จดหมายจาก
เปโตร
ฉบับตี้นึ่ง
ผู้เขียนจดหมายฉบับนี้คือ เปโตรผู้เป๋นอัครทูตต๋ามตี้ต้านบอกในกำตั๊กตวายของจดหมาย คริสตจักรสมัยยุคแรกยอมฮับว่าเปโตรเป๋นผู้เขียน ในบทตี้ 5:12 มีเขียนบอกว่า เปโตรเขียนจดหมายฉบับนี้ผ่านตางลายมือของสิลวานัส (ฮ้องแหมจื้อว่า สิลาส) เขาเป๋นเปื้อนของเปาโลผู้เป๋นอัครทูต กับเกยเตียวตางกับเปาโลในก๋านไปบอกข่าวดีเป๋นบางเตื้อ (กิจก๋าน 15:40) เปโตรคงจะเขียนจดหมายฉบับนี้หละหว่างปี๋ ค.ศ. 64 เถิง 68
เปโตรเขียนจดหมายฉบับนี้ไปเถิงหมู่ผู้เจื้อตี้อยู่ในแคว้นปอนทัส แคว้นกาลาเทีย แคว้นคัปปาโดเซีย แคว้นเอเชีย กับแคว้นบิธีเนีย แคว้นหมู่นี้อยู่ในภาคตะวันตกเฉียงเหนือของแคว้นเอเชีย ติดกับทะเลดำ เซิ่งสมัยนี้เป๋นส่วนนึ่งในประเทศตุรกี หมู่ผู้เจื้อหมู่นี้ส่วนใหญ่เป๋นคนต่างจ้าด เปโตรเขียนจดหมายฉบับนี้โดยหื้อสิลวานัสเขียนต๋ามตี้เปโตรอู้ ต๋อนตี้ตึงสองอยู่ในกรุงโรม
เปโตรหื้อก๋ำลังใจ๋หมู่ผู้เจื้อหื้อใจ๊จีวิตอย่างบริสุทธิ์ตี้เยียะหื้อพระเจ้าเปิงใจ๋แม้ว่าจะอยู่ต้ามก๋างความตุ๊กยาก เปโตรตักเตื๋อนหมู่เขาว่า หมู่เขามีความหวังอันยิ่งใหญ่แล้ว ย้อนได้เจื้อวางใจ๋พระเยซูคริสต์ ต้านก็ตักเตื๋อนตวยแหมว่า จีวิตของคนตี้ซื่อสัตย์ต่อพระเยซูคริสต์ ก็จะปะกับความตุ๊กยาก อย่างความตุ๊กยากตี้พระเยซูได้ปะนั้นเป๋นตั๋วอย่างหื้อกับผู้เจื้อ เปโตรตักเตื๋อนหมู่เขาว่า พระคริสต์จะปิ๊กมา แล้วผู้เจื้อต้องเกียมพร้อมสำหรับก๋านปิ๊กมาของพระองค์ โดยฮับใจ๊ปี้น้องผู้เจื้อ กับหื้อฮักกั๋น
1
กำตั๊กตวาย
1 จดหมายฉบับนี้จาก เปโตรอัครทูตของพระเยซูคริสต์ เถิงคนตี้เป๋นเหมือนคนต่างด้าวของโลกนี้ตี้พระเจ้าได้เลือกไว้ ตี้ได้แตกขะแลขะแจไปอยู่ต๋ามแคว้นปอนทัส แคว้นกาลาเทีย แคว้นคัปปาโดเซีย แคว้นเอเชีย กับแคว้นบิธีเนีย 2 ต๋ามตี้พระเจ้าพระบิดาได้ก๋ำหนดไว้เมินแล้ว พระองค์หื้อพระวิญญาณซ่วยล้างหมู่ต้านหื้อบริสุทธิ์ เปื้อหมู่ต้านจะได้เจื้อฟังพระเยซูคริสต์ กับได้เข้าเป๋นคนของพระองค์โดยเลือดของพระเยซูคริสต์ก1:2 อพย. 24:3-8
ขอพระเจ้าโผดหื้อพระคุณตึงสันติสุขกับหมู่ต้านนักขึ้นเต๊อะ
เฮามีความหวัง
3 สรรเสริญพระเจ้าพระบิดาของพระเยซูคริสต์องค์พระผู้เป๋นเจ้าของเฮา ย้อนความเมตต๋าอันยิ่งใหญ่ของพระองค์ตี้เยียะหื้อเฮาได้เกิดใหม่โดยก๋านเยียะหื้อพระเยซูเป๋นขึ้นจากความต๋าย จีวิตของเฮาจึงมีความหวังตี้แน่นอน 4 กับพระเจ้าได้เก็บมรดกไว้หื้อกับหมู่ต้านแล้วในสวรรค์ เป๋นมรดกตี้บ่มีวันเสียหาย เน่าเปื่อย กาว่าจ๋างหายไป 5 ย้อนหมู่ต้านเจื้อวางใจ๋พระเจ้า พระองค์จึงปกป้องหมู่ต้านโดยฤทธิ์เดชอันยิ่งใหญ่ของพระองค์ จ๋นกว่าหมู่ต้านจะได้ฮับความรอดตี้จะเปิดเผยในวันสุดต๊ายนั้น 6 เรื่องนี้เยียะหื้อหมู่ต้านมีความจื้นจมยินดีนักขนาด เถิงแม้ว่าบ่าเดี่ยวนี้จ๋ำเป๋นจะต้องปะกับความตุ๊กยากในก๋านทดลองต่างๆ สักหว่างนึ่ง 7 เปื้อทดสอบว่าหมู่ต้านมีความเจื้อแต๊ๆ เซิ่งความเจื้อตี้แต๊จริงก็มีก้านักเหลือคำ ขนาดคำตี้เสื่อมสลายได้ ยังต้องถูกเผาไฟเปื้อหื้อเป๋นคำตี้บริสุทธิ์ ความเจื้อของหมู่ต้านก็ต้องถูกทดสอบเหมือนกั๋น เมื่อผ่านก๋านทดสอบได้แล้ว หมู่ต้านก็จะได้ฮับก๋านยกย่อง ความยิ่งใหญ่ กับเกียรติในวันตี้พระเยซูคริสต์ปิ๊กมาสำแดงตั๋วหื้อกู้คนหัน 8 เถิงแม้ว่าหมู่ต้านบ่เกยหันพระเจ้า แต่หมู่ต้านก็ยังฮักพระองค์ ต๋อนนี้หมู่ต้านก็ยังบ่หันพระองค์ แต่หมู่ต้านก็เจื้อวางใจ๋พระองค์กับมีความสุข ตึงความจื้นจมยินดีจ๋นเสี้ยงสุดกำอู้ใดจะมาเผียบ 9 ย้อนว่าหมู่ต้านก่ำลังได้ฮับเป้าหมายของความเจื้อแล้ว คือก๋านรอดป๊นบาปโต้ษ
10 ผู้เป๋นปากเป๋นเสียงแตนพระเจ้าได้ตวายตั๊กเถิงพระคุณของพระเจ้าตี้หมู่ต้านจะได้ฮับ หมู่เขาก็ฮิเซาะหาเกี่ยวกับความรอดนี้อย่างละเอียดถี่ถ้วน 11 พระวิญญาณของพระคริสต์ตี้อยู่ในตั๋วหมู่เขาบอกหมู่เขาไว้ล่วงหน้าว่า พระคริสต์จะมีความตุ๊กทรมาน แล้วปายหลังพระองค์จะได้ฮับเกียรติ หมู่เขาอยากจะฮู้ว่าเรื่องนี้จะเกิดขึ้นจาใด แล้วเวลานั้นจะเกิดขึ้นเมื่อใด 12 แต่พระเจ้าได้เปิดเผยหื้อหมู่เขาฮู้ว่า สิ่งตี้หมู่เขาอู้เถิงตึงหมดนั้นก็บ่ใจ้เปื้อหมู่เขา แต่เปื้อหมู่ต้าน แล้วบ่าเดี่ยวนี้ก็มีคนบอกข่าวดีนี้กับหมู่ต้านโดยฤทธิ์อำนาจของพระวิญญาณบริสุทธิ์ตี้พระเจ้าหื้อจากสวรรค์ ขนาดทูตสวรรค์ยังใค่อยากจะฮู้เรื่องนี้เลย
หื้อมีจีวิตตี้บริสุทธิ์เหมือนพระเจ้า
13 ย้อนจาอั้นหมู่ต้านต้องเกียมตั๋วเกียมใจ๋หื้อดี หื้อควบคุมตั๋วเก่าไว้ กับหื้อตั้งความหวังตึงหมดไปตี้พระคุณของพระเจ้าตี้หมู่ต้านจะได้ฮับในวันตี้พระเยซูคริสต์ปิ๊กมาสำแดงตั๋วหื้อกู้คนหัน 14 หื้อเป๋นเหมือนลูกๆ ตี้เจื้อฟังป้อแม่ ห้ามเยียะต๋ามตั๋ณหาเหมือนอย่างต๋อนตี้หมู่ต้านยังบ่ฮู้จักพระเจ้าตะก่อน 15 แต่หื้อจีวิตของต้านบริสุทธิ์กู้อย่างเหมือนพระเจ้า ผู้ตี้ฮ้องต้านมาเป๋นคนบริสุทธิ์นั้น 16 เหมือนตี้มีเขียนไว้ในพระคัมภีร์ว่า “หื้อหมู่ต้านเป๋นคนบริสุทธิ์ ย้อนว่าเฮาบริสุทธิ์”ข1:16 ลนต. 11:44-45; 19:2 17 หมู่ต้านฮ้องพระเจ้าว่า “พระบิดา” พระองค์เป๋นผู้ตี้ตัดสินต๋ามสิ่งตี้คนเยียะโดยบ่หันแก่หน้าใผ จาอั้นก็หื้อหมู่ต้านใจ๊จีวิตอย่างเก๋งกั๋วพระเจ้า ในต๋อนตี้ยังอยู่ในโลกนี้ 18 หมู่ต้านฮู้ว่าพระองค์บ่ได้ใจ๊สิ่งตี้เสื่อมสลายได้อย่างเงิน กาว่าคำเป๋นก้าไถ่หื้อหมู่ต้านมีอิสระจากก๋านใจ๊จีวิตตี้บ่มีประโยชน์ ตี้สืบต่อๆ กั๋นมาจากป้ออุ๊ยแม่หม่อน 19 แต่ใจ๊เลือดของพระคริสต์ตี้มีก้านักขนาด ตี้เป๋นเหมือนเลือดของลูกแกะตี้บ่มีตี้ติเลย 20 พระเจ้าได้เลือกพระองค์ไว้ก่อนสร้างโลกนี้แล้ว แต่ตี้ก้าหาหื้อพระองค์มาแสดงตั๋วในยุคสุดต๊ายนี้ ก็เปื้อหมู่ต้าน 21 โดยตางพระคริสต์นี้ละ หมู่ต้านจึงมาเจื้อวางใจ๋พระเจ้า ผู้ตี้เยียะหื้อพระคริสต์เป๋นขึ้นจากความต๋ายกับหื้อเกียรติพระองค์ตวย จาอั้นความเจื้อกับความหวังของหมู่ต้านก็เลยอยู่ในพระเจ้า
22 เมื่อหมู่ต้านได้เจื้อฟังความจริงนั้น๑1:22 ความจริงนั้น อ้างเถิง ก๋านสอนเรื่องพระเยซูตี้เป๋นความจริง หมู่ต้านก็ได้ซ่วยล้างตั๋วเก่าหื้อบริสุทธิ์แล้ว ก็เลยมีความฮักหื้อกับปี้น้องผู้เจื้ออย่างจริงใจ๋ ย้อนจาอั้นหื้อฮักกั๋นจากใจ๋แต๊ๆ เน่อ 23 ย้อนว่าหมู่ต้านได้เกิดใหม่แล้วจากถ้อยกำของพระเจ้าตี้มีจีวิตตลอดไป บ่ใจ้จากคนตี้มีวันต๋าย 24 เหมือนกับตี้มีเขียนไว้ในพระคัมภีร์ว่า
“คนกู้คนก็เป๋นเหมือนหญ้า
เกียรติของหมู่เขาก็เป๋นเหมือนดอกหญ้า
หญ้าต๋าย ดอกมันก็หลุดหลวะไป
25 แต่ถ้อยกำขององค์พระผู้เป๋นเจ้าจะอยู่ตลอดไป”ค1:25 อสย. 40:6-8
ถ้อยกำนี้ก็คือ ข่าวดีตี้มีคนมาบอกหื้อหมู่ต้านฮู้แล้ว