Poldi Galesiyahidok pepa youyemguk
Yodakale Mede
Wapum’walaŋ Mede Momooŋ tububihila yohautagiŋ uŋaniŋ adi Judahidi hogok kayoŋbop mintagiŋ, ala mindaŋkade Judahi’walaŋ feknit mokitdi maaŋ kayoŋbop mintagiŋ. Unduŋ tubune malabumuŋ niŋ mintaguk e indiŋ. Timeŋ Judahi’walaŋ feknit mokit adi yadi Moses’walaŋ Yodoko Mede mu keleyagiŋ. Ala kobuk kayoŋbop mintagiŋ doktiŋa Moses’walaŋ Yodoko Mede u kedembe keleyaneeŋ be dediŋ, yoŋa welemulap kisaŋ tigiŋ.
Judahi nolidi Judahi’walaŋ feknit mokit kayoŋbop mintagiŋ adi me sigihik diki foloŋ fek titiŋdok yeniŋgigine tigiŋ. Tiŋa undugoŋ Moses’walaŋ Yodoko Mede maaŋ takalidok yeniŋgiŋ. Unduŋ yobune Poldi medehik u ula indiŋ yeniŋguk. Hidi metam didimehi mintane nadiŋa u Yodoko Mede kelekele talik gineŋ mooŋ, adi tobo Jesu nadisukilitimiŋa Bepaŋ namanda foloŋ metam didimehi mintadok. Unduŋ yogiŋ iŋgoŋ Judahi nolidi Galesiya yokwetneŋ wooŋ kayoŋbop uŋoŋ hatigiŋ Moses’walaŋ Yodoko Mede keledok yeniŋgigine tigiŋ. Unduŋ tigiŋ kaŋ Pol adi kahathik u nadiŋa titiŋhik eŋ nadisukilitihik tubudidimeeŋ tubukilitiŋa hatineŋdok pepa i youyemguk.
Tiŋa Poldi indiŋ maaŋ yeniŋguk. Ne adi Bepaŋdigoŋ Aposel kwanai titiŋdok nindapmaguk. Adi ne’walaŋ be me niŋ’walaŋ nadinadi mu keleguk. Adi Bepaŋ negoŋ kutiniŋa Judahi’walaŋ feknit mokit lekiŋgoŋhik gineŋ hatiŋa Mede Momooŋ yenihautadok niŋguk. Tiŋa yeniŋguk, metam nediyeŋ Kilisto Jesu nadisukilitimiiŋ adi hogok Bepaŋ namanda foloŋ metam didimehi hatiiŋ. Eŋ mede yohepdok indiŋ yeniŋguk. Wapumdi folofolok gineniŋ nihifiyatak eŋ Uŋgoniŋ Munabulidi hatihatinik tubudidimelak kaŋ indi notniyedok titiŋ momohi tiyemam.
Pepa yendiniŋ maaneŋ mede mebi indiŋ haliwiiŋ:
Fiye 1-2 Poldi Mede Momooŋ kwanai hati tuguk uyadi Wapum negoŋ nindidimeune tuguk.
Fiye 3-4 Yodoko Mededok talik eŋ Nadisukilitidok talik keledok wondiniŋ mebi.
Fiye 5-6 Yesu adi folofolok hogoli fiyakutnimguk doktiŋa adi kubugoŋ nadisukilitimiŋa hatihati fafaŋeniŋ kahileneem.
1
Yodakale eŋ yokahaŋ
Nu aposel Pol, nu me niŋdi mu naniŋkukiŋ, eŋ me niŋdi kwanai-mede mu naniŋgiŋ. Adi Jesu Kilisto eŋ Betnik Bepaŋ Jesu kumuŋ gineniŋ tubukaikagukdi kwanai-mede nanimbu tilat. Na eŋ notneye noli nukut hatiiŋ indi Galesiya kwetneŋ kayoŋbop hatiiŋ hiditok pepa i kamehamam.
Bepaŋ Betnik eŋ Wapumnik Jesu Kilisto adi’walaaniŋ siloŋ tobogoŋ, eŋ kulemadi hidut haliwooŋ halaak. Jesu adi Betnik Bepaŋ’walaŋ nadihebet tuguk u takaliguk. Tiŋa kwetfoloŋ hatihati hogoli i hatiyamneniŋ nihikibidalene kadakaniŋnikdok kibikoŋ u negoŋ kumuŋguk. Unduŋ doktiŋa helemahelemaŋ adi’walaŋ wougigit nintilone haliwooŋ halaak. U Biyagoŋ.
Nebek niŋ adi Mede Momooŋ tubufila niŋ yobaak adi yadi hamdok gigit tibaak
Hidi yadi Kilisto’walaŋ siloŋ tobogoŋŋiŋdi hanihehimaneguk, iŋgoŋ hidi adut yagigi mu hatigiŋ, hidi adi pilap bikabuŋa mede talii niŋ’walaŋ gineŋ magi kametnadi tiiŋ, nu wondoktiŋa boho hinek tilat. Iŋgoŋ oŋ, mede momooŋ gitipmuŋgoŋ noli daŋ hatak? U moŋ hinek. Wadi hogok-ku meeniŋ nolidi wele tubufit tihamuŋa Kilisto’walaŋ Mede Momooŋ u tubufit tihamiiŋ, u hogok-ku tilak oŋ.
Unduŋ doktiŋa indibe, be kunum gineniŋ aŋelo niŋdi Mede Momooŋ haniŋit u tubufila niŋ nobu hanimbaak adi yadi hamdok gigit tibaak. Mede u youlat uŋakoŋ kotigoŋ youtat. Nebek niŋdi Mede Momooŋ hanihehitubu-didimeŋit u tubufila niŋ hanimbaak adi yadi hamdok gigit tibaak.
10 Kaŋ dediŋ, mede i yolat uyadi meeniŋdi nabune utumbadok be Bepaŋdi nabune utumbadok yolat? Nu meeniŋdi nadinambune utumbadok nadiŋa kwanainewe tugut binek, dediŋ tiŋa Kilisto’walaŋ tipilapilaye-me hatilit?
Pol ne’walaŋ hatihati diniŋ mede
11 Notneye, nu mede indiŋ hanimbe nadineŋ. Mede Momooŋ haniŋgut uyadi meeniŋdi’walaaniŋ moŋ. 12 Tiŋa undugoŋ, meeniŋdi nanindidime mu tigiŋ, uyadi Jesu Kilisto negoŋ nanimbihila nanindidimeguk.
13 Nu koomkwaha Judame heki’walaŋ baŋamneŋ hatiŋila nemek tugut, u hidi agaŋ nadiiŋ. Nu Bepaŋ’walaŋ Kayoŋbopŋiye widihi yehikele tiŋa kisaŋ yehitubu-kadakagut. 14 Uyadi indiŋ yoŋa tulugut. Judahi’walaŋ titiŋ hogohogok u mu bikabune fowaak yoŋa fafaŋe hinek tugut. Tiŋa mekuyahi notneye’walaŋ titiŋ u nu’walaŋdi yalakapmeŋ hinek tuguk.
15 Kaŋ Bepaŋ adi koom maŋ weleneŋ hatuwene nabukahileeŋ kulema eŋ siloŋŋiŋ doktiŋa naninehimantigukdi nabune tuwot tubune 16 Mihiŋiŋ’walaŋ Mede Momooŋ u meeniŋ Judahi’walaŋ feknit mokit’walaŋkade yohautadok ne’walaŋ mebiŋiŋ nanimbihila nanindidimeguk. Unduŋ tinambune nu kwetfoloŋ meeniŋ noli yeninadi mu tugut. 17 Tiŋa undugoŋ, Jelusalemde looŋ aposel tububihila hatigiŋ adi mu yabugut. Moŋ, nu yadi Alabiya kwetneŋ wooŋ hatigene kotigoŋ udaneeŋ Damasko yokwetneŋ bugut.
Pol adi Jelusalem yokwetneŋ looŋ hatiguk
18 Hatibene gulet 3 dapmaune Pita* Wou noli Sifas. kawit yoŋa Judiya kwetneŋ Jelusalemde looŋ melenai 15 wondok tuwot adut uŋgoŋ hatigut. 19 Uŋaniŋ aposel noli mu yabugut, Wapum kwayaŋ Jems hogok kagut. 20 Mede i youtat adi Bepaŋ’walaŋ namanda foloŋ biyagoŋ yoŋa youtat. 21 Unduŋ tiŋa Siliya eŋ Silisiya kwetneŋ wooŋ hatigut. 22 Eŋ Judiya kwetneŋ Kilisto’walaŋ kayoŋbop hatigiŋ adi yadi mu nabugiŋ. 23 Adi yadi nu’walaŋ mede kahat indiŋ hogok nadigiŋ. “Nindihi nihikele tinimiŋa Mede Momooŋ tubuliwe titiŋdok yogukdi meeniŋ Mede Momooŋ uŋakoŋ hinek hati yenihautalak.” 24 Unduŋ yoŋa nutok tiŋa Bepaŋ niutumbagiŋ.

*1:18: Wou noli Sifas.