9
พระเจ้าเลือกคนจ้าดอิสราเอล
1 ข้าพเจ้าอู้ความจริง บ่ได้จุ ย้อนว่าข้าพเจ้าเป๋นคนของพระคริสต์ จิตสำนึกของข้าพเจ้าตี้พระวิญญาณบริสุทธิ์ควบคุมอยู่นั้นก็ยืนยันว่า ข้าพเจ้าอู้ความจริงว่า 2 ข้าพเจ้ามีความตุ๊กหนักตึงเจ็บปวดใจ๋อยู่ตลอดเวลา ย้อนปี้น้องจาวยิว 3 ยอมถูกสาบแจ้งกับถูกตัดขาดจากพระคริสต์ ถ้าสิ่งหมู่นั้นสามารถจ้วยปี้น้องจาวยิวของข้าพเจ้าตี้เป๋นเปื้อนฮ่วมจ้าดเดียวกั๋น หื้อเจื้อวางใจ๋พระเยซูได้ 4 หมู่เขาคือจาวอิสราเอลตี้พระเจ้าเลือกหื้อเป๋นลูกของพระองค์ หื้อหมู่เขาได้หันความยิ่งใหญ่ของพระองค์ กับหื้อพันธสัญญาตังหลายกับบทบัญญัติแก่หมู่เขา หื้อเขาฮู้วิธีก๋านนมัสก๋านพระองค์อย่างถูกต้อง กับหื้อพระสัญญาต่างๆ แหม 5 หมู่เขามีป้ออุ๊ยแม่หม่อนตี้ยิ่งใหญ่๕9:5 อู้เถิง อับราฮัม อิสอัค กับยาโคบ เมื่อพระเยซูคริสต์เกิดมาเป๋นมนุษย์ก็สืบเจื๊อสายจากหมู่เขา ขอสรรเสริญพระเจ้าผู้เป๋นใหญ่เหนือสะป๊ะกู้สิ่งตลอดไป อาเมน๖9:5 แป๋ได้แหมอย่างว่า ขอหื้อพระคริสต์ ผู้เป๋นเจ้าเป๋นนายเหนือกู้สิ่ง ได้ฮับก๋านสรรเสริญตลอดไป อาเมน
6 บ่ใจ้ว่า พระสัญญาตี้พระเจ้าหื้อจาวยิวนั้นล้มเหลว ย้อนว่าคนตี้สืบเจื๊อสายมาจากอิสราเอลนั้น๗9:6 อิสราเอลนี้อ้างเถิง ยาโคบ ตี้มีแหมจื้อว่า อิสราเอล ปฐก. 32:28 ก็บ่ได้เป๋นจาวอิสราเอลแต๊เหมือนกั๋นหมดกู้คน 7 บ่ใจ้ว่าลูกหลานของอับราฮัมตึงหมดจะเป๋นลูกของพระเจ้า แต่พระเจ้าบอกอับราฮัมว่า “ลูกหลานของอิสอัคเต้าอั้น จะนับว่าเป๋นเจื๊อสายของเจ้า”ต9:7 ปฐก. 21:12 8 หมายเถิงว่า บ่ใจ้ลูกตี้เกิดต๋ามสายเลือดของอับราฮัมจะถือว่าเป๋นลูกของพระเจ้า แต่ลูกหลานตี้เกิดต๋ามพระสัญญาของพระเจ้าเต้าอั้น ตี้ถือว่าเป๋นลูกหลานแต๊ๆ 9 ย้อนพระเจ้าสัญญากับอับราฮัมว่า “เมื่อเถิงก๋ำหนดเวลาเฮาจะปิ๊กมาแหม ต๋อนนั้นนางซาราห์จะมีลูกป้อจาย”ถ9:9 ปฐก. 18:10,14
10 บ่ใจ้ก้าเต้าอั้น นางเรเบคาห์ก็มีลูกแฝดกับอิสอัคป้ออุ๊ยแม่หม่อนของหมู่เฮา 11-12 ก่อนตี้ลูกแฝดจะเกิดมา ก่อนตี้หมู่เขาจะเยียะดีกาว่าบ่ดี พระเจ้าก็บอกนางเรเบคาห์ว่า “อ้ายจะฮับใจ๊น้อง” ตี้พระเจ้าอู้จาอี้ก็เปื้อหื้อฮู้ว่า ก๋านเลือกของพระเจ้าบ่ได้เป๋นไปต๋ามก๋านเยียะดีกาว่าบ่ดีของเขา แต่เป๋นไปต๋ามก๋านฮ้องคนของพระเจ้าเอง 13 เป๋นไปต๋ามกำตี้มีเขียนไว้ในพระคัมภีร์ว่า “เฮาฮักยาโคบ แต่เฮาจังเอซาว”ท9:13 มลค. 1:2-3
14 ถ้าจาอั้นเฮาจะว่าจาใด พระเจ้าลำเอียงกา บ่ใจ้จาอั้นเน่อ 15 ย้อนพระเจ้าเกยบอกโมเสสว่า
“เฮาใค่โผดคนใด เฮาก็โผดคนนั้น
เฮาใค่อินดูคนใด เฮาก็อินดูคนนั้น”ธ9:15 อพย. 33:19
16 ย้อนจาอั้น ก๋านเลือกของพระเจ้าก็บ่ได้ขึ้นอยู่กับความต้องก๋านกาว่าก๋านฮิเยียะของคนเฮา แต่ขึ้นอยู่กับความเมตต๋าของพระเจ้า 17 ย้อนพระคัมภีร์มีเขียนเกี่ยวกับฟาโรห์ว่า “ตี้เฮาตั้งหื้อเจ้าเป๋นกษัตริย์มีอำนาจนั้น ก็เปื้อว่าเฮาจะสำแดงอำนาจของเฮาผ่านตางตั๋วเจ้า กับเปื้อหื้อจื้อของเฮาเป๋นตี้ฮู้จักกั๋นใคว่ตึงโลก”น9:17 อพย. 9:16 18 ย้อนจาอั้นพระเจ้าจะเมตต๋าใผ ก็จะเมตต๋าคนนั้น กับพระองค์ใค่หื้อใผมีใจ๋หลึ่ง พระองค์ก็เยียะจาอั้นได้เหมือนกั๋น
19 แล้วบางคนอาจจะถามข้าพเจ้าว่า “ถ้าเป๋นจาอี้พระเจ้าจะว่าหมู่เฮาผิดได้จาใด มีคนใดพ่องตี้ขัดขืนความต้องก๋านของพระเจ้าได้” 20 คนหนอคนเหย หมู่ต้านเป๋นใผเถิงเถียงพระเจ้า สิ่งตี้ถูกปั้นจะถามผู้ปั้นได้กา ว่า “เป๋นจาใดต้านปั้นข้าพเจ้าหื้อเป๋นจาอี้”บ9:20 อสย. 29:16; 45:9 21 เผียบเหมือนสล่าปั้นหม้อ เขาย่อมมีสิทธิ์เอาดินก้อนเดียวกั๋นปั้นถ้วยงามๆ ใบนึ่งสำหรับใจ๊ในงานมีเกียรติ แล้วปั้นถ้วยแหมใบนึ่งสำหรับใจ๊ก๋านธรรมดา 22 พระเจ้าก็มีสิทธิ์ตี้จะแสดงหื้อฮู้ว่าพระองค์โขดกับเยียะหื้อมนุษย์หันฤทธิ์อำนาจของพระองค์ก็ได้ แต่พระองค์ยังอดทนนักขนาดกับคนตี้เยียะหื้อพระองค์โขด เซิ่งสมควรได้ฮับความฉิบหายวายวอด 23 เปื้อพระเจ้าจะเปิดเผยความยิ่งใหญ่ของพระองค์ ต่อผู้ตี้พระองค์เมตต๋าแล้ว เป๋นผู้ตี้พระองค์ได้เกียมไว้หื้อมีส่วนในความยิ่งใหญ่ของพระองค์ 24 คือเฮาตังหลายตี้พระองค์ฮ้องมาแล้ว บ่ใจ้จากหมู่จาวยิวจ้าดเดียว แต่จากคนต่างจ้าดตวย 25 ต๋ามตี้พระเจ้าอู้ในพระธรรมโฮเชยาว่า
“เฮาจะฮ้องเขาหมู่นั้นว่าคนของเฮา เซิ่งตะก่อนบ่ได้เป๋นคนของเฮา
เฮาจะฮ้องเขาหมู่นั้นว่าเป๋นคนตี้เฮาฮัก เซิ่งตะก่อนบ่ได้เป๋นคนตี้เฮาฮัก”ป9:25 ฮชย. 2:23
26 กับอู้แหมว่า
“ในตี้ตี้พระเจ้าเกยบอกกับหมู่เขาว่า
‘หมู่เจ้าบ่ใจ้คนของเฮา’
ตี้หั้นเองหมู่เขาจะได้จื้อว่าเป๋น ‘ลูกของพระเจ้าผู้มีจีวิตอยู่’ ”ผ9:26 ฮชย. 1:10
27 ส่วนเรื่องจาวยิวอิสยาห์ผู้เป๋นปากเป๋นเสียงแตนพระเจ้าได้บอกว่า
“แม้ว่าจาวอิสราเอลจะมีนักเหมือนเม็ดทรายฮิมทะเล
แต่คนตี้จะรอดป๊นบาปโต้ษนั้นมีหน้อย 28 ย้อนว่าองค์พระผู้เป๋นเจ้าจะตัดสินโลกนี้อย่างเวยกับแน่นอน”ฝ9:28 อสย. 10:22-23
29 เป๋นอย่างตี้อิสยาห์ได้อู้ไว้ว่า
“ถ้าองค์พระผู้เป๋นเจ้าผู้มีฤทธิ์อำนาจสูงสุด
บ่ได้ไว้จีวิตลูกหลานหื้อเฮาตังหลายไว้พ่อง
หมู่เฮาก็จะถูกทำลายจ๋นเสี้ยง
เหมือนเมืองโสโดมกับเมืองโกโมราห์ไปแล้ว”พ9:29 อสย. 1:9
จาวยิวบ่ยอมฮับข่าวดี
30 ถ้าจาอั้นเฮาจะว่าจาใด จะว่าคนต่างจ้าดได้เป๋นคนถูกต้องต๋ามธรรมโดยความเจื้อกา เถิงแม้ว่าหมู่เขาบ่ได้ตั้งใจ๋เป๋นคนถูกต้องต๋ามธรรมก็ต๋าม 31 แต่จาวอิสราเอลฮิจะเป๋นคนตี้ถูกต้องต๋ามธรรมโดยก๋านเยียะต๋ามบทบัญญัติแต่ก็ยังบ่ได้เป๋น 32 ตี้เป๋นจาอั้น ย้อนว่าเขาบ่ได้พยายามโดยความเจื้อแต่พยายามโดยเยียะต๋ามบทบัญญัติ เขาเลยข้องใส่ศิลาตี้วางไว้หื้อข้อง 33 ต๋ามตี้มีเขียนไว้ในพระคัมภีร์ว่า
“ผ่อเน่อ เฮาวางศิลาก้อนนึ่งไว้ในเมืองศิโยน
เป๋นศิลาตี้เยียะหื้อคนตังหลายข้องสะดุด
กับเป๋นศิลาตี้เยียะหื้อคนตังหลายต้าว
แต่คนใดตี้เจื้อในพระองค์จะบ่ผิดหวังเลย”ฟ9:33 อสย. 28:16
๕9:5 9:5 อู้เถิง อับราฮัม อิสอัค กับยาโคบ
๖9:5 9:5 แป๋ได้แหมอย่างว่า ขอหื้อพระคริสต์ ผู้เป๋นเจ้าเป๋นนายเหนือกู้สิ่ง ได้ฮับก๋านสรรเสริญตลอดไป อาเมน
๗9:6 9:6 อิสราเอลนี้อ้างเถิง ยาโคบ ตี้มีแหมจื้อว่า อิสราเอล ปฐก. 32:28
ต9:7 9:7 ปฐก. 21:12
ถ9:9 9:9 ปฐก. 18:10,14
ท9:13 9:13 มลค. 1:2-3
ธ9:15 9:15 อพย. 33:19
น9:17 9:17 อพย. 9:16
บ9:20 9:20 อสย. 29:16; 45:9
ป9:25 9:25 ฮชย. 2:23
ผ9:26 9:26 ฮชย. 1:10
ฝ9:28 9:28 อสย. 10:22-23
พ9:29 9:29 อสย. 1:9
ฟ9:33 9:33 อสย. 28:16