भजन 95
1 आओ, हामी याहवेहको निम्ति आनन्दले गाऔँ;
हाम्रा मुक्तिका चट्टानको निम्ति उच्च सोरले जयजयकार गरौँ!
2 धन्यवाद चढाउँदै उहाँको सामु आऔँ,
भजन र सङ्गीतले उहाँको प्रशंसा गरौँ!
3 किनकि याहवेह महान् परमेश्वर हुनुहुन्छ,
सबै देवहरूमाथि महान् राजा।
4 पृथ्वीका गहिराइहरू उहाँको हातमा छ;
र पर्वतका चुचुराहरू उहाँकै हुन्।
5 समुद्र उहाँकै हो, किनकि त्यो उहाँले नै बनाउनुभएको हो,
र सुक्खा जमिन उहाँकै हातद्वारा बनिए।
6 आओ, हामी उहाँलाई दण्डवत् गरौँ र आराधना गरौँ;
याहवेह हाम्रा सृष्टिकर्ताको अगि घुँडा टेकौँ;
7 किनकि उहाँ नै हाम्रा परमेश्वर हुनुहुन्छ;
अनि हामी उहाँको खर्कका प्रजा र
उहाँको रेख-देखमा रहेको बगाल हौँ।
यदि आज तिमीहरूले उहाँको सोर सुन्यौ भने,
8 “तिमीहरूले मेरीबामा*जसको अर्थ हो झगडा गरेजस्तो आफ्नो हृदय कठोर नपार;
जस्तो तिमीहरूले त्यस दिन मरुभूमिमा भएको मस्सामा†जसको अर्थ हो परीक्षा गर्नु गरेका थियौ,
9 जहाँ तिमीहरूका पुर्खाहरूले मलाई परीक्षा गरे;
तिनीहरूले मेरो काम देख्दादेख्दै पनि मेरो जाँच गरेका थिए।
10 चालीस वर्षसम्म म त्यस पुस्तासँग रिसाएँ,
र मैले भनेँ, ‘यी यस्ता मानिसहरू हुन्, जसका हृदय बरालिएर जान्छन्,
र तिनीहरूले मेरा मार्गहरू चिनेका छैनन्।’
11 यसकारण मैले आफ्नो क्रोधमा शपथ खाएर घोषणा गरेँ,
‘तिनीहरू कहिल्यै पनि मेरो विश्राममा पस्नेछैनन्।’ ”