14
Icoque itingomipague jorío irácagantëri Ira Jesos.
(Mt 26.1-5; Ir 22.1-2; Jn 11.45-53)
1 Aro pitenibati cataguiteri orequima jiesita jitacha Pásicoa cara yapaiguiro joríojegui ora pan te ine piponganta, aisati iquengaigaca cara isotocaiguë Ejípitoquë jiraisonori. Aro yapatotaigaca itingomipague saseriroti aisati ira ogomeantiro isanguenare Moisés icogaigabitaca iromatobitaigueri Jesos arota iráqueri aisati iróguiri. 2 Icantobagaigaca irirojegui:
—Quero águiri jiesitaquë. Iriro iniacaninataigui matsiguenga. Aroca águëri inguisaigacái eiroegui.
Oshaguëantacari casangajengaro Jesos Betaniasato.
(Mt 26.6-13; Jn 12.1-8)
3 Aique yogaganaca Jesos canta Betaniaquë. Cara, ainta Iriro ibangoquë Simón ira iribatsasetabitaga jirai. Yapasigui Jesos cara pipocasipëri tsinane. Pamëgotasitapëri asaiti casangajengaro jitacha náriro ora tojai pipënata. Ora pinanta pobetsicagani mopë sibitaro jitacha aribásitoro. Pisataicoquero, oshaguëguitontapari Jesos iguitoquë. 4 Aintasati basini matsiguenga iguisëgotaiganacaro casangajengaro. Icantobaganaca:
—¿Pairo paparaabiriquero casangajengaro? 5 Caninataqueme omimantërome casangajengaro águërime tojai quirequi 300 tenario omërime tojai ira coguitiacha omitocotaiguërime.
Iguisaneintaiganaquero tsinane. 6 Icantaiguëri Jesos:
—Ineta iroro. ¿Pairo picantobiquero oca tsinaneca? Patiro ocanquinaro caninaro. 7 Përo cara irinaque obirojeguiquë ira coguitiachari te irine iguireguite; cara pinintica pomitocotaiguëri iriro. Carari quero nini Naro përosati. 8 Ocanquinaro caninasati. Oshaguëantobënaro queroquerai iteina. 9 Aisonori nangantaiguëmi: aiquenta pinguenagueque omagaroquë quibatsi, pinguenguitsatomotaguetaiguëri matsiguenga Caninaro Nibarintsi. Aisati pingomantëgotiro oca tsinaneca arota irogótocotiro matsiguengajegui.
Joras iquianca irácagantëri Jesos.
(Mt 26.14-16; Ir 22.3-6)
10 Aique iáque paniro irogomere Jesos, ijita Joras Cariotisati. Iátasitaiguëri itingomipague saseriroroti, inibatagaigapëri cara irácagantëri Jesos. 11 Iquemaigabaqueri saseriroti, icaninataiganaque iquengaigaca imëri Joras quirequi. Aique ipigapaa Joras, inetsasantëri Jesos arota irogóontëmari atiraca ongantima cara irácagantëri.
Yobetsiquineri Jesos irogomere cara icarantacaro yapë.
(Mt 26.17-19; Ir 22.7-13)
12 Pareca Pásicoa cara yametaiga joríojegui yapaigui pan te ingonaguero ora piponganta, aisati cara yóguiri oboina oisha aisa icanta cara icantaigaca jorío jiraisonori Ejípitoquë. Yosamitaiguëri Jesos irogomere:
—Natingomi, ¿Nega pininti nobetsiquëmiro cara popë Pásicoaquë?
13 Jesos igáqueri pite irogomere:
—Atsi pijáte poeboroquë. Cara pitonguibotobëmarica sërari iromëgotapë nija chomoquë, piguiatanëri. 14 Cara ingapë iriro, pinganqueri casintaro pongotsi: “Icanque Ogometaiguinari: ‘Cara pobangoquë, ¿Nega pini cara nopaiguë Pásicoa Naro aisati nogomerejegui?’ ” 15 Ironijagaiguëmiro oquibe coarito jonoquë; aito pobetsiquëro perintsi asi Pásicoa.
16 Aique iáiguë pite cara poeboroquë, iniaigapëri sërari aisa ocanca omagaro cara icantaiguëri Jesos. Aro yobetsicaiguëro Pásicoa.
Jesos icomantëgotëri ira ágagantërine.
(Mt 26.20-25; Ir 22.21-23; Jn 13.18-30)
17 Cara otsitiniguitetanë, yaretaigapa Jesos aisati irogomere. 18 Cara yapaigasegui mesaquë, icantaiguëri Jesos:
—Aisonori nangantaiguëmi, ainta paniro yapëgotëna yaca ira ágagantënane.
19 Aro yogasëretaigaca antagaisati, paniropague yosamitëri:
—Natingomi, ¿Naroco ágagantëmine?
20 Icantaiguëri Jesos:
—Irianti paniro obirojegui picarati 12. Irianti pëcosiguina cara napë noberatotequë. 21 Nopaniaca Naro Jonogaguitequë, nomatsiguengatapë yaca quibatsica. Jirai isanguenatocoquina Sanguenariquë, aroque nomoncaraquero omagaro. Irari atsipiriasantërone ira ágagantënane, ¡Caninataqueme querome ini iriro! ¡Querome itsipireiro!
Yogomeantë Jesos irapapinintobiqueri quemisantatsiri aisati irógobitaiguëmari.
(Mt 26.26-29; Ir 22.14-20; 1 Co 11.23-26)
22 Cara yapaigasegui, Jesos yáguë pan, icarasiaqueri Tosorintsi, itibatsaaguequero, yotsatengaiguëri irogomerejegui. Icantaiguëri:
—Jeroca pan osigaro nobatsa. Popaiguero. ¿Teco nangamobitaiguemi?
23 Aique yáguë irógomento, icarasiaqueri Tosorintsi, ipaguitaiguëri. Antagaisati yógaigacaro.
24 Icantaiguëri:
—Iroro osigaro naraa, ora naraatobitanëneri omagaro matsiguenga cara nangamobitaiguëri. Yamai naraa ocanti irorai Nibarintsi; iroro ingábintsantaiguëmari Tosorintsi. Cara irabentaiguëna, Tosorintsi irojocajineri matsiguenga ora icantagueti te onganinate, quero iquengaineri aitosati. Nacantaiguëmi yamai arota pigóigue atiraca ongantima iragabisaicotajiri Tosorintsi antagaisati quemisanquinane. 25 Yamaica quero nógaaro oja oba aisati irooti cara nantsibataiguëmi cara iragáantanequë Pabati. Cara igáantë Iriro omagaro omasiniatitanë. Aique nóguëmaro iroraia aisati obirojegui.
Icantaiguëri irogomere Jesos: “Yamai pijocaiganaquina”.
(Mt 26.30-35; Ir 22.31-38; Jn 13.36-38)
26 Aroque yapaiguë. Aique icántataiguë Jesos aisati irogomere, iáiguë cara oguitojaquë jitacha Olibos. 27 Icantaiguëri irogomere Jesos:
—Yamai pijocaiganaquina pisigaguetanëma, cara ocanti Sanguenari:
Nóguëri ira omisantirine oisha, aro irisigaiganaquima iroishate, inguenagueque porocague.
28 Carari nanganiatanae, nobataiguëmi canta Garireaquë.
29 Iriro cantënguicha Peroro icanqueri:
—Aroca irojocanëmi antagaisati basini icaegui, quero nojoquimi naro.
30 Yotabitanëri Jesos:
—Aisonori nongomantëmi, Peroro. Yamaica tsitinirica queroquerai icaimanai tiapa sërari, ongaraque maba pinganque: “Teni nogótiri Ira Jesos”.
31 Aisati icanatasantë Peroro:
—Aroca nantsibatëmi nangamobiquemi, quero nacanti: “Teni nogótiri Ira Jesos”.
Aisa icantaiguë antagaisati irogomere.
Jesos yamanaqueri Iriri cara panguirintsisiquë jitacha Jetsemaní.
(Mt 26.36-46; Ir 22.39-46)
32 Aique iáiguë yaretaigaca Jetsemaníquë. Jesos icantaigapëri irogomere:
—Pisobicaigue yaca; najáque Naro cara, nomanocoqueri Pabati.
33 Aro maba yáganë casiriconiati: Peroro aisati Santiago aisati Joan. Iparintaca Jesos tojai yogasëretasantaca aisati iquenganeintasantaca. 34 Icanqueri:
—Tojai nogasëretasantaca agabenisonori. Pënibaque nangamaque. Pisobicaigue yaca, pingaguite.
35-36 Aique yogaganaca cara querora, yaquitomopa quibatsiquë. Yamanocopëri Iriri:
—Apa, Pabati, Obiro pinganque omagaro; caninataque pigabisainaro ora bocatsi; teni naninte natsipirie, carari quero nacantiro ora nocogabeca Naro, iroonti nanganque ora picocaquina Obiro.
37 Aique Jesos ipigapaa irogomerequë. Iniopairi isamaigasegui. Yosamitëri ira Peroro:
—Simón, ¿Pairo pisamabirique? ¿Teco pabebintsatiro pobotsiquine, te pabetiro pingaguitëmate arosata? 38 Pingaguite, pomaniri Tosorintsi arota iromitocotaiguemi quero picantaguetiro ora te ongomeite. Picogabeta pingantirome ora nococaquemira, carari te pingantiro.
39 Aisati iátaji Jesos. Yamanocotajiri Iriri. Irootisati yogatsitairi ora icanqueri naaraiquerai. 40 Ipigapaa aisati iniopairi irogomere aitosati isamaigasegui, tojainta ipotsiquitasantë. Te irogóiguë irotopitanairi. 41 Aisati iátaji yamanopai maba. Aro ipiganaja Jesos, icantaiguëri irogomere:
—¿Somaigatsibico? Atsi pisamaigue yamai. Jirai nopaniaca Jonogaguitequë nomatsiguengatapë. Carari aroque omoncaraca yamai cara irácagantëna ira cagari caninataigatsi. 42 Pingabiritaiguema, intsome ajáte. Coraguitaque ira ágagantënane.
Yáguëngani Jesos.
(Mt 26.47-56; Ir 22.47-53; Jn 18.2-11)
43 Cara inibatasegui Jesos, yarepa Joras ira yogometabeta Jesos. Icarataigapëri tojai matsiguenga. Yamaigapë isabirite aisati anchaqui. Aroque igátaiguëri itingomipague saseriroti aisati ira ogomeantiro isanguenare Moisés aisati antiasiparipague. 44 Aroque icomantaiguëri Joras icanque:
—Ira nasarapëma ora pigóontanëmari Iriro Jesos. Páganëri.
45 Aique iátasipëri Jesos Joras, yasarapari, icanque:
—¿Aintabi, Ogometinari?
46 Aique ipocasitaigapëri antagaisati ira itsibataigapa Joras, yágaiganaqueri Ira Jesos. 47 Aro paniro irogomere yáguë isabirite, itoguimitatëri iromeraro itingomi saseriroti. 48 Aro icantaiguëri Jesos:
—¿Pairo pamasibiriquinaro pisabirite aisati anchaqui págantanënaro? ¿Pijitaiguëco Naro cosirintsi? 49 Tojai piniaigabitina cara nogometaiguimi cara ibangoquë Tosorintsi, te págaiguena carari aroquenta omoncaraca ora ocomantëgotina Sanguenari.
50 Aique ijocaiganaqueri Jesos antagaisati irogomere, isigaguetaiganaca. 51 Ainta poro oboina sërari yoguiatanëri Jesos. Te inguitsagatema, patiro icanaquero tocoya. Yágaigabitacari iriro matsiguenga 52 carari ijocanëro tocoya, isigaganatanaca saacanari.
Yágaiganaqueri Jesos catingasatiquë itingomipague joríojegui icarati 71.
(Mt 26.57-68; Ir 22.54-65; Jn 18.12-14, 19-24)
53 Aique yágaiganaqueri Ira Jesos ibangoquë itingomisonori saseriroti cara yapatobiritaigacari basini itingomipague saseriroti aisati antiasipari aisati ira ogomeantiro ora isanguenare Moisés. 54 Yoguiataiguëri Peroro icarantanë. Icapë tantotsiquë tsomagui itsibataigacari sorarojegui cara yotataiguë tsitsiquë. 55 Aro ira itingomipague saseriroti, aisati antiasipari, aisati omagaro itingomipague jorío icarati 71 icogaigabitaca matsiguenga ingomantëgotëri Jesos ora te onganinate arota irógaigueri. 56 Ainta tojai itsoiguëgotaigabitacari Jesos carari te inguengaiguema. 57 Ainta basini tsoiguëgotantachari icantaiguë:
58 —Cani jirai naquemaiguëri naroegui cara icanë Jesos: “Nogomeriguetairo oca ibangoca Tosorintsi ora yobetsicaiguë matsiguenga. Ongaraque maba cataguiteri, nangabiritajiro basini irorai ora te irobetsiquiro matsiguenga”.
59 Carari teatisati onguengaiguema irinibare ira comantëgotaiguëri. 60 Aro icabiritanaca itingomi saserirotipague, yosamitëri Ira Jesos:
—¿Pairo te potapibiritiri? ¿Pairo ojita oca icantocotaiguëmica?
61 Përo cara imairetopitëri Jesos, te irotopitëmatiri. Aisati yosamitairi itingomi saseriroti:
—¿Obiroco Quirisito Itomi Tosorintsi caninarisonoriguinte?
62 Icanque Jesos:
—Jee, Naro. Nopaniaca Jonogaguitequë, nomatsiguengatapë. Aiquenta piniaigaina nosobigopë ibacosonoriquë Tosorintsi sintsirisonoriguinte, aisati piniajina cara nopoque mingoriquë, nopigapaima yaca quibatsica.
63 Aito cara iguisanaca itingomi saseriroti itisaraanëro imanchaqui, icanque:
—Piquemaigabaqueri. ¿Pairo ongogobique basini comantëgotërine? 64 Icantocotaguetasitari Tosorintsi. ¿Pairo piquengaiga obirojegui? ¿Pairo anganqueri?
Yotabitaiguëri joríojegui; iquengaigaca antagaisati:
—Caninataque ingamaque.
65 Aique ijobaboroqueri iboroquë, ibasioquiqueri iroquiquë inchotangaborotëri. Icantaiguëri:
—Jaa, pingomantina. ¿Pairi capojëmi?
Aisati iromeraroegui itingomi saseriroti inchotangaborotëri.
Icanque Peroro: “Teni nogótiri Jesos”.
(Mt 26.69-75; Ir 22.54-62; Jn 18.15-18, 25-27)
66 Aintaquerai isobiaque Peroro saaguiteroquë. Pipoque tsinane ironomire itingomi saseriroti. 67 Oniopëri cara yotasigui tsitsiquë. Onetsasantëri ocanqueri:
—Aisati obiro aguiatiri Jesos, Ira Nasaresati.
68 Carari itsoiganaca Peroro:
—¡Teni nogótiri! ¡Teni nanguemimi pairoraca picantina!
Aro iátabeca Peroro cara icabitapa. Aito cara icaimanë tiapa sërari. 69 Iroroquerai tsinane onetsiri Peroro aisati. Ocantaiguëri iraegui inaigasegatsi:
—Ica sërarica aguiatëri Jesos aisati irogomere.
70 Yotabitanai Peroro:
—¡Teni nogótiri!
Caraca arosata, ira inaigasegatsi icantaiguëri ira Peroro:
—Aisonori obiro tsipataigari irogomere Jesos obironta Garireasati; pinibatinta picantaigari ibegaiga Garireasati.
71 Icantasanti Peroro:
—Te sonori nogótiri sërari ira picantocoquina. Igóque Tosorintsi aisonori nacanquemi. Queroca ninibatimi catingasati, nocogui ingasitígatina Tosorintsi.
72 Aito cara yogatsitanai icaimanai tiapa sërari. Aro iquianquero Peroro cara icomantëri Jesos: “Queroquerai icaimanai tiapa sërari, maba pinganque: ‘Teni nogótiri Jesos’ ”. Cara iquengairo ora icanqueri Jesos, iragasantanaca Peroro.