1 “Kau ka e'ula Dilava ena lo'e ikakaona vinaulana bevavaia koanai ia 'eva vinaula nama'ina eula venia,” kanania 'eva luva umauna nuata umautai ekabia dae luvana. 2 Dilava ena lo'e ikakaona kauna 'eva ena koa benama'ina enai sia va'eva ka bedavalia, adana ka'onamo, nuana bevakula'ilala, nuana beabi 'inia, 'ola be'aku, da'a 'au kauta beabita dae ena lumai, mai vamalele vinaulana bevavaia kave'i, 3 sia beinu ba, sia beviala beia bemanau, sia beaivala, mai moni sia belalo'au venia. 4 Ia 'eva sibona ena luma kauta be'imata kave'i mai nakuna bevaidibata lelena be'ika mai 'olana be'aku dokadoka. 5 (Kau ka sibona ena luma kauta sia be'imata kave'i koanai, Dilava ena lo'e kauta a be'imata kave'i koma?) 6 Kau vali'umo eabiveni kauna 'eva lo'e ikakaona kaunai sia beabia 'isi, 'olana asi'i emaapa inoku Dilava Satani eva'ekoa boina asi'i ema'eko. 7 Inoku mulimuli kauta vaka ia 'olana be'aku, inoku sisiba sia bekakao mai Satani ena viuai sia beviviu.

8 Dala vitaitanai diakona vaka koakoa nama'ita bevaika vaikavai, dede vinaulata sia bevavai, sia beinu ba, mai dala va'evanai moni sia bekakavu. 9 Ia 'eva lalovai namata kataua Dilava 'ani evala'asita abiveni laloanai lalovaita deabi 'ini mainuata komolota mediatai. 10 Ia 'eva ekakovota makava inoku kevatai sia va'eva ka ekadavalia koanai diakono vinaulana bevavaia. 11 Dala vitaitanai adata vaka koakoa nama'ita bevaika vaikavai maivaka sisiba sia bekakao, sibota be'imata kave'i, mai vinaula boutai laloatai 'eva momo'aiai bevinaula. 12 Diakono adana ka'onamo, nakuna mai ena luma kauta 'eva be'imata kave'i. 13 Kau kataua diakono vinaulana devavaia kave'i kauta tavata 'eva 'ola aku vaida etai be'abi, eta abiveni bevanamala bekula'ila vaika Keliso Iesu valina be'oua kave'i.

14 Lau anuabata melala kava'inamo laloanai 'ani bavasi baikamu, beia malele kanania asinia evavasi kevamu, 15 'olana 'ani kena bamaka'i boina ia malele kanania bevalalovaimu sibota eta mauli a eka'imata kave'i koma Dilava ena lo'e kauta viloatai, kanaua 'eva mauli Dilavana ena lo'e, Dilava ena luva umauna bemia vaia mai bevakula'ilala 'abuna. 16 Ita kaikabasi kave'i eta kukudivo dalana kanaua Dilava kevatai evala'asia kukudivona 'eva namana.