3 JUAN
Biek thãrjupam ẽsap Juanau phã deepʉ̈itarr
Khaíu phãjĩ maimua khaíg deepäaigta phãjĩ. Chamʉg thãrjupam cartadamjã ĩchab ich Juanau ich khapkhʉʉn anaa ich khapeer Gayo aajerrag deepäaigta phãjim (vs. 1). Mag ermanodaman ag perasöm iglesia eem khʉʉnau ajapha khaphʉ naajim aju ayaa sim.
Khan jawaag ajĩ. Biek numiim carta ichdëu phã deepäaiwai ag gaai sĩi Cristo iek chaar khabamta parhoob nem jaau nʉrrjëem khʉʉn chan õrag amach aigjã jẽerpiba jaaupʉ̈i sim. Pari mʉg Gayoog deepʉ̈itarr gaai chan magba, ante jũrr maach peerdʉajem iekta jaau wënʉrrʉm khʉʉnan ajaphata amag recibiimkhĩir warag am khĩir oneeta iekha sim. Juan iekhõoin di chaaurmua wa dö chaaurmua khãijã õordam dich aig bëewai mag ajapha recibiipi nʉmʉn, mʉg Testamento Iiur gaai biek khapan chadcha ich magta aju aai nʉm a sim (Mt. 10:40-42; Ro. 12:13; 1 Ti. 3:2; Tit. 1:8; 1 Pe. 4:9).
1
Gayo gaaimua Juan onee arr
¿Jãgpai chirʉ́ Gayo, khapeer wʉ̈jʉ̈u? Mʉ ich jöoi Juanauta pʉrʉg mʉg ẽsap phã deepʉ̈i chirʉm, chadcha mʉchdëu pʉ khõsi chitaawai.
Cristo gaaimua khodam, muan Ẽwandamagta pʉ kõit jëeu khitaajem, jãg pʉch Ẽwandam dʉ̈i ʉ̈u chirʉmjö tagam nemdam waauwaijã wajaphata öbëbërkham dʉ̈i pʉch kha monakhata chitamkhĩir. Mʉ onee chirʉm chadcha, ermanonaan bëe nʉm khʉʉnau jaauwai pʉ chadam iek gaaita ubʉ ogdʉba chiraajem a mʉchig jaauchë nʉm ũrwia. Mʉchdëu Cristo iek jaau chitʉm ũrwia ʉ̈khatarr gaaimua jãg mʉch chaainjö khithëem khʉʉn chadcharam iek gaai jaau sim ipierraa wënʉrrʉm a ũurwaita chadcha mʉ onee chiraajem; deeum nem jaau nʉm ũurwai chan jãgcha mʉ onee aba chitʉm.
Ermano, pua chadcha Cristo gaaimua maach khodkha thʉnʉm khʉʉn dʉ̈ijã Ẽwandamau waupim khõsi aajemjöta aajem am dʉ̈i; pari maagjem chan sĩi pʉch khapkhʉʉn aawai khaba, warpmua Ẽwandam iek jawaan bëe nʉm khʉʉn dʉ̈ita pua mag wajapha aajem. Mag amau mʉrʉg pʉ jaaucheewai amau chi ʉ̈kha durrum khʉʉn khapan thʉnʉm dakhĩirta jaau naajim, jãga pua ʉ̈u am khĩir jãsenkhajĩ. Jãkhʉʉn wounaan deeu pʉch aar weetwai Ẽwandamau waupi jaau simjö amau nemdam ig nʉm thumaa amag jʉr deebá, amach dʉ̈i warramkhĩir. Am jãg wënʉrrʉmʉn, chadcha Cristo iek chaar jawaagta jãg wënʉrrabahab; mag wënʉrrʉmjã Ẽwandam iek ʉ̈khaba nʉm khʉʉnag chan nem jëeuba wënʉrrʉm. Magua maachdëuta jũrr amau nem ig nʉmjã khap aju aai nʉm, mag amau nemdam ig nʉm dee nʉmua warag Ẽwandam iek chaarta jaaumkhĩir. Mag nʉm aig maadëu warag Ẽwandam iekta maach paarmua aaidʉpi nʉm.
Ejemplo wajapham jaaunaa ejemplo khaigbamjã jaautarr
Mua jam chi ʉ̈kha durrum khʉʉnag ũrmkhĩirta nawe mʉchdëu ẽsap phã deepʉ̈itarr gaai jaaupʉ̈ijim, ʉ̈u mag Cristo iek jaau wënʉrrʉm khʉʉn pãach ee recibiimkhĩir. Mamʉ magtarrta Diotrefeeu, ichta thumaam khʉʉn khãaijã ʉ̈rpai am khõsi sĩewai, irua mʉ iek asekasmapha sim. 10 Ich jãg chitʉm athee, mʉchcha jam baarwai mua pãar dakhĩir irig iekhaju; maumua mua ũurwai ichdëuta jãg mʉ ëugarjã sëukha chadam iek khabampa õrag jaau nʉrraajem aajem. Pari wajapcharan mag sëukha simpaijã khaba, ermanonaan warpmua Ẽwandam iek jawaan bëewaijã õor recibiiba simta bigaaum khʉʉnau recibiim iigwaijã idëu recibiipiba aajem anʉm. Mag nʉm ee ãbmua khãijã õor recibiimʉn mag ermanodam warre iglesia eemuajã jʉrpʉ̈ipiejem aajem, mag warpmua berr recibiitarr kõit.
11 Ermano, oob pua ejemplo khaigbam chan au chitam; mag khãai ejemplo wajaphamta athá. Pua khaphʉ sim, ar chi nem khaigbam waaujem khʉʉnan Ẽwandamjã khaugba naawaita mag nem khaigba wau sĩerrjëem; pari nem wajapha wau nʉm khʉʉnan Ẽwandam dʉ̈i naawaita mag nem wajapha waaujem.
12 Magta sim maach ermano Demetrio. Chadam iek ichdëu khaugtarr ipierr nem ajapha wau simuata ich iiucha jaau simjö merag chukhu khaphʉ api sim, ichdëu chadcha nem wajapha wau sim. Magua thum chi ʉ̈kha durrum khʉʉnau i ëugar wajapha jaaujem. Mʉchdëujã mag khaphʉ chiraawaita irua chadcha nem wajapha wau sim a chirʉm. Pua khaphʉ sim, mua chadcha nem jaau chitʉm.
Ãbmiecharam salud
13 Mua pʉrʉg nem jaauju pöoma wai chirʉm; pari mʉg ẽsap gaai pöd thum jaaupʉ̈ibam. 14 Mʉchdëun pʉ dʉ̈i jöpcha khĩircha ooju khĩirju chirʉm; maigta maach iyʉ̈ʉ aju.
15 Gayo, pʉ khõinaa chiramkhĩir muan Ẽwandamagta pʉ kõit jëeu chiraajem. Pʉ khapkhʉʉn mawaam khʉʉnaujã pʉrʉg salud deepʉ̈i nʉm; maagwai jũrr mʉ khapkhʉʉn pʉch aram khʉʉnagjã agjö amachpierr mʉ salud jaaupet.
Mʉgdampai ajim pʉrʉg jaaum ig chirarr. Ayoo kakë,
Pʉch khaphʉm, Juan