyjurru? Marrngurrangulu pinakarrinyikinyiyili muwarrku?
 
Miranu jinakata: Munu. Palaku malyparr karrinyiyili, panypanyikinyiyili.
# 9
Munumpa: Ngani jini Ngarrkalu?
 
Miranu jinakata: Wurrarnajanaku, “Yijapa yirrkulu panypanyalupijinyurru ngajumilingi muwarrja, marlkarri jarrulunyurru.”
# 10
Munumpa: Wunyjurru? Marlkarri jarrinyiyi jinta?
 
Miranu jinakata: Yu. Pirirrimartapa mirtawanyjarripa partanykarrangu marlkarri jarrinyiyi.
# 11
Munumpa: Wunyjurru? Marlkarri jarrulamarna ngaju?
 
Miranu jinakata: Yu. Ngarrkalu wurrarnajanaku, “Yijapa pinakarrinya wirrilaman ngajumili muwarr, marlkarri jarruluman.”
# 12
Munumpa: Wunyjurru? Panypanyarnala palinymilingi muwarrja?
 
Miranu jinakata: Yu, panypanyanpili palinymilingi muwarrja, nyuntu pukun. Ngarrkalu wurrarnajanaku, “Wiyirrju kurlujartiny jinayi. Wiyirr yiji ngajungu panypanyakatarrangu.”
# 13
Munumpa: Wunyjurru? Ngarrka kulijartiny ngajuku?
 
Miranu jinakata: Ngarrkanga ngayinyja wiyirr marrngu. Kuli paliny marrnguku jampa kurlujartiny jinayi.
# 14
Munumpa: Wunyjurru? Marlkarri wirlalaminyi?
 
Miranu jinakata: Pinakarra! Ngarrkanga ngayinyja nyuntu yija yiji, palinyja ngayinyja marrngurrangu wiyirr. Munu wirlanaku karrinyijanaku. Palinyngarra marlkarri jarrinyinganyjurruku wiyirrku, wanka jinaku nganyjurruku.
# 15
Munumpa: Ngarrka munu marlkarri jarrinyaka! Wunyjurru marlkarri jarrinyinganyjurruku?
 
Miranu jinakata: Pinakarra! Ngarrka munu marrngukapali. Marrngu warajajartiny pirlurrjartiny palinyja kaninykurti. Ngarrka wariny. Ngarrka kujarrapa waraja pirlurrarrangujartiny palinyja kaninykurti.
Kujarrapa waraja pirlurr:
Japartupa Partanypa Ngalypakata Pirlurr.
Japartumili yini Japartu Kankajirri.
Partanymili yini Jiyijaji.
Wariny Pirlurr kujarra yinijartiny,
Ngalypakata Pirlurrpa Kurlumajirrikata Pirlurr.
Palarrangu kujarrapa waraja pirlurrarrangu Ngarrkanga kaninykurtingi waninyayi. Ngarrka warajajakun yiji, kujarrapa waraja pirlurrarrangujartiny.
Purlpimalu Ngarrkalu ngakarna Jiyijaji jungkakarti nyungukarti, kawujartinyku jarrinyaku. Miral jarrinyi partany, wirtu jarrinyi, marrngu jarrinyi. Pala Ngalypakata Pirlurr milpanya, kaninykurtingi Jiyijajingi waninyili.
Palajun Ngarrka marrngu jarrinyi, palinymili ngurra jini marrngurrangungu.
# 16
Munumpa: Wunyjurru? Jinta yinijartiny Jiyijaji?
 
Miranu jinakata: Yu. Jiyijaji yini marlujartiny. Yinilu palinymilalu miranu jiniyinganyjurrinyi palinyku.
Wariny yini “Yimanyuwil”. Palalu wurraninyi, “Ngarrka Waninya Nganyjurrungu”.
Wariny yini “Jiyijaji”. Palalu wurraninyi, “Ngarrkalu Wanka Jininganyjurrinyi”.
Marlumal yini marnayi Jiyijaji “Kurayiji”. Palalu yinilu miranu jinanganyjurrinyi Jiyijajiku, Ngarrkalu wirrirni nyampali nganyjurruku.
# 17
Munumpa: Walangkarrangu Jiyijaji Ngarrkanga waninyi ngarrakuny. Nganiku Ngarrka yakarna, nyungukarti warrarnkarti milpanya marrnguku jarrinyaku?
 
Miranu jinakata: Yija palinyja ngayinyja nyuntu, palinyja ngayinyja marrngurrangu wiyirr pukun. Palajunjalu marrngu jarrinyi, marlkarri jarrinyaku nyuntuku, marlkarri jarrinyijanaku wiyirrku marrngurranguku. Kartuwarra marnanganyjurrinyi wanka jinaku, Ngarrkalu munu wirlalkulinynganyjurrinyi.
# 18
Munumpa: Ngani? Jiyijajilu kurlujartiny jini?
 
Miranu jinakata: Munu. Yijalu munu kurlujartiny jinama. Ngarrkamilaku muwarrku pinakarrinyikinyalu ngarramarnti.
# 19
Munumpa: Wurrarnajin panypanyakatarrangu Ngarrkanga marlkarri jarrulupiyi. Jiyijajilu munu panypanyala Ngarrkanga, munu kurlujartiny jinama. Palajanga nganijalu marlkarri jarrinyi?
 
Miranu jinakata: Munu marlkarri jarrima palinymilaku kurlujartinyku. Marlkarri jarrinyi nyuntumilaku kurlujartinyku. Marlkarri jinajalu kartuwarra marnanta nyuntu, kartuwarra marnajaninyi jinta wiyirr. Palajalu marlkarri jarrinyi.
Nyuntulu kurlujartinyju ngarlu kurlu jinin Ngarrka, pajuju pinin.
Kurlujartinyja nyuntumilija kulilu yirrirnikinyinti, wirlalamanta.
Purlpi Jiyijajilu kartuwarra marnanta.
Yijalmarta jilkulumanpili Jiyijajingi, Ngarrkalu munu wirlalamanta nyuntumilaku kurlujartinyku.
Purlpi wirlarna Jiyijajingarra nyuntumilaku kurlujartinyku, puru ngakanaku nyuntuku.
Yijalmarta jilamanpili Jiyijajingi nyuntulungarra.
Palajalu Ngarrkalu munu kulilu yirrilamanta, nyuntu partany palinymili jilamanta, ngarlu ngalypa wantulumangu.
Ngalypakata Pirlurr palinymili wirrilamangu jurti jinaku ngalypaku.
Munu wirlalamanta. Munu yiji!
Wankanyu ngarramarnti jilamanta!
Marlkarri jarrinyaja yankuluman Ngarrkakarti, palinyja kajalaman ngarramarnti.
# 20
Munumpa: Wunyjurru? Jiyijaji marlkarri waninyi ngarramarnti?
 
Miranu jinakata: Munu. Kujarraja warrukartija Ngarrkalu wanka jini marlkarrija. Palaja kanka yana Japartukarti, Ngarrkakarti.
# 21
Munumpa: Ngarrkalu ngalypa yiji jinaja ngajuku.
Kurlujartiny jinirni.
Ngarrkalu ngakarna Jiyijaji kartuwarra manaku ngajuku.
Kuwarringulu munu kulilu yirrilaminyi, ngarlu ngalypa wantulupiji.
Palinymili partany jininyi.
Wankanyu jininyi ngarramarnti.
Ngajungu wirrirniji palinymili Ngalypakata Pirlurr jurti jinaku ngalypaku.
Puntajulu wunyjurru jilamarna ngajulu palinyku pikaly jinaku?
 
Miranu jinakata: Kuwarri Jiyijajingi yijalmarta jinaja, Kurijin yatil japirr malaman, miranu jilamanta wiyirrku Ngarrkamilaku, ngapanga jilamanta. Palajunjalu jurti jilamanjaninyi wiyirr jampa kuwarringulu Jiyijaji nyuntumili nyampali, yirrkulu palinyja muwarrja jilaman.
Kuwarringulu nyuntu munu nyuntukapali, marlkarrijakapali wankanyu nyuntu. Kuwarringulu nyuntu marrngukapali warinykapali, kawungu Jiyijajingarra yirrku wankanyu nyuntungu. Palinymili Pirlurr Ngalypakata kaninykurtingi nyuntungu yirrkulu ngayiny nyinga malamanta ngalypajartiny jilaman, ngayiny nyinga malamanta karrkanaku kurlu jartinyja. Yirrkulu yakurr malaman, ngalypa jilaman palinymilija nyinga manaja, karrkalaman nyuntumilija. Palajun jinajalu wiyirr miranu nyuntuku, marlkarrijakapali wankanyu nyuntu, kawungu nyuntungu Jiyijaji wankanyu, nyampali nyuntuku. Nyuntu kuwarringulu kurlumajirrikata waninyaku karrpurrangu karrpungu.
# 22
Munumpa: Wunyjurru kurlumajirrikata yirrku wantulumarna?
 
Miranu jinakata: Karrpurrangu karrpungu Jayitanju yakurr malamanta warinykurnuku, palinymilingi. Yijapa marlumal kurlu jilaman. Yijapa marlumal kurlu jinaku karruluman. Karrpurrangu karrpungu nyuntulu wurralamanpili Ngarrkanga, “Japartukayi, kuwarri ngaju munu kurlujartiny jinaku karrinyarni. Kalkuluminyin nyuntulu kurlungumarra. Tuku jilaminyin.”
Jayitanju yirrkulu karrinyi kurlu jinaku. Wurralamangu, “Munu pinakarrinyaku Ngarrkanga! Ngajumilingi muwarrja jilaman!” Jayitan munu nyampali nyuntuku. Nyuntuku nyampali Ngarrkangarra. Pinakarrulumanpalu Ngarrkanga nyuntulu, munu pinakarrulumanpalu Jayitanja. Yirrkulu japirr malaman Ngarrka, “Kararr jiliminyin kurlungumarra.” Yirrkulu Ngarrka Ngalypakata Pirlurr kaninykurtingi nyuntungu waninyangu. Pinakarrulumanpili! Palinyjungarra kararr jilamanta kurlungumarra. Palinyju ngayiny nyinga malamanta ngalypaku, ngalypa jilaman Ngarrkamilingi muwarrja.
# 23
Munumpa: Yijapa watarrkulu kurlujartiny jilamarna.
Yijapa junturtungu kurlu muwarr kurlkarri malamarna.
Yijapa kurlujartiny muwarr pilamarna.
Yijapa jilamarna kurlujartiny.
Palaja ngani? Wunyjurrulu jilamarna ngajulu?
Palaja ngaju Kurijin?
 
Miranu jinakata: Yu, yirrku Kurijin nyuntu.
Janyinju wurralamanpili Ngarrkanga, “Ngajulu kurlujartiny jinirni.
Nyuntu ngayiny kurlu jinirninti.
Paju karrinyarna.
Kurntanyja waninyarnaji.
Jiyijaji kartuwarra ngajumili. Purlpija paliny wirlarnan ngajumilingamarra kurlujartinyjamarra. Palajalu munukurra wirlalaminyin jampa kurlu jinajaku. Yarrana jurtukartingi jilipijin.”
# 24
Munumpa: Nganijalu Ngarrkalu pinakarrinyanyi ngaju?
 
Miranu jinakata: Yijalu Ngarrkalu yirrkulu pinakarrinyangu. Nyuntu palinyja ngayinyja. Yirrkulu nyuntulu muwarr pilamanpalu. Palakungarra karrinyi.
# 25
Munumpa: Nyanga yirrilamarna Ngarrka?
 
Miranu jinakata: Munu kuwarri jirtamarralu yirrilaman. Jiyijajilu wurrarnangu, “Yijalmarta jilipijin. Yarti nyuntu marlkarri jarrinyaja wanka jilamarnanta marlkarrija. Palaja Ngarrkanga wanka wantuluman ngarramarnti.” Palaja ngalypalu yirrilaman. Wantulumanpili ngarramarnti.
# 26
Munumpa: Wunyjurru? Jiyijaji kulpuliny nyungukarti?
 
Miranu jinakata: Yu. Jiyijajilu wurrarna, “Warajanga karrpungu ngaju yarranakanu milpulumarna, janyin.” Yu, janyin milpuliny, mujungungu, marrngulu wiyirrju yirrilipiyi. Kunmu jilkulinyjaninyi palinymilirrangu wiyirr, ngunarrijirrija warrarnjajirri. Kunmu jinakanu kangkulinyjaninyi kankajirrikarti, Japartukarti.
# 27
Munumpa: Jintaku ngani?
 
Miranu jinakata: Ngarrkalu jinta wiyirr wikakarti wirtukarti jurtu ngakalkulinyjaninyi ngarramarnti. Pala wika jakarnajanaku Jayitankupa Jayitanmili mirurrurranguku wiyirrku. Parnpilkulinyjaninyi palarrangu mirurrurrangu kaninykurti palanga wikanga. Panypanyajarrangu marrngurrangu pukurl parnpilkulinyjaninyi palanga wikanga. Yija purlpi kulurnukinyiyarninyi Jayitanja, palinymilirrangu jiniyarninyi. Palajalu yaninyaku Jayitanmilikarti, waninyaku Jayitanjaku. Palangangarra kaninykurti wantulupiyi ngarramarnti, Jayitanpa palinymilirrangupa palarrangu wiyirr Ngarrkanga panypanyajarrangu. Nyarra wika wirtu munu jupuliny, kampuliny ngarramarnti. Palarrangu panypanyajarrangu yija-yiji kurluny-kurlunyja wantulupiyi ngarramarntipa ngarramarnti.
# 28
Munumpa: Karrinyarnajanaku marrngurranguku wiyirrku kajalapiyi Ngarrkanga. Munu karrinyarnijanaku yananyaku palakarti wikakarti. Karrinyarni wurranaku marrngurranguku wiyirrku Ngarrkapa Jiyijajipa Ngalypakata Pirlurr. Wunyjurru jilamarna?
 
Miranu jinakata: Ngarrkamilirrangu marlumal kunmu jarrulupiyi pinakarrinyaku palinymilaku muwarrku, palaku “Payipul”-ku. Marlumal kunmu jarrulupiyi, nyuntu pukun, miranu jarruluman Ngarrkamilaku muwarrku.
Kunmulu ngayinyja nyurra malkulunyurru Ngarrka, wurralkulunyurrulu, “Nyuntu ngalypakata yija. Yarranijayi! Nyuntulu wanka jininnganinyi. Ngayinyja nganarnanga nyuntu yija.” Palajunmartalu pikalyju nyurra malkulunyurru, kurntalkulunyurrulu pukun.
Kurrngal kurluny-kurlunyja waninyayi. Japirr malkulunyurru palinyju tuku jilkulinyjaninyi. Japirr malkulunyurru nganipa jilkulunyurrujanaku.
Warinyarrangu wurrkujartiny. Japirr malkulunyurru ngalypa jilkulinyjaninyi.
Jintapa jinta yiji munumpa waninyayi Ngarrkaku. Japirr malkulunyurru marrngurrangu mankulinyjaninyi ngakalkulinyjaninyi palarranguku jintarranguku, wurralapiyijanaku paliny.
Palinymilaku muwarrku miranu jarrulaman ngarramarnti. Palaku miranu jarrinyakanu, kurlkarri malaman ngarramarntilu, yijalmarta jinangulu jilaman! Wurralamanjanaku jintanga miranu jarrulupiyi Ngarrkaku. Nganipa jarrinyaja yirrkulu Ngarrkanga nyurra malaman.
# 29
Munumpa: Yu, nyungu muwarr ngalypakata yiji.
Ngajulu yakurr malamarna palajunmarta jinaku,
nyarra muwarr wurralamarnajanaku kurrngalja pukun.
JIPI.