13
Jesos iquibaguititaiguëri irogomere iguitiquë.
1 Terai oretima Pásicoa cara iquengaigairo jorío cara isotocaigai Ejípitoquë jiraisonori. Igóque Jesos aroque pareca cataguiteri cara irojocanëro quibatsi iriátae Iririquë. Cara inintasantaiguëri quemisantatiri Jesos yaca quibatsica, yamai inintasantasanoiguëri. 2 Cara yapaigasegui, aroque iquiancacari Satanás ira Joras itomi Simón ipaniaca Cariotiquë cara irácagantëri Jesos. 3 Igóque Jesos aroque ipëri Iriri omagaro. Aisati igóque ipaniaca Tosorintsiquë aisati yamai iripiganajima jonoquë. 4 Icabiritanaca mesaquë, isaboquëro imanchaqui, yáguëro oquibiantsa tocoya imatsaguitanacaro, 5 ishëro nija irabatarioquë, aro iparintaca iquibaguititaguequeri irogomere aique iseantaari tocoyaquë ora imatsaguisiga.
6 Cara pënibaque inguibaguitiqueri Simón Peroro aro yosamitëri Peroro:
—Natingomi ¿Pinguibaguitiquinanico naro?
7 Yotabitanëri Jesos:
—Yamai teni pinguemiro ora nacanti, aiquenta pinguemaquero.
8 Carari icanë Peroro:
—Naro quero piquibaguititina.
Yotabitanëri Jesos:
—Queroca naquibaguititimi, quero pini Naroica.
9 Aique icanqueri Simón Peroro:
—Natingomi, querori patiro piquibiro naguiti. Aisati pinguibaquina nobacoquë, pinguibaquina naguitoquë.
10 Icanëri Jesos:
—Ira quibacha irirai quero iquibaja omagaro, patiro iguitiquë inguibima aroquenta irinaga yoguëteta. Obirojegui pinaga poguëtetaiga paneingomentoquë carari te antagaisati pinguëtetaigue.
11 Icanque Jesos: “Teni antagaisati pinguëtetaigue”, aroquenta igóque pairiraca ágagantërine. 12 Aroqueque iquibaguititaiguëri Jesos icairo imanchaqui aisati, isobiaque mesaquë. Yosamitëri irogomere:
—¿Pigótaiguëro oca nacantaiguëmica? 13 Pijitaiguina Ogomeantatsiri aisati pijitaiguina Pitingomi. Picantaiguiro ora aisonori Naronta Pitingomi. 14 Aroquenta naquibaguititaiguëmi Naro Ogomeantatsiri aisati Pitingomi, caninataque pinguibaguititobaguima aitosati obirojegui. 15 Noniaguëmiro ora pingantaiguë aisa pinganquero obirojegui ora nacantaiguëmi yamai. 16 Nangantasantëmini ora aisonori. Ira iromerataga quero ibatiri ira meratari, aisati icanta ira iragátaga quero ibatiri ira agátirira. 17 Aroca pinguemaquero oca nocomantëmica, aro pinganinataiganaque pinganqueroca. 18 Teni nanibatëgoiguemi omagaro obiro nigótasantimininta aroquenta nocoiguëmi. Nocoiguëmi arota omoncaratima Sanguenari ora ocanti:
Ira pëcoquina pan yamai iguisanëintanaina. Icoque iróguina.
19 Nocomantaiguimiro negaca cara iróquinaca pinguenguero, përosati pinguemisanquina Naantinta Agabisaicoontatsiri. 20 Nangantasantëmini ora aisonori pairiraca ágobërine ira nagáque aitosati irágobënanisati Naro. Ira ágobënane Naro aisati irágobëri Pabati Ira agáquina Naro.
Jesos icomantëgotëri ira ágagantërine.
(Mt 26.20-25; Mr 14.17-21; Ir 22.21-23)
21 Cara inibatë negaca Jesos yogasëretasantanaca icantaiguëri irogomere catingasati:
—Aisonori nangantasantëmini, ainta paniro obirojeguiquë ira ágagantënane.
22 Aique inetsabacagaguetanaca irogomere Jesos. Te irogóigue pairiraca ira inibatëgotë Jesos. 23 Paniro irogomere ira inintasanti Jesos yapanamitacagaseguiri. 24 Simón Peroro ijigotanëri ira panamisiguiri Jesos arota irosomitiri pairiraca ira inibatëgotasegui Jesos. 25 Ira panamisiguiri Jesos inebintasitanacari yosamitëri:
—Natingomi, ¿Pairi pinibatëgoti?
26 Yotabitanëri Jesos:
—Ira nomë pan nagaatane, iriro ninibatëgoti.
Aro yogaatëro pan ipëri Joras Cariotisati itomi Simón. 27 Yágobëro pan Joras aito cara inantanacari Satanás. Aique icanqueri Jesos:
—Ora picogui pingantiro, pingantiro omanapague.
28 Iquemabecaro basini irogomere Jesos. Te poro quemasantobërine Jesos. 29 Irironta Joras omisantineri iguireguite irogomerejegui, ainta ijique igáquerini Jesos iromanante Joras ora asi jiesita. Ainta basini ijique igáquerini imëri quirequi ira coguitiachari. 30 Cara yapëro pan Joras isotocanë, aroque otsitinitanë.
Jesos igáqueri irogomere: “Pinintobaganëma”.
31-32 Aroqueque isotocanë Joras, icanque Jesos:
—Omanapague yamai iraniacaninataiguëna matsiguenga, ingantocotaiguëna: “Caninarisonori Ira paniacha jonoquë imatsiguengatapë”. Aitosati ingantocotaiguëri Tosorintsi: “Caninarisonori Tosorintsi aroquenta igáqueri Itomi yaca quibatsica”. Aisati yamai ingantocoquina Tosorintsi: “Ira matsiguenga iraniacaninataiguerita Notomi”. 33 Obirojegui cantaca najaniquite, arosata yamai ninagaiganajimi cara queroquerai niáti. Pingogabetajina, carari cani jirai nocomantaiguëri jorío, aisati yamai nongomantaiguimi obiro: quero piáti cara najáque Naro. 34 Oca nagáquemi irorai, pinintobaganëma. Aisa nacanta Naro nanintasanotaiguimi, aisati pinintasanotobaguima. 35 Aroca pinintobaganëma, aro antagaisati matsiguenga irogóiguemi obiro nogomerejegui.
Inganque Peroro: “Teni nogótiri Jeos”.
(Mt 26.31-35; Mr 14.27-31; Ir 22.31-34)
36 Icanëri Simón Peroro yosamitëri Ira Jesos:
—Natingomi ¿Nega pijáque?
Yotabitanëri Jesos:
—Cara najáque quero poguiatina yamai. Aiquenta piguiatapëna.
37 Icanqueri Peroro:
—Natingomi ¿Pairo quero noguiabiritimi yamai? Aroca nangamobiquimi nocoguini naguiatimi.
38 Yotabitanëri Jesos:
—¿Aisonori pingamobiquinaca? Nangantasanotëmini aisonori cara queroquerai icaimi tiapa sërari, maba pingantocoquena: “Teni nogótiri”.