15
Akapakachi saba ni ioya saba
1 Kuboka pagenia nginibona iingi yenge ikolongwa yukuomongwa okwo kumbengu. Pakiba na akapakachi saba bukumbengu bina ioya saba yukujomolela. Gambu gu ioya saba yenie, lilaka lya Nnoongo lilenganile. 2 Penia nginikibona kilebe andi baali ja lindala, kiwanga na mwoto. Nganabona ababikiotwi kinyama kikaleche nikinyago chakwe ni ichabo ya lina lyakwe. Bandu benia bajema umbwega ja baali ji lindala. Bakamwi inanda ibapa Nnoongo. 3 Bajembanga nhwambo gwa Musa, mpakachi jwa Nnoongo na gwa Mwanalimbelele, bakalenga,
“Mwe Mangwana Mana Nnoongo Mina Makakala,
itendwa inu nga ikolongwa na ya kuomongwa muno!
Mwe Mangwana ba ilambo yoa,
ndela inu ibi andi pipaligwa na ya kweli!
4 Mwe Mangwana, mene jwanga nnyogopa mwe?
Mene jwanga likoleya lina linu?
Mwenga jika jinu nga Machwapi.
Bandu bi ilambo yoa mabunhwikalila nu kunng'ongalela,
gambu itendwa inu ya kweli ibonakine.”
5 Kuboka pa genia nginijibona nyumba ja Nnoongo jijogaligwe kumbengu, nkati jakwe mukiba liteba elichalakicha kutenda abi Nnoongo. 6 Penia ngabapitanga akapakachi saba unyumba jenie bina ioya saba. Bakwindangite ngobo nhuu chwapi ina kang'ala nu luunga lwa jaabu mbengamabele. 7 Penie jumwe kati ja ipanganigwa ina bwomi ncheche yela ngabapeganga akapakachi saba bukumbengu bala mikungu ejitweli lilaka lya Nnoongo, ojwalama machoba goa pangapela. 8 Nyumba ja Nnoongo ngijitwele malyoi agaboka mukibumo cha Nnoongo na makakala gakwe, na akibaje mundu jwaotwile kujingi munyumba ja Nnoongo mpaka pipela ioya saba eiletigwe na akapakachi saba.