1 Magua pãrau maarjã sĩi pãach ee Cristo chognaan anaa Ẽwandamau õrag ich khĩirjug jaaupiejem khʉʉnpaiu abat. Magdampai khabahab maar phidag. 2 Mamʉ ich mag phidag waumkhĩir irua jʉr au sim wounaun chadau ich Ẽwandamau oowaijã chadcha ichdëu phidag jaaubarmjã thumaa wajapha waumkhĩirta mag phidag deejemjã khaphʉ aju aai sim. 3 Magua mʉchjã ĩchab ich Ẽwandamauta ich i jaaumkhĩir jʉr autarr aawai pãrau mʉ jaauwiajã mʉch chan mua khĩirjuba chitʉm. Mʉ gaai mas khaba sim; ich chi mʉ jʉr autarrauta ichdëu khap mʉ jaauju, mʉ ʉ̈u phidkha chirʉ́ wa khaigba khãijã phidkha chirʉ́. Wa mag pãrau khabam khai, sĩi mʉg jẽb gaai chi thethemnaanau khãijã mʉ jaaukhiinjã, mʉ gaai mas khabam. Mʉg chitʉm aig ni mʉchdëujã mʉch jaauju khaba chirʉm. 4 Mua khaphʉ chirʉm, mʉch khaigba khaba chirʉm. Mag chirab mamʉ õor dakhĩir mʉʉn Ẽwandam dʉ̈i iekkhõr chukhu chirʉmjã aba chitʉm. Mag chiraawai mua khaphʉ chirʉm, mʉ khaibag wauju jaauju wa mʉ kõit khãijã iekhajuun ich maach Pör Jesuuchata jaauju aai sim, bigaaum khʉʉnau khabam. 5 Magua mua pãrag, “Oob chikham jaau chithëe amiet” a chirʉm. Magju khãai idëu maach Pör Jesucristo bëepi athat. Ich pierrwaita irua ichdëu khap õrau nem meraa wautarrjã khĩchag ee narrta araragag phë athamjö abaawai thumaam khʉʉnau khakhapdö aju. Maigta ĩchab õrau amach thãar eepai khĩirju sĩsidʉmjã thumaam khʉʉnag khaphʉ apiju. Ya mag jaau dichwian chadau õrau amachdëu nem wajapha nem waumaajerr igwia ichdëucha am wajapha ig iekhaju.

6 Cristo gaaimua khodamnaan, cha mua iekha chirʉmʉn pãach atheyau. Pãadë oobat. Mʉchpaita Apolos dʉ̈i maach phidkha nʉm jaauwia chirʉm, maar mag pãar khãai ʉ̈rpaijã khaba sĩi pãach chognaanjö wënʉrrʉm oowia Ẽwandam iek phã sim gaai jaau simjö chadcha maach thum agdaujöpai nʉm a khap amkhĩir. Maagwai ni ãbmuajã Ẽwandam iek jaaujem khʉʉn igwia, “Magʉgta ʉ̈rcha ee awia jũrr tagam khʉʉnag oobamjö” abaju. 7 ¿Khaíu pãrag jaauwai pãarta warm khʉʉn khãaijã ʉ̈rpai nʉm a jaaujĩ? Khan nemta deeba arr aawai pãrau bʉ̈ʉrjã chukhu nʉ. Mag Ẽwandamau deetarr pãachdëujã khaphʉ nʉmta, khantheeta pãrau pãach juapaauta paarpatarrjö khĩirjuajẽ.

8 Wajapcharan pãachigan, ya mʉg maach Ẽwandam iekhauta biwaau nʉmjö nʉm anʉm, ya i iek nem khaug nʉm awia. Pãachigan ya pãar reinaankha thʉnaabahab, pãachdëu nem ig nʉm thum wai nʉm awia. Magua tag pãrau bʉ̈ʉrjã maar jua igba nʉm anʉm. Chadcha Ẽwandam iekta pãachdëu khaphʉ nʉm anʉmjö khaphʉ naakhiin ʉ̈u akham. Jãgkhiin pãar ee par phidkhaba chadcha maach thum ãba Ẽwandam iek gaai ubʉ nʉm aju. 9 Magba mua oowai, maar ich Jesuucha ich iek jaaumkhĩir jʉr autarr khʉʉnta jũrr ich Ẽwandamaujã juau ogthom chi serbiibacharam khʉʉn dʉ̈ímjö api sim maar dʉ̈i. Mag nʉm aawai sĩi thumaam khʉʉnau oo nʉm dʉ̈i Ẽwandam chognaan ʉ̈gtharmpeenau oowaijã, sĩi maach khaigba nʉm gaaimua khëchpäaig phë arrumjöta oojem. 10 Maar mag durrumʉn, Cristo iek jaau nʉm gaaimua bigaaum khʉʉnaujã marag lök sĩerrjëem a iekha nʉm daar, pãarta jũrr Cristo iek ʉ̈kha naawai chi pör öphërm khʉʉn aajem, pãachdëupai. Maagwai maran sĩita kha theeg chukhumjö nʉm anʉm daar, pãarta jũrr maar khãaijã khĩir ubaaga nʉm aajem. Cristo gaaimua maran õraujã kha isëe nʉm daar, pãarta jũrr õraujã daupiinaa ökhö aajem. 11 Ĩs ewag pawiajã agtha jãdau ãwatnaa öbichagjã ãwat nʉm. Khajũadam theg jũjũa ajujã chukhu nʉm dʉ̈i õraujã maar dʉ̈i khaigba aajem. Mag nʉm chan maach di chaarjã chukhu durraajem. 12 Mag nʉmʉn maach bidam athee maach juadamaucha phidkha durrumua khajeeu durraajem. Maach thõp iyʉ̈ʉ aawaijã warag am kõit ʉ̈gthaagta jëeu durraajem. Maach khaibag wawaag maach ẽudee ẽkhaawaijã magʉmjã igba khĩu ãwat durraajem. 13 Maach khĩircha khaigba iyʉ̈ʉ aawaijã, maach garmua chan magʉmjã igba warag khĩir thũu am dʉ̈i iyʉ̈ʉ durraajem. Wajapcharan maran amau sĩi amach deg dijã sirphʉg thʉnʉm oomjöta aajem. Õor thumaam khʉʉnau isegtarrjö nʉmta, ĩsjã agtha chikham i ee ich jãg pʉʉrba durraajem.

14 Mua mʉg ẽsap gaai ikhʉaba pãrag mag phã deepʉ̈i chirʉm chan sĩi pãar khĩir naaupim khõchgaupai khabam. Mua mʉg ẽsap phã deepʉ̈i chirʉmʉn, mʉch chaainjö pãar khõsi wai chitaawaita sĩi pãar wawí chirʉmʉu. 15 Pãachig Cristo iek jaaumkhĩir pãrau maestronaan khapan diez mil jʉr wai naawiajã pãar chan dënnaan khapan chukhu nʉm. Jesucristo iek jãg pãachdëu ogdʉba ʉ̈kha wënʉrrʉm gaaimua mʉg jẽb gayan mʉʉta pãar ayau, Ẽwandamau maach peerdʉ aaujem iek muata nacha pãrag jaautarr gaaimua. 16 Magau keena. Maguata muan pãragjã mʉch chitaajemjöta wënʉrrapi jaau khitaajem.

17 Timoteoogjã mʉchdëu jaauwiata Cristo iek ʉ̈khatarr aawai ijã mʉ chaaijö sim. Magua pãragjã mʉchjö wënʉrraju khap amkhĩir, mua iita pãar aar pʉ̈ijim. Iruata maach Pör Cristo iekjã chadcha ogdʉba ʉ̈kha khitaajeewai mua i jãsene chitʉm. Ich barbaimaawaita irua pãrag jaauwimaju, jãgata mʉ chitaajẽ. Muajã pãar dënjö Cristo iek ʉ̈kha chitaawai mʉch chitʉmpierr iglesiapierr mʉchdëu jaaujem iekta irua pãrag jaaumaju. 18 Ãaur khʉʉn pãar khapeenan jũrr amachta pãar dʉ̈i ʉ̈rpai thʉnʉm aajem, mʉ amach aar mabajupii awia. 19 Mamʉ maach Pör Jesuu khõs amʉn, mʉchdëun jöpcha pãar oon maju khĩirju chirʉm, am iek mag amta Ẽwandam dën anaawai daau chadcha amachdëu jaau nʉm eyaa wënʉrrʉm khap aag. Jãan magbamʉn, sĩi Ẽwandam jua theegaujã khaba, sĩi par iiupai khãijã mag thʉnʉm. 20 Ẽwandam dënkha nʉm chan sĩi õor jʉ̈g daar nem iekhaa khaug iekha nʉm khabam; Ẽwandam dënkha nʉm abarmʉn chadcha irua nem jajaaukham ipierraa wënʉrrʉmua i jua theegta dich gaai oopi nʉmʉu. 21 ¿Jãga pãrau khõsi nʉ? ¿Mʉch barbaimaawai warre pãachig meeurrauta iekhapim khõsi nʉ, wa mawia sĩi pãach daupiinaa ithũuta pãachig iekhapim khõsi nʉwa?