8
1 यदि तपाईं मेरी आमाको दूध खाएर हुर्केको,
मेरा दाजुभाइझैँ हुनुहुँदो हो त!
तपाईंलाई बाहिर भेट्दा
म म्वाइँ खानेथिएँ,
र कसैले मेरो निन्दा गर्ने थिएन।
2 तपाईंलाई डोर्याएर
म मेरी आमाको घरमा ल्याउनेथिएँ—
जुन आमाले मलाई शिक्षा दिएकी छन्।
म तपाईंलाई मसाला मिसाएको दाखमद्य,
मेरा अनारका रस पिउन दिनेथिएँ।
3 उहाँको देब्रे हात मेरो शिरमुनि छ,
र दाहिने हातले मलाई अँगालो हाल्नुभएको छ।
4 हे यरूशलेमका छोरीहरू हो, म तिमीहरूलाई शपथ खुवाएर आज्ञा गर्छु:
उचित समय नभएसम्म
प्रेमलाई नजगाओ अथवा नबिउँझाओ।
मित्रहरू
5 आफ्ना प्रेमीसित अडेसिएर
उजाडस्थानबाट आउँदैगरेका यिनी को हुन्?
प्रेमिका
स्याउको रूखमुनि मैले तपाईंलाई जगाएँ;
त्यहीँ तपाईंकी आमाले तपाईंलाई गर्भधारण गरेकी थिइन्;
त्यहीँ नै तिनले सुत्केरी व्यथा लागेर तपाईंलाई जन्म दिएकी थिइन्।
6 मलाई तपाईंका हृदयमा छापझैँ राख्नुहोस्,
तपाईंका पाखुरामा छापझैँ लगाउनुहोस्;
किनकि प्रेम मृत्युसमान प्रबल हुँदछ;
यसको तिर्सना चिहानझैँ कठोर हुन्छ।
यो दन्कने आगोसमान दन्कन्छ,
यो शक्तिशाली ज्वाला*अथवा याहवेको ज्वालाजस्तै जस्तै हुन्छ।
7 उर्लेको पानीले पनि प्रेमलाई निभाउन सक्दैन;
नदीले पनि त्यसलाई बगाउन सक्दैन।
यदि मानिसले प्रेमको निम्ति
आफ्नो घरको सारा धनसम्पत्ति दिइहाले तापनि
यो†अथवा उसको पूर्ण अवहेलना हुनेछ।
मित्रहरू
8 हाम्री एउटी जवान बहिनी छिन्,
जसका छाती उठेका छैनन्।
उनको विवाहको लागि कोही माग्न आएको दिनमा,
आफ्नी बहिनीको लागि हामी के गरौँ?
9 यदि ऊ पर्खाल भए त,
हामी ऊमाथि चाँदीका बुर्जा बनाउने थियौँ।
यदि ऊ ढोका हुँदो हो त,
हामी देवदारुका फल्याकले बारेर बन्द गर्ने थियौँ।
प्रेमिका
10 म एक पर्खाल हुँ,
र मेरा स्तनहरू धरहराहरूजस्तै छन्।
यसरी उहाँका नजरमा म
सन्तुष्टि तुल्याउने ठहरिएकी छु।
11 बाल-हामोनमा सोलोमनको एउटा दाखबारी थियो;
आफ्नो दाखबारी मोहीहरूलाई दिए।
हरेकले दाखबारीका फलको सट्टामा
हजार सेकेल‡लगभग 12 किलो चाँदी ल्याउनुपर्थ्यो।
12 तर मेरो दाखबारी, जो मेरै अधिकार हो;
हे सोलोमन, ती हजार सेकेल तपाईंकै निम्ति हुन्,
र दुई सय ती फलफूल रेखदेख गर्नेहरूका निम्ति हुन्।
प्रेमी
13 तिमी, जो दाखबारीमा
आफ्ना मित्रहरूका साथमा बास गर्दछौ,
तिम्रो सोरलाई सुन्न देऊ!
प्रेमिका
14 हे मेरा प्रेमी, बाहिर आउनुहोस्,
र सुगन्धित मसलाले भरिएका पर्वतहरूमा
हुने हरिणजस्तै अथवा
जवान मृगजस्तै हुनुहोस्!