1 Vali'u kanania 'eva ainama ianita dilava dedena devenia luvana. Luva umauna ita kaikabasi, “Ita boutai 'eva mai eta ikabasi.” Inoku ikabasi etata'u apa eabia isi, beia lalo'au etata'u abiveni kauta evakula'ilata. 2 Kau ka sibona elalovaia ia 'eva mai ena ikabasi dava vaida eikabasita, beia bemaikabasita dokadoka davata 'eva sia eikabasita. 3 Beia kau ka Dilava elalo'au venia kauna 'eva Dilava vaka kau kanaua eikabasia.

4 Kanaua 'ounai ainama ianita dilava dedeta devenita inoku ka'ani luvata 'eva katania. Ita kaikabasi dilava dedeta 'eva sia dilava umauta kanobata kanania laloanai, kaikabasi Dilava umauna 'eva ka'onamo mo. 5 Kau deta'u dilavai devaota kauta vaida vutuvutuai mai kanobatai, (inoku ‘dilavata’ mai ‘loviata’ katania 'eva doutamo.) 6 Beia ita 'eva mai eta Dilava ka'onamo, Kamata. Ia 'eva dava boutai evavaita, inoku ia dainai kamimia. Maivaka Lovia namana 'eva ka'onamo Iesu Keliso. Ia dainai dava boutai depupulu, inoku ia dainai ita kamimia.

7 Beia abiveni kauta vaida luva umauna kanania sia deikabasia. Vali'u melala kanania'i vaida 'eva dilava dedeta eta vinaula 'ani demadanata kave'i 'ounai iani kataua boita de'ani koanai ia delalovaia kanaua 'eva dilava dedeta eta, eta lalovai lalovaiai nuata sia dekomolo, delalovaia iani kanaua deania ianina 'ani eva'obuta Dilava vailanai. 8 Iani 'eva sia bevuata beda'a Dilava kevana, sia eka aniani beia Dilava vailanai ena si'avanana asi'i 'o eka aniani Dilava vailanai vaka ena nama'inana asi'i. 9 Beia oi bo'imamui kave'i, 'olana emui ikabasiai oi oaniani, kanaua betata'u eta abiveni debadebade kauta asi'i emava'ekota si'avana laloanai.

10 'Olana kau ka ena abiveni ebadebade kauna oni idiba kaumu dilava dedena ena vakai oaniani beikamu koanai, ia nuana ovakula'ilala ena lalovai beva'eva inoku dilava dedeta eta iani be'ani. 11 Inoku Keliso bo'akalamu ena abiveni ebadebade kauna kanaua dainai eba 'eva oni emu idiba kanaua betata'u ia idumena bevasi'avanala. 12 Oni emu vavai kanaua'i bo'akalamu nuana oabi si'ala ia elalovaia esi'avana koakoana bevavaia, inoku oni bo'akalamu kevanai 'eva ova'eva maivaka Keliso kevanai 'eva ova'eva. 13 Kanaua 'ounai iani kanaua etata'u bo'akala'u eva'ekoa koanai, lau iani kanaua sia bania 'udai 'olana asi'i amava'ekoa.