Paulo Ena Malele Ivaluana
KOLINTO (2)
Kauta Kevatai
Puka Laloana Ilelena Luvana
Kolinto vanuanai vaikabasi kauta eta vaikabasi luvata si'avata vaika Paulo kevanai deluva 'eva abiveni kauta eta abiveni devavaia si'asi'a. Koakoa kanania 'eva Paulo ena lalovai lalovai ia akatai 'eva nama vaikana. Ena ula 'eva luva o vaikabasi kanania Kolinto kauta kevatai bevakomoloa, kanaua 'ounai malele kanania eleleia, ia ita belalonama 'udai.
Puka kanania paipana lava'ana'ina laloanai Paulo eta'u luva pasisita umauta vaida eluvata la'asi luva kataua Kolinto kauta evenita makava. Paulo eula ia 'eva kanaua sia beluva koma, beia eta apa, lovo ai mai ia deikaia 'iu'iu 'ounai luva pasisita umauta e'outa. Kolinto kauta luva katania 'uluta be'ika inoku bevamomo'aita mai eta koakoai belalo'udai 'eva lalonama bepupulu.
Melala kanaua'i vaka abiveni kauta Iudeai 'eva eta mauli desi'avana. Kanaua 'ounai Paulo vidulu monita vaida evalalo, beabita beda'a bevenita. Kanaua 'ounai Kolinto kauta nuata evakula'ilata, vinaula kanania 'ounai moni vaida beveveni (8 — 9).
Puka to'onai 'eva Paulo ediaka, vaikabasi kauta vaikabasita vaida deda'a devasi'avanala. Ena ula namana 'eva Kolinto kauta vaikabasi vaikabasita kataua leleta sia be'ika.
Puka Iduvuna Namata
a. Lova aku. (1.1 - 11)
b. Paulo mai Dilava ena lo'e kauta Kolintoai. (1.12 — 7.16)
c. Vidulu davata abiveni kauta Iudeai eta. (8.1 — 9.15)
d. Paulo veauneke kauba ena siavu. (10.1 — 13.10)
e. Luva to'ota. (13.11 - 14)
1
Vanama'ina Luvana.
1 Lau Paulo Keliso Iesu ena veauneke kau'u Dilava ena ula dainai, mai abiveni ai bo'akalata Timoteo itana malele kanania lai alelea evavasi Dilava ena lo'e kaumui Kolinto vanuanai oi omimia maivaka Dilava ena kau boumuiai Akaia kanona itoina laloanai oi omimia kaumui kevamui. 2 Lai ameamea Dilava ita Kamata mai Lovia namana Iesu Keliso eta iulaveni koana mai nua'elu 'eva akamuiai bemimia.
Dilava 'Eva Vakula'ila Boutai Olata.
3 Dilava ekavanama'inala ita eta Lovia namana Iesu Keliso kamana. Ia 'eva vilalo mai vakula'ila lalovaita boutai 'olata Dilavana. 4 Emai bavunu boutai ia eta'u emai lalovai evakula'ila, kanaua 'ounai Dilava emai lalovai evakula'ilata vitaitanai valiu debavunu kauta nuata lalovaita lai bavakula'ilata vaka bedaia. 5 Olana Keliso eana ana vitaitanai lai vaka melala doutamo anaana, inoku melala doutamo vakula'ila lalovaina emaiai namana e'ao Keliso dainai. 6 Lai banaana 'eva oi nuamui ivakula'ilana mai ivamaulimui dainai, lai nuamai bevakula'ila oi vaka nuamui bevakula'ila, 'olana vakula'ila kanaua'i kula'ila oi boabia anaana kataua etai oi bolava 'ini itani lai anaana laloatai alava 'ini boina. 7 Emai nuabata namana kevamuiai davana 'eva elava 'ini, 'olana lai aikabasi ita anaana vitaitanai lai mai oi ita sibota nuata bevakula'ilata.
8 Bo'akalamai e, lai a'ula Asia kanonai lai abavunu davata oiboikabasita. Lai anaana adavali 'eva nama vaikata mai demekau si'asi'a vaika, lai bamauli 'eva sia lai anuabata vaia. 9 Lai sibomai emai lalovaiai aonovaia 'eva 'ani lai aba. Beia kanania epulu 'eva lai sibomai kaumaiai sia lai babiveni kokonai, 'a ba ai evako'isita 'udai Dilavana sibonamo lai babivenia 'ounai. 10 Ia eta'u ba si'avana vaika enai evamaulimai mai vaka bevamaulimai. Mai ia lai anuabata venia bevamaulimai 'udai. 11 Oi vaka oi bodulumai emui meamea ai. Inoku meamea doutamo kataua daitai Dilava bevanama'inamai, Inoku kau doutamo betata'u vanama'ina luvata Dilava bevenia lai daimaiai.
Paulo Ena Lalovai Eva'olua
Davana Eva'edeaia.
Davana Eva'edeaia.
12 Emai apa 'eva kanania nuamai umaunai lai avamomo'aia, emai mauli kanobatai emai vikadia'a oi itana 'eva mailovena mai maikomolona Dilava enai. Lai kanania lai avavaia 'eva sia kanobata ena aonekai, beia Dilava ena iulaveni koana siavunai. 13 Lai oi bovakua mai oi boikabasi davanamo lai alele venimui, a'ula bounai oiboikabasi kave'i. 14 Oi vali'u sia oi oikabasimai kavei beia lau a'ula oi lai oiboikabasimai kave'i, inoku eta Lovia namana Iesu Keliso ena asi melalanai lai oi bapa vaimui vitaitanai oi lai boapa vaimai.
15 Lau kanania aikabasia kave'i 'ounai, inoku e'u lalovai avalavala 'eva bavasi 'ana'i kele'emui vanama'ina ivaluana oi boabia. 16 E'u lalovai ava'olua 'eva bavasi kele'emui vakaia bada'a Makedonia, inoku Makedoniai bamumue 'eva ba'asi kele'emui, vakaia oi botatau oibodulu'u bada'a Iudea. 17 Oi olalovaia e'u lalovai kanaua ava'olua 'eva veaveana avalavala, una? 'O kanobata lalovainai avavaia vakaia melala kaonamoai adiaka “O, 'o” mai “Asi'i, asi'i”, una? Asi'i vaika. 18 Dilava 'eva lele ivavuvenina kauna, vitaitanai emai luva evasi kele'emui davana 'eva melala kaonamoai ‘'o’ mai ‘asi'i’ sia lai aluvala. 19 Sila, Timoteo mai lau oi viloamuiai lai ailolo vaia kauna Dilava Nakuna Iesu Keliso 'eva melala kaonamoai ‘'o’ mai ‘asi'i’ sia eluvavaia, ia enai 'eva melala bounai luva umauna ‘'o’ mo emimia. 20 Olana Keliso 'eva Dilava ena luva 'ana'i boutai evamomo'aita. Kanaua 'ounai Iesu Keliso dainai ‘Amen’ a'oua Dilava vana ekavanama'inala. 21 Oi mai lai ita Keliso laloanai evalava inita kauna 'eva Dilava. Ia eta'u evasiavuta. 22 Ia ena koa kautai ene'eia 'au 'eva ita ia ena maivaka Idumena Kabukabuna laloatai ene'eiadivo kanaua 'eva bevamaulita koana.
23 Lau Dilava vanai aluluva maivaka ia e'ulalovai eikabasi, asi'i amavaidibamui nuamui asi'i amavanana 'ounai sia avasi Kolinto. 24 Lai oi emui abiveni sia lai ba'ola vaia 'olana emui abiveni ekula'ila, beia lai 'eva oi ita kavinaula ka'ona nuamui ivanama'inana kokonai.