Paulo Ena Malele Lava'ana'ina
TESALONIKA (1)
Kauta Kevatai
Puka Laloana Ilelena Luvana
Tesalonika 'eva vanua namana ka Makedonia kanona laloanai. Paulo Pilipo vanuana evikania 'eva eda'a Tesalonika, inoku ua'i abiveni kauta 'itona ka evalavala (Veauneke 17). Melala vaida mulitai Paulo eda'a Kolinto vanuanai, inoku Timoteo easi Paulo kevanai inoku dava abiveni kauta ua'i Tesalonika kauta kevatai epulu davana lovana eaku. Paulo 'eva Timoteo kevanai vali eika laloanai, laluana Sila ita puka kanania deleleia, Tesalonika kauta eta abiveni bevakula'ilala.
Puka kanania laloanai 'eva Paulo lalona denama si'asi'a 'ounai mai eta koakoa nama'ita daitai. Itani ia 'eva Keliso abemue koma 'eva sia deikabasia, mai deula beikabasi kave'i ba kauta 'eva 'ani deba vaika 'o asi'i, mai Keliso 'eva 'ani emue 'o asi'i, mai ia sibota delalovaia ia 'eva 'ani mauli keinikeini kanaua bedavalia 'o asi'i, mai Keliso 'eva aida be'asi? Lavuai katania luvata ivamueta 'eva Paulo e'outa melala boutai koakoa nama'ita bevavai, mai beva 'olu Lovia namana ena mueai be'asi melalana be'imala.
Puka Iduvuna Namata
a. Lova aku. (1.1)
b. Abi isi mai vanama'ina. (1.2 — 3.13)
c. Abiveni maulina umauna. (4.1 - 12)
d. Keliso ena mue'udai ivaikabasita. (4.13 — 5.11)
e. Luva to'ota. (5.12 - 22)
f. Vanama'ina to'ota. (5.23 - 28)
1
Vanama'ina Luvana.
1 Lau Paulo, Sila mai Timoteo emai malele lai alelea evavasi lo'e kabukabuna kaumui Tesalonikai oi omimia kaumui kele'emui, oi 'eva Dilava ita Kamata mai eta Lovia namana Iesu Keliso eta. Lai ameamea Dilava ena iulaveni mai nua'elu akamuiai bemimia.
Tesalonika Kauta Eta Mauli
Mai Eta Abiveni.
Mai Eta Abiveni.
2 Lai melala boutai oi daimuiai Dilava vanama'ina luvana lai avenia mai vamui lai a'oulai emai meamea laloatai. 3 Lai Kamata Dilava vailanai emui abiveni vinaulana oi ovavaia abivenina mai emui lalo'au koana oi obavunuvaia lalo'auna mai emui nuabata Lovia namana Iesu Keliso enai oi ovalava 'inia nuabatana lai alalovai 'inita. 4 Bo'akalamai e, lai 'ani lai aikabasi Dilava oi elalo'au venimui maivaka edilamui.
5 'Olana eta vali nama'ina ela'asi kevamuiai 'eva sia luva 'avaeanai mo beia mai siavuna mai Idume Kabukabuna oi nuamuiai evamomo'aia. Lai oi ita a kamia koma 'eva oi 'ani oi oikabasi, ua 'eva oi emui nama'ina.
6 Luvana asi'i oi oanana vaika, beia lai boimaiai mai Lovia namana boinai oi oao luva oi oabiadae mai lalonamamui kanaua 'eva Idume Kabukabuna enai easi. 7 Kanaua 'ounai oi 'eva abiveni kauta boutai Makedonia ai mai Akaia ai kauta eta vaikaika davanai oi oao. 8 Lovia namana valina nama'ina oi kevamuiai 'uluna ela'asi 'eva Makedonia mai Akaia ai mo sia eole ia eda'a 'abu bounai, emui abiveni Dilava kevanai abivenina vaka 'abu itoina eda'aia. Kanaua 'ounai lai luva ka lai baluvala 'eva 'abuna asi'i. 9 'Olana lai oi a oabimaidae koma 'eva ia ita valina deluvavaia kauta mai a oi olalo 'udai koma dilava dedeta oi ovikanita ia Dilava umauna mauli Dilavana da'alana oi oabi, 10 mai Dilava Nakuna Iesu ba ai eko'isi kauna vutuvutuai be'asi oi o'imala kauna valina vaka deluvavaia. Iesu 'eva Dilava ena badu be'asi laloanai 'olata bevamauli.