จดหมายจากเปาโลเขียนเถิงหมู่ปี้น้องผู้เจื้อในเมือง
เธสะโลนิก๋า
ฉบับตี้นึ่ง
ผู้เขียนจดหมายฉบับนี้คือเปาโล ต้านเขียนเถิงผู้เจื้อในเมืองเธสะโลนิก๋า ต้านเขียนขึ้นประมาณปี๋ ค.ศ. 50-51 นี่เป๋นจดหมายฉบับแรกตี้เปาโลเขียนเปื้อหื้อก๋ำลังใจ๋คริสตจักร
เปาโลบอกข่าวดีหื้อกับคนในเมืองเธสะโลนิก๋าหลังจากตี้ออกจากเมืองฟีลิปปี เธสะโลนิก๋าเป๋นเมืองใหญ่กับสำคัญตี้สุดในแคว้นมาซิโดเนีย เซิ่งอยู่ในอาณาจักรโรม สมัยนี้อยู่ประเทศกรีก เปาโลเกยบอกข่าวดีในตี้อื่นๆ แต่ได้ฮับข่าวเกี่ยวกับคริสตจักรเธสะโลนิก๋าต๋อนตี้ต้านก่ำลังอยู่ตี้เมืองโครินธ์ แล้วเปาโลก็เขียนจดหมายฉบับนี้ขึ้นเปื้อหื้อก๋ำลังใจ๋หมู่เขา กับได้อธิบายเถิงบางสิ่งบางอย่างตี้หมู่เขาเข้าใจ๋ผิด
เปาโลเขียนหื้อผู้เจื้อจาวเธสะโลนิก๋ากึ๊ดเถิงเรื่องความฮักกับความห่วงใยของเปาโลตี้มีต่อหมู่เขาตั้งแต่ต๋อนตี้ต้านได้บอกข่าวดีกับเขาจ๋นเถิงต๋อนตี้ต้านเขียนจดหมายฉบับนี้ ต้านต้องออกจากเมืองเธสะโลนิก๋าตันที ย้อนว่าในเมืองมีก๋านจลาจล (กิจก๋าน 17:1-10) แต่ต้านยังห่วงหมู่เขาอยู่ ต้านเตื๋อนหมู่ผู้เจื้อหื้อใจ๊จีวิตอย่างบริสุทธิ์กับถูกต้องต๋ามธรรม ต้านสอนว่าพระเยซูคริสต์จะมาเป๋นเตื้อตี้สอง เปื้อจะมาฮับหมู่ผู้เจื้อหื้อไปอยู่กับพระองค์ แต่จะบ่มีใผฮู้ว่าจะเกิดขึ้นเมื่อใด ย้อนจาอั้นผู้เจื้อต้องมีความเจื้อต่อไปอย่างมั่นคง กับใจ๊จีวิตอย่างตี้พระเจ้าเปิงใจ๋ เปื้อหมู่เขาจะพร้อมตี้จะได้อยู่กับพระเจ้า เมื่อองค์พระผู้เป๋นเจ้าปิ๊กมา
1
กำตั๊กตวาย
1 จดหมายฉบับนี้จากข้าพเจ้าเปาโล กับสิลวานัส๑1:1 สิลวานัส กับ สิลาส เป๋นคนเดียวกั๋น กิจก๋าน 15:12,40; 18:5 ตึงทิโมธี ขอแสดงความนับถือมา
เถิงปี้น้องของคริสตจักรในเมืองเธสะโลนิก๋า เซิ่งเป๋นของพระเจ้าพระบิดาตึงพระเยซูคริสต์ ขอหื้อต้านตังหลายได้ฮับพระคุณตึงสันติสุขเต๊อะ
ความเจื้อกับแบบอย่างของจาวเธสะโลนิก๋า
2 หมู่เฮาขอบพระคุณพระเจ้าสำหรับต้านตังหลายอยู่ตลอด กับอธิษฐานเผื่อต้านตังหลายเป๋นประจ๋ำ 3 เมื่อหมู่เฮาอธิษฐานต่อพระเจ้าพระบิดาของเฮาเผื่อหมู่ต้าน หมู่เฮากึ๊ดเถิงก๋านงานของหมู่ต้านตี้เกิดจากความเจื้อ ตึงกึ๊ดเถิงตี้ต้านเต๋มใจ๋เยียะก๋านหนักย้อนความฮัก กับกึ๊ดเถิงความอดทนของต้านตี้เกิดจากความหวังในพระเยซูคริสต์องค์พระผู้เป๋นเจ้าของเฮา
4 ปี้น้องผู้เจื้อตังหลาย ผู้ตี้พระเจ้าฮัก หมู่เฮาฮู้ว่าพระเจ้าฮักต้านตังหลาย แล้วเลือกต้านมาเป๋นคนของพระองค์ 5 ย้อนต๋อนตี้หมู่เฮานำข่าวดีมาบอกหื้อต้านตังหลาย ก็บ่ใจ้มาก้าอู้บ่ดาย แต่มาด้วยฤทธิ์อำนาจกับพระวิญญาณบริสุทธิ์ตึงความมั่นใจ๋แต๊ๆ ต้านตังหลายก็ฮู้แล้วว่าหมู่เฮาใจ๊จีวิตจาใดพ่องต้ามก๋างหมู่ต้าน เปื้อเป๋นประโยชน์ต่อต้านตังหลาย 6 ส่วนต้านตังหลายก็ได้เอาจีวิตของหมู่เฮาตึงขององค์พระผู้เป๋นเจ้าเป๋นแบบอย่าง แม้ต้านปะความตุ๊กยากนักก็ยังฮับถ้อยกำนั้นด้วยความจื้นจมยินดี ตี้มาจากพระวิญญาณบริสุทธิ์ 7 ย้อนจาอั้นต้านตังหลายจึงก๋ายเป๋นแบบอย่างแก่ผู้เจื้อในแคว้นมาซิโดเนีย ตึงผู้เจื้อในแคว้นอาคายาตวย 8 ย้อนต้านตังหลาย ถ้อยกำของพระเจ้าจึงได้เล่าลือออกไปจากเมืองเธสะโลนิก๋า บ่ใจ้ก้าแคว้นมาซิโดเนียกับแคว้นอาคายาเต้าอั้น แต่ได้เล่าลือไปแผวหลายๆ ตี้ จ๋นหมู่เฮาบ่ต้องอู้อะหยังเกี่ยวกับความเจื้อของต้านแหมแล้ว 9 ย้อนคนหมู่นั้นเล่าเรื่องตี้ต้านต้อนฮับหมู่เฮาดีขนาด ตึงอู้เรื่องตี้ต้านตังหลายบิ่นหลังต๋ำฮูปเคารพปิ๊กมาหาพระเจ้า เปื้อฮับใจ๊พระองค์ผู้เป๋นพระเจ้าเตี้ยงแต๊กับมีจีวิตอยู่ 10 ตึงอู้เถิงเรื่องต้านตังหลายกองถ้าบุตรของพระเจ้าจากสวรรค์ คือพระเยซูคริสต์ผู้ตี้พระเจ้าได้โผดหื้อปิ๊กเป๋นขึ้นจากความต๋าย ผู้จ้วยหื้อเฮาป๊นจากโต้ษตี้จะมาปายหน้านั้น