Paulo Ena Malele Lava'ana'ina
KOLINTO (1)
Kauta Kevatai
Puka Laloana Ilelena Luvana
Paulo ena melalai, Kolinto 'eva vanua namana Akaia kanona laloanai Elene 'abuna. Paulo sibona 'eva kau lava'ana'ina Iesu valina nama'ina Kolintoai eiloloa, beia eda'aovo ede'a 'abu vaida ena vinaula bevavaia laloanai abiveni kauta viloatai adedua namata vaida depulu.
Kanaua 'ounai malele kanania eleleia, kevatai beluvavaia kave'i mai eta adedua vaka bevakomolota. Ena makau namana 'eva eta abiveni asi'i ema'ekoasi 'ounai, maivaka eta koakoa mediata vaka si'avata vaikai asi'i demaao. Dala nama'ina kanaua dekamoane kauta bemauli vaia eluvavaia kave'i, maivaka kanaua 'eva dava namana inoku bevavaia 'eva enama'ina. Mai Paulo ediaka, adedua katania kau kevatai depupulu 'olana Idume Kabukabuna eta mauli be'ana'ia vaita 'eva sia de'ula 'ounai. Paulo ediaka, dala nama'inanai eka mia maivaka Idume Kabukabuna ena vidulu abiveni kauta kevatai davata lovata eaku. Ba kauta kataua eta ko'isi 'udai lovata eako. Katania boutai 'eva Kolinto kauta eta adedua davata. Paulo eta'u luva nama'ita doutamo evenita Dilava ena ula kanaua beikabasia.
Puka kanania elena 13 laloanai 'eva Paulo eta'u dalana nama'ina kanaua kau ilalo'auvenita lovana eakuia, kanaua 'eva Idume Kabukabuna ena veniveni davana nama'ina eveni davata boutai akatai, inoku Dilava sibona etata'u ena kau evenita.
Puka Iduvuna Namata
a. Lova aku. (1.1 - 9)
b. Koa oleta Dilava ena lo'e laloanai. (1.10 — 4.21)
c. Kulakula koakoata si'avata vaika mai luma maulina. (5.1 — 7.40)
d. Abiveni kauta mai si'avana kauta. (8.1 — 11.1)
e. Lo'e maulina mai kukudivo dalana. (11.2 — 14.40)
f. Keliso mai abiveni kauta eta ko'isi 'udai. (15.1 - 58)
g. Abiveni kauta eta vidulu Iudea eta. (16.1 - 4)
h. Paulo ena ula luvana mai luva to'ota. (16.5 - 24)
1
Vanama'ina Luvana.
1 Lau Paulo, Keliso Iesu ena veauneke kau'u Dilava ena ulai e'ae'u, mai abiveniai bo'akalata Sosotene ita, 2 malele kanania lai alelea evavasi Dilava ena lo'e kaumui Kolinto vanuanai kevamui, oi Keliso Iesu enai edilamui mai e'aemui Dilava ena kabukabu kaumuiai oi bo'ao, mai 'abu boutai eta Lovia namana Iesu Keliso vana de'aea mai dekukudivo venia kauta kataua boutai kevatai. Iesu Keliso 'eva ia mai ita eta Lovia namana. 3 Lai ameamea Dilava ita Kamata mai Lovia namana Iesu Keliso eta iulaveni mai nua'elu bevenimui.
Paulo Vanama'ina Luvana
Dilava Evenia.
Dilava Evenia.
4 Lau melala boutai Dilava avanama'inala oi daimuiai 'olana Keliso Iesu laloanai Dilava ena iulaveni evenimui. 5 'Olana Keliso laloanai oi 'eva dala boutai laloatai, emui luvaluva boutai mai emui ikabasi boutai 'ani evaloviata. 6 Keliso valina lai akavala valina nuamuiai 'ani ekula'ila. 7 Kanaua 'ounai vali'u oi 'eva Idume Kabukabuna ena ainama sia kai oi otabu beia ovi'ima beda'amo eta Lovia namana Iesu Keliso bemue 'udai. 8 Iesu betata'u bevalava 'inimui beda'amo to'onai, inoku ia ena asi melalanai oi 'eva va'eva sia bevakoamui. 9 Dilava 'eva lele ivavua venina kauna, ia eta'u oi e'aemui oi boda'a Nakuna Iesu Keliso ita eta Lovia namana ita oi bovaka'onamo.
Dilava Ena Lo'e Kauta
Viloata Edau'a.
Viloata Edau'a.
10 Bo'akala'u e, eta Lovia namana Iesu Keliso vanai anoimui, boumuiai emui luvaluva beka'onamo inoku viloamui sia be'alama, beia oi bovaka'onamo kave'i nuamuiai maivaka emui lalovailalovaiai. 11 Bo'akala'u e, Koloe ena luma kauta vaida de'ou'u oi viloamuiai 'eva viala depupulu. 12 Lau a'oua davana anina kanania, ka oluluva odiaka, “Lau 'eva Paulo ena,” ka oluluva odiaka, “Lau 'eva Apolo ena,” ka oluluva odiaka, “Lau 'eva Petelo ena,” ka oluluva odiaka “Lau 'eva Keliso ena.” 13 Inoku Keliso 'eva dekovia, una? Paulo oi daimuiai au ido'o valaukuna akanai deaku bala, una? 'O Paulo vanai oi vaidi'u kabukabu oi oabia, una? 14 Dilava avanama'inala 'olana lau oi sia ka avaidi'umui kabukabu, beia Kilisupo mai Kaio mo avaidi'uta kabukabu. 15 Kanaua 'ounai sia kau ka bodiaka oni 'eva lau va'uai oidi'u kabukabu. 16 'O momo'ai, Setefano mai ena luma kauta vaka avaidi'uta kabukabu, beia mulinai sia aikabasi kau ka avaidi'ua kabukabu 'o asi'i. 17 Keliso esini'u 'eva sia vaidi'u kabukabu 'ounai beia vali nama'ina bailolo vaia, inoku kau ena aoneka luvanai sia bailolo, 'olana Keliso ena ba au ido'o valaukuna akanai siavuna asi'i emaole makauna.
Keliso 'Eva Dilava Ena Siavu
Mai Ena Aoneka.
Mai Ena Aoneka.
18 Keliso au ido'o valaukuna akanai ena ba valina idumeai deba kauta kevatai 'eva bo'o luvanai eao, beia kanaua 'eva Dilava ena siavu ita evamaulita kauta etai. 19 Puka kabukabunai 'ani ilelena,
“Aoneka kauta eta aoneka
bavaolea, mai idiba kauta
eta idiba 'eva dava asi'iai bavaaoa.”
Isa 29.14
20 Inoku aoneka kauna 'eva a'ia'i? Malele kave'i kauna 'eva a'ia'i? Melala kanania'i luva eidibavaia kauna 'eva a'ia'i? Dilava eta'u kanobata kauta eta idiba 'eva bo'oai evaoa.
21 Inoku Dilava ena aoneka 'eva kanania boina, kanobata kauta eta aoneka ai 'eva Dilava sia beikabasia, beia Dilava ena lalonama 'eva ilolo luvana bo'o luvanai devaaoa kanaua beabivenia kauta 'eva bevamaulita. 22 Iuda kauta eta ula 'eva koa namata be'ika inoku Dilava bevamomo'aia, mai 'Elene kauta 'eva aoneka dekavuia. 23 Beia lai 'eva Keliso au ido'o valaukuna akanai eba valina lai ailolo vaia, kanaua 'eva Iuda kauta evaakuaku leata mai pulu edea kauta kevatai 'eva bo'o lalovainai devaoa. 24 Beia Iuda kauta 'o sia Iuda kauta viloatai Dilava e'aeta kauta kataua etai Keliso 'eva Dilava ena siavu mai Dilava ena aoneka. 25 Dilava ena lalovai kanaua bo'oai devaaoa lalovaina eta'u kau eta aoneka ekeinia, maivaka Dilava kevanai badebade davanai devaaoa davana eta'u kau ena kula'ila ekeinia.
26 Bo'akala'u e, oi kau a boimui ai Dilava e'aemui kanaua bolalovaia, kau eta ikaikai 'eva dounamo sia oi oaoneka, dounamo sia oi okula'ila, maivaka dounamo loviai sia oi opulu. 27 Beia Dilava eta'u kanobata kauta oi bo'o kaumuiai devaaomui kaumui edilamui aoneka kauta bevamalalaita, mai oi badebade kaumuiai devaaomui kaumui edilamui kula'ila kauta bevamalalaita. 28 Dilava eta'u kanobata kauta kau kataua deikata 'iu'iu, sia devakuta mai kevata dava asi'i ai devaaota kauta edilata, kau kataua kanobata kauta kau namatai devaota kauta bevasi'avanata. 29 Kanaua 'ounai kau ka Dilava vailanai be'apa 'abuna asi'i. 30 Beia oi 'eva Dilava evuamui easi Keliso Iesu ita evaka'onamomui. Keliso 'eva Dilava enai easi eta aonekai eao, inoku ia kaunai 'eva kakomolo, kakabukabu mai si'avana 'abunai evamaulita. 31 Kanaua 'ounai Puka kabukabunai 'ani ilelena,
“E'apa kauna 'eva Lovia namana emaapavaia.”
Iel 9.24