3
JIYIJAJILU PIRIRRI KARNU WURRKUJARTINY NGALYPA JINI
Warajanga karrpungu Jiyijaji tawunja waninyi. Palanga pirirri wurrkukata, kurlu yiji karnu paliny. Yirrirni Jiyijaji, milpanyili, murtingi jurlpi-jurlpi jarrinyalu, ngarlu japirr marna,
“Wanka jiliminyin, karnu ngaju ngalypa jiliminyin. Wunyjurru nyuntulu karrinyanpa?”
Jiyijajilu jirranakanu parirr warlirni.
“Yu, karrinyarnangu ngalypa jinaku. Kapuraly yiji jilamarnanta.”
Jampangarra pala wurrku munu jarrinyalu, karnu kapuraly jarrinyi pala marrngu. Jiyijajilu wurrarnala,
“Munu wurralamanjanaku ngalypa jinirninti ngajulu. Pipurru yatilkarti yarra. Palinyju yijalu parrjalamanta kawu wiyirr nyuntu, nyuntu karnu kapuraly. Nyuntu miranu palaku muwarrku nyuntumilaku wurrkuku. Purlpimalu Ngarrkalu wurrarnalu Muwujujungu mirli-mirlingi yarntanaku. Palinyja muwarrja kukurnjari wankanyu yatilkarti kangkuluman. Palalu yatilju kampalkuliny tikirlkarti, jurnpakartijakun. Palajalu marrngurrangulu pala yirrinajalu nyuntuku miranu wantulupiyingu, kapuraly nyuntu, wurrkumajirri.”
Palajun wurrarnili Jiyijajilu. Palaja pirirri ngakarna yatilkarti.
Pala pirirri munu jama wanima, wurrarnakinyijanaku marrngungu. Nyarrakurnujirri muwarr jakurl kanyayijanaku,
“Jiyijajilu ngalypa jinijaninyi wurrkuja!”
Palajalu kurrngal yiji milpanyikinyiyalu pinakarrinyaku Jiyijajiku. Kurrngalju pukun japirr marnikinyiyi,
“Ngaju pukurl ngalypa jilaminyinkurra?”
Palajalu Jiyijajilu tawun yakarna, pirrakarti yana kujurlku jarrinyaku, muwarr pinaku Ngarrkaku.